Iopu 15 - Revised Samoan Catholic Bible

Talanoaga lona Lua(15.1—21.34)Elifasa.

1‘Ona tali mai ai lea o Elifasa le Timanu, ‘ua fa‘apea mai,

2“E ono ‘ea i le tagata poto ‘ona tali atu ma le poto e lē aogā,

ma fa‘atumuina lona manava i le matagi mai sasa‘e?

3E a‘oa‘i atu ‘ea o ia i ‘upu e lē aogā,

ma lauga e lē tupu ai se lelei?

4A o oe, ‘ua e fa‘alēaogāina le mata‘u,

ma ‘ua e fa‘alēaogāina le tatalo i luma o le Atua.

5Auā ‘ua fa‘ailoa e lou lava gutu lau amioletonu,

ma ‘ua e filifilia le laulaufaiva o ē fai togafiti.

6‘Ua fa‘asalaina oe e lou lava gutu, ‘ae lē o a‘u;

‘ua molimau fo‘i ou laugutu ‘iā te oe.

7“O oe ‘ea le ulua‘i tagata na fānau mai?

Pe na fānaua ‘ea oe e muamua i mauga?

8‘Ua e fa‘alogologo ‘ea i le pulega a le Atua?

‘Ua e tāofia ‘ea le poto mo oe lava?

9Se a se mea ‘ua e iloa, e lē iloa fo‘i e i matou?

Se a se mea ‘ua e poto ai, e lē o ‘iā te i matou fo‘i?

10O lo‘o ‘iā te i matou o ē ulusinā

‘atoa ma toeaina, e sili ‘ona matutua i lou tamā.

11‘Ua fa‘atauva‘a ‘ea ‘iā te oe o fa‘amafanafanaga mai le Atua,

‘atoa ma ‘upu mālie ‘ua fai atu ‘iā te oe?

12Se a le mea ‘ua ta‘ita‘i‘eseina ai oe e lou loto?

Pe se a fo‘i le mea ‘ua e mata fa‘asiasia ai?

13Auā ‘ua e liliu lou loto e tete‘e i le Atua,

ma ‘ua e fa‘apunaia ‘upu a‘i lou gutu.

14Se a ‘ea le tagata, ‘ia mamā ai o ia,

ma ‘ia amiotonu lē ‘ua fānau mai i le fafine?

15Fa‘auta, ‘ua lē fa‘atuatua o ia i lona ‘au pa‘ia;

‘ua lē mamā fo‘i le lagi i lana silafaga.

16E matuā sili ai ‘ona ‘inosia ma leaga le tagata,

o lē inu i le amio leaga e pei o le vai.

17“‘Ou te fa‘ailoa atu ‘iā te oe,

‘ia e fa‘alogologo mai ‘iā te a‘u;

‘ou te fa‘amatalaina atu fo‘i le mea ‘ua ‘ou va‘aia.

18O le mea na fa‘ailoa mai ē o popoto,

sa iloa ai i o latou tamā, ma ‘ua latou lē natia.

19Sa tu‘uina mai le lalolagi ‘iā te i latou na o i latou lava;

sa lē ui ane fo‘i se tagata ‘ese ‘iā te i latou.

20‘Ua puapuagātia i ona aso uma le tagata amio leaga;

‘ua natia fo‘i i le tagata sauā le faitau o ona tausaga.

21‘Ua i ona taliga le leo e mata‘u ai;

e o‘o atu ‘iā te ia lē na te fa‘aumatia a o manuia o ia.

22‘Ua lē manatu o ia e toe fo‘i mai o ia a‘i le pouliuli;

‘ua lamatia fo‘i o ia e le pelu.

23‘Ua fealualua‘i o ia e sā‘ili i mea e ‘ai, ‘ua fa‘apea ane, ‘Po o ifea o i ai?’

‘Ua iloa o ia ‘ua latalata mai lava ‘iā te ia le aso o le pouliuli.

24‘Ua fa‘amata‘utia o ia e le puapuagā ma le tigā;

la te manumālō ‘iā te ia, e pei o le tupu ‘ua sauni i le tau‘a.

25Auā ‘ua fa‘aloaloa atu e ia lona lima i le Atua,

‘ua fa‘amalosia o ia e ia e tete‘e atu i Lē e ona le malosi uma lava.

26E osofa‘i o ia ‘iā te ia ma le ua ma‘a‘a,

ma tua o ona talitā ‘ua putuputu.

27Auā e puputa lava ona mata,

ma matuā puta lava o ia.

28O le mea lea e nofo ai o ia i ‘a‘ai ‘ua fa‘aumatia,

o fale fo‘i na lē ‘ainā, e lata ‘ona ‘avea ma faupu‘egama‘a.

29E lē mau‘oa o ia e lē tumau fo‘i lona ‘oloa,

e lē fa‘ateleina lava e ia a latou mea i le nu‘u.

30E lē alu ‘ese o ia i le pouliuli;

e fa‘amamagoina ona tātupu i le afi mumū,

e ‘avea fo‘i o ia e le mānava o lona fofoga.

31O lē ‘ua fa‘asesēina, ‘aua le fa‘atuatua o ia i le mea fa‘atauva‘a;

auā e fai mōna taui le mea fa‘atauva‘a.

32Na te lē aulia le ‘ato‘atoa o ona aso,

e lē lauolaola fo‘i ‘ona la.

33Na te sa‘alu‘uina ona fua moto, e pei o le vine,

ma lafoa ona fuga, e pei o le olive.

34Auā e autagatā le ‘āiga o le tagata fa‘alēmata‘u;

e susunuina fo‘i i le afi fale ‘ie o ē tali taui.

35‘Ua totō i latou i amio leaga,

na fānanau fo‘i e i latou le agasala,

‘ua sauniuni fo‘i e o latou loto mea fa‘a‘ole‘ole.”