Fa‘amasino O Le Fa‘atomuaga - Revised Samoan Catholic Bible

O Le Fa‘atomuaga O le tusi i Fa‘amasino o fa‘amatalaga o talatu‘u i le taimi o le tele o fa‘alavelave sa tutupu i totonu o tagata Isaraelu. Ma fa‘apenā fo‘i ma le fa‘aauauina o tau‘a ma tagata o Kanana ma le sōloia o pulega fa‘atupu i totonu lava o Isaraelu. E i ai ‘ona tula‘i mai latou nei o le “‘Au Fa‘amasino” e fai ma ta‘ita‘i o tagata Isaraelu. O le to‘atele o le ‘au Fa‘amasino, o tagata totoa e pei o Samasoni, ma tagata sa ta‘ita‘i i vaega ‘au o Isaraelu.O nisi o manatu tāua o le tusi lenei “O le sulufa‘iga ma le fa‘aola o tagata Isaraelu o le Atua lea, e ala i le usita‘i ma fa‘alogo lelei i ana afioga. O le pa‘ū i le malaia ma le leaga o le lē usita‘i i poloa‘iga a le Atua.” ‘Ae ui lava ‘ina sa lē fa‘alogo Isaraelu i le tele o taimi ‘ae sa tumau pea le alofa o le Atua i lona nu‘u filifilia.O le Fa‘asologa o Matā‘upu:O mea sa tutupu ‘ina ‘ua maliu a Iosua 1.1—2.10O le ‘au Fa‘amasino o Isaraelu 2.11—16.31O fa‘amatalaga o mea ‘ese‘ese sa tutupu i Isaraelu 17.1—21.25