Isaia 49 - Revised Samoan Catholic Bible

O le Mesia, e Malamalama ai Nu‘u ‘Ese; e Manuia fo‘i lona Nu‘u

1Fa‘alogo mai ia ‘iā te a‘u,

‘outou nu‘u tu matāfaga e;

ua‘i mai ia o ‘outou taliga ‘outou nu‘u mamao e.

‘Ua vala‘auina a‘u e le ALI‘I talu mai le manava;

‘ua na ta‘ua lo‘u igoa talu mai le manava o lo‘u tinā.

2‘Ua na faia lo‘u gutu e pei o le pelu ma‘ai;

‘ua ia natia a‘u i le paolo o lona ‘a‘ao.

‘Ua na faia a‘u ma ū fanafana ‘ua fa‘apupulaina,

ma na fa‘alilo ‘iā te a‘u i lana utu.

3Na ia fetalai mai ‘iā te a‘u,

“O la‘u ‘au‘auna lava oe; Isaraelu e,

e vi‘ia lava a‘u ‘ona o oe.”

4‘Ona ‘ou fai atu ai lea, “‘Ua ‘ou tigāina fua;

‘ua ‘ou fa‘aumaina lo‘u malosi, ‘ua i‘u vale, ‘ua lē aogā;”

‘Ae ui lava i lea, o lo‘o i le ALI‘I lo‘u fa‘amasinoga,

ma lo‘u taui o lo‘o i lo‘u Atua lea.

5A o lenei, o lo‘o fetalai mai le ALI‘I,

o lē na faia a‘u talu mai le manava e fai ma ‘au‘auna ‘iā te ia,

e toe fa‘afoisia Iakopo ‘iā te ia.

E ui lava ‘ina le fa‘apotopotoina o Isaraelu,

‘ae vi‘ia a‘u i luma o le ALI‘I;

e fai fo‘i lo‘u Atua mo‘u malosi.

6‘Ua fetalai mai fo‘i o ia,

“O le mea māmā ‘ina ‘ia fai oe ma ‘au‘auna ‘iā te a‘u,

‘ina ‘ia fa‘aea mai itū‘āiga o Iakopo,

ma fa‘afoisia mai ē ‘ua fa‘asaoina i Isaraelu.

‘Ua ‘ou avatua fo‘i oe e fai ma malamalama o nu‘u ‘ese,

e fai ma a‘u fa‘aolataga ‘ia o‘o i tulu‘iga o le lalolagi.”

7O lo‘o fa‘apea ‘ona fetalai mai o le ALI‘I,

o le Fa‘aola o Isaraelu, o lona Ali‘i Pa‘ia,

i lē ‘ua fa‘alēaogāina e tagata ma ‘inosia e le nu‘u.

“O le ‘au‘auna a ē pule; e iloa mai tupu,

ma latou tula‘i; o ali‘i fo‘i ma latou ifo.

Auā o le ALI‘I, o lē ‘ua fa‘amaoni,

o le Pa‘ia o Isaraelu, lē ‘ua filifilia oe.”

O le Toe Fuata‘i o Ierusalema

8O lo‘o fa‘apea ‘ona fetalai mai o le ALI‘I:

O ona po o le alofa ‘ua ‘ou tali atu ai ‘iā te oe,

o le aso e fa‘aolaina ai ‘ua ‘ou fesoasoani ai ‘iā te oe.

‘Ou te leoleo fo‘i ‘iā te oe ma a‘u avatua oe e fai ma feagaiga a le nu‘u;

‘ina ‘ia fa‘aeaina le lalolagi,

‘ia faia nu‘u ‘ua fa‘atafunaina mo latou tofi.

9E fai atu i ē o fusifusia, “Ō mai ia i fafo;”

e fai atu fo‘i i ē o i le pouliuli,

“Fa‘aali mai ia ‘outou;”

Latou te ‘a‘ai lava i ala;

o mauga tula uma o latou taaga ia.

10Latou te lē fia ‘a‘ai, latou te lē fia inu fo‘i;

e lē ogotia i latou i le vevela po o le lā.

Auā o lē na alofa ‘iā i latou,

na te ‘ave ‘iā te i latou,

na te ta‘ita‘iina fo‘i i latou i vaipuna.

11‘Ou te faia fo‘i ma ala o‘u mauga uma,

e maualuga fo‘i o‘u ala tele.

12Fa‘auta, e ō mai i latou nei mai le mea mamao;

fa‘auta fo‘i, o i latou nei mai le itū i matū ma sisifo,

ma i latou mai le nu‘u o Sainima.

13‘Ia ‘alaga oe le lagi e, ‘ia ‘oli‘oli oe le lalolagi e,

‘ia leo tetele ‘outou mauga ma ‘ia ‘alalaga fiafia.

Auā, ‘ua fa‘amafanafanaina e le ALI‘I lona nu‘u,

‘ua ia alofa fo‘i i ona tagata ‘ua tigāina.

14A ‘ua fai mai Siona,

“‘Ua lafoa‘iina a‘u e le ALI‘I;

‘ua galo mai a‘u i le Ali‘i.”

15E galo ‘ea i le fafine lana tama ‘ua susu,

na te lē alofa i le tama a lona lava manava?

Ai lava e galo ‘iā te i latou,

‘ae lē galo lava oe ‘iā te a‘u.

16Fa‘auta, ‘ua ‘ou taia lou fa‘atusa i o‘u alofilima;

e tumau ou pā i o‘u luma.

17E fa‘ata‘alise mai lau fānau;

o ē na lepetia oe, ma ē na fa‘atafunaina oe,

latou te ō ‘ese ‘iā te oe.

18Fētepatepa‘i ia oe i itū uma ma e va‘ava‘ai;

o lo‘o fa‘apotopoto mai i latou uma, ‘ua latou ō mai ‘iā te oe.

‘Ua fetalai mai le ALI‘I,

O lo‘o ola a‘u, ‘e te ‘ofu oe ‘iā i latou uma

e pei o mea e fa‘amatagofie a‘i

ma ē fusi a‘i e pei o lē a nofo tane.

19Auā o au mea fa‘atafunaina, ma au mea tu‘ufua,

ma lou fanua ‘ua oloina, e lau itiiti ia i ia ona aso i ē nonofo ai;

e mamao fo‘i ē na fa‘aumatia oe.

20O au tama sa ‘ave‘eseina ‘iā te oe,

latou te toe fai ane i ou taliga,

“‘Ua lauitiiti lenei mea ‘iā te a‘u;

tu‘utu‘u atu ia, ‘ou te nofo ai.”

21‘E te fai ifo fo‘i i lou loto,

“O ai ‘ea na na fānaua mai i latou nei mo a‘u?

Auā o a‘u sa āufānaua ma ‘ua pā,

sa tāfea ma tulia a‘u;

O ai fo‘i na na tausia i latou nei?

Fa‘auta, o a‘u sa tu‘ua e to‘atasi lava a‘u,

o i latou nei sa ifea i latou?”

22O lo‘o fa‘apea ‘ona fetalai mai

o le Ali‘i le ATUA:

Fa‘auta, ‘ou te si‘i atu lo‘u lima i nu‘u ‘ese,

ma ‘ou fa‘atū i luga lo‘u tagāvai i nu‘u.

Latou te ‘aumaia au tama tane i o latou fatafata,

‘ae ‘aumaia au tama teine i o latou tau‘au.

23E fai fo‘i tupu māu tausi tama,

ma o latou masiofo e fai māu failele.

Latou te ifo to‘ele ‘iā te oe;

latou te etoeto i le ‘ele‘ele o ou vae.

‘E te iloa fo‘i, o a‘u lava o le ALI‘I,

e le fa‘amāina i latou o ē fa‘atalitali ‘iā te a‘u.

24E faoa ‘ea le vete a‘i lē ‘ua malosi?

pe lavea‘iina ‘ea le tāfeaga a lē ‘ua amiotonu?

25Auā o lo‘o fa‘apea ‘ona fetalai mai o le ALI‘I,

E faoa lava le tāfeaga a lē ‘ua malosi,

e lavea‘iina fo‘i le vete a lē mata‘utia;

‘Ou te finau atu fo‘i a‘u i ē ‘ua finau atu ‘iā te oe,

‘ou te fa‘aolaina fo‘i au tama.

26‘Ou te fagaina fo‘i ē ‘ua sauā ‘iā te oe i o latou lava tino;

e ‘onā fo‘i i latou i o latou toto e pei se suāvine;

E iloa ai tagata uma lava,

o a‘u lava o le ALI‘I, o lou Fa‘aola,

ma lē na fa‘atauina oe, o le Malosi o Iakopo.