Paruka 2 - Revised Samoan Catholic Bible

‘Ua Tagi Ieremia i le Atua ‘ona o Ierusalema

1E! ‘ua fa‘apouliuligia e le Ali‘i i lona to‘asā o le tama fafine a Siona;

a ‘ia lafo i lalo le matagofie o Isaraelu mai le lagi i le lalolagi;

‘ua lē manatua fo‘i e ia le mea e tu ai ona ‘a‘ao i le aso o lona to‘asā.

2‘Ua fa‘aumatia e le Ali‘i, ‘ae le‘i fa‘apelepeleina e ia o fale uma o Iakopo;

‘ua lepetia e ia i lona to‘asā o ‘olo o le tama fafine a Iuta ‘ua ia fa‘agatasia ma le ‘ele‘ele,

‘ua fa‘aleagaina e ia o le mālō ‘atoa ma ona ali‘i.

3‘Ua vavae‘eseina e ia i lona to‘asā tele o nifo uma o Isaraelu;

‘ua fa‘afo‘i atu o ia lona ‘a‘ao taumatau i luma o ē ita mai;

‘ua mū fo‘i o ia e pei o se afi mumū ‘iā Iakopo, ‘ua susunu ai i itū uma.

4‘Ua lolo‘u e ia lana ‘aufana pei o sē ‘ua ita mai;

‘ua mau lona ‘a‘ao taumatau e pei o sē ‘ua ita mai,

‘ua ia fafasi fo‘i i ē matagofie uma lava i le fale o le tama fafine a Siona;

‘ua sasa‘aina e ia o lona to‘atama‘i e pei o se afi.

5‘Ua ‘avea le Ali‘i e pei o sē ‘ua ita mai;

‘ua fa‘aumatia e ia o Isaraelu, ‘ua fa‘aumatia e ia ona maota uma;

‘ua fa‘aumatia ona ‘olo, ‘ua fa‘ateleina e ia le fa‘anoanoa

ma le fa‘avauvau o le tama fafine a Iuta.

6‘Ua ia lia‘iina lava o lona pā e peiseaī o se pā o se fa‘ato‘aga;

‘ua e fa‘aumatia le mea e potopoto ai ‘ua fa‘agaloina e le ALI‘I i Siona o le tausamiga ma le sapati;

o lona to‘asā matuā tele ‘ua ia ‘ino‘ino ai i le tupu ma le ositaulaga.

7‘Ua tu‘ulafoa‘iina e le Ali‘i o lona fatafaitaulaga,

‘ua ia ‘ino‘ino i lana mea pa‘ia,

‘ua tu‘uina atu e ia pā o ona maota i lima o ē ita mai;

‘ua latou leo tetele i le fale o le ALI‘I, e pei ‘ona faia i le aso o le tausamiga.

8Na manatu le ALI‘I na te fa‘aumatia le ‘olo o le tama fafine a Siona;

‘Ua ia fa‘ata‘oto le fua; ‘ua lē fa‘afo‘i atu lona ‘a‘ao a ‘ua fa‘aumatia;

‘ua fa‘afa‘anoanoaina e ia le pā ma le ‘olo; ‘ua fa‘avaivai fa‘atasi ia.

9‘Ua gōgoto ona puipui i le ‘ele‘ele; ‘ua fa‘aumatia ma ‘ua gaugau ona fa‘amau fa‘alava;

o lona tupu ma ona ali‘i ‘ua i nu‘u ‘ese i latou; na leai se tulafono;

o ona perofeta fo‘i ‘ua lē maua e i latou se fa‘aaliga mai le ALI‘I.

10‘Ua nonofo i le ‘ele‘ele, ‘ua fa‘alologo toeaina o le tama fafine a Siona;

‘ua latou tu‘u le efuefu i luga i o latou ulu; ‘ua latou fufusi ‘iā te i latou i ‘ie talatala

‘ua punou ulu o taupou o Ierusalema i le ‘ele‘ele.

11‘Ua ‘avea o‘u mata i le tagi, ‘ua sapotuvale lo‘u manava,

‘ua masa‘a lo‘u ate i le ‘ele‘ele, ‘ona ‘ua tu‘imomomo le tama fafine a lo‘u nu‘u;

‘ina ‘ua matapogia tamaiti ma tama meamea i ala o le ‘a‘ai.

12‘Ua latou fai atu i o latou tinā, “Po o fea o i ai se saito ma se uaina?”

‘Ina o matapogia i latou pei o sē ‘ua manu‘a i ala o le ‘a‘ai,

‘ina o mavae o latou ola i fatafata o latou tinā.

13Pe se a se mea ‘ou te ta‘u atu ‘iā te oe?

Pe se a se mea ‘ou te fa‘atusaina ‘iā te oe, le tama fafine a Ierusalema e?

Pe se a se mea ‘ou te fa‘atatauina ‘iā te oe, e fa‘amafanafanaina ai oe,

le taupou e, le tama fafine a Siona?

Auā e tele lou manu‘a pei o le sami; po o ai na te fō‘ia oe?

14‘Ua va‘aia e au perofeta o mea pepelo ma mea fa‘atauva‘a mo oe;

‘ua latou le fa‘aalia au agasala, ‘ina ‘ia fa‘afoisia lau tāfeaga;

a ‘ua latou va‘aia mo oe o avega pepelo ma mea e fa‘asesē ai.

15‘Ua pati lima ‘iā te oe o i latou uma e ui ane i le ala;

‘ua latou uisa ma latou lialia‘i o latou ulu i le tama fafine a Ierusalema,

‘ua fa‘apea ane, “O le ‘a‘ai ‘ea lenei sa ta‘ua ‘ua ‘ato‘atoa ona matagofie;

o lē sa fiafia i ai le lalolagi uma?”

16O ē ita ‘iā te oe ‘ua fa‘amamaga o latou gutu ‘iā te oe;

‘ua latou uisa, ‘ua latou lilivau o latou nifo;

‘ua latou fai mai, “‘Ua tatou fa‘aumatia o ia; e moni,

o lenei le aso sa tatou fa‘atalitali i ai ‘ua tatou maua mai, ‘ua tatou iloa.”

17‘Ua faia e le ALI‘I le mea sa na finagalo i ai;

‘ua fa‘ataunu‘u e ia le ‘upu sa ia fetalai mai ai i aso anamua ‘ua ia lepetia,

‘ua leai fo‘i sona alofa mai; o ia ‘ua fa‘afiafiaina ai ‘ona o oe o lē ‘ua ita mai,

‘ua ia fa‘amaualugaina le nifo o ē fai oe mo latou fili.

18Sa ‘alalaga o latou loto i le Ali‘i, Le ‘aupā e, o le tama fafine a Siona,

‘ia tafe ifo loimata e pei o se alia i le ao ‘atoa ma le po;

‘aua lava ‘e te mālōlō; ‘aua le mapu ou tamatama‘i mata.

19‘Inā tula‘i ia, ‘inā vala‘au atu i le po i le amataga o leoleoga;

‘ia e sasa‘aina atu lou loto e pei o se vai i luma o le Ali‘i;

‘inā sisi‘i atu ia o ou lima ‘iā te ia ‘ina ‘ia ola au tamaiti

‘ua matapogia i le fia ‘ai i tulu‘iga o ala uma.

20Le ALI‘I e, silasila mai ia ma ‘ia e silafia lē ‘ua e faia nei mea i ai.

Pe ‘a‘ai ‘ea e fafine a latou fānau o tamaiti ‘ua sapaia?

Pe fasiotia ‘ea i le malumalu o le Ali‘i o le ositaulaga ma le perofeta.

21‘Ua ta‘atitia i fafo i le ‘ele‘ele o tamā ma toeaina;

o ou taupou ma ou taulele‘a ‘ua fasiotia i le pelu;

‘ua e fasiotia i latou i le aso o lou to‘asā;

‘ua e fasia, ‘ua e lē fa‘asaoina.

22‘Ua e tala‘iina e pei o le aso o le tausamiga i mea ‘ou te mata‘u ai i itū uma;

sa leai fo‘i sē na sao po o sē na toe i le aso na to‘asā ai le ALI‘I;

o ē na ‘ou sapaia ma ‘ou tausia, ‘ua fa‘aumatia i latou e lē ‘ua ita mai.