1O lenā lava aso na foa‘iina atu ai e le tupu o Asueru mo le masiofo o Eseta, le fale o Hamanu o lē na ita i sa Iutā. ‘Ua alu atu fo‘i Moretekai i luma o le tupu, auā ‘ua ta‘u atu e Eseta la te ‘āiga.
3‘Ona toe tautala atu lea o Eseta i le tupu, ‘ua ia fa‘apa‘ū fo‘i i luma o ona vae ma tagi, ma ‘ai‘oi ‘iā te ia, ‘ia fa‘aliliu‘eseina e ia le leaga a Hamanu o lo sa Akakō, ma lana manatu na ia manatu ai i sa Iutā.
9‘Ona vala‘auina lea o ē tusi‘upu a le tupu i lenā lava itū aso i le tolu o masina, o le masina lea o Sevana, i lona aso e lua sefulu ma le tolu; ‘ona tusia lea o mea uma e pei ‘ona fai atu ai o Moretekai e avatu i sa Iutā ma ali‘i sili ma ē pule i nu‘u ma ali‘i e pule i itū mālō e gata mai i Initia e o‘o atu i Aitiope, o itū mālō e tasi le selau ma le lua sefulu ma le fitu; na tusi atu i lea itū mālō ma lea itū mālō e tusa ma a latou tusilima, ma lea nu‘u ma lea nu‘u e tusa ma a latou gagana, o sa Iutā fo‘i e tusa ma la latou tusilima ma la latou gagana.
10‘Ua ia tusi atu fo‘i i le igoa o le tupu o Asueru, ma fa‘amaufa‘ailogaina ai i le mama a le tupu; ‘ona molia atu lea o ia tusi ē ‘ua tele vavave ē na ti‘eti‘e i solofanua, o ē na ti‘eti‘e i manu tele vavave, ma falata, o tama ia a solofanua fafine.
11Auā ‘ua tu‘uina atu e le tupu i sa Iutā o ē ‘ua i lea ‘a‘ai ma lea ‘a‘ai, ‘ia latou potopoto, ma tete‘e atu ia ola ai i latou; ‘ia fa‘aumatia, ‘ia fasiotia, ma fano o tau uma a le nu‘u ma le itū mālō o ē fa‘asauā mai ‘iā te i latou, o tamaiti ‘atoa ma fafine, ma ‘ia vetea a latou mea,O Tulafono a le Tupu e puipuia ai Tagata Iutaia
13O le ata lenei o lea tusi: O le tupu mamalu o Asueru o lo‘o ofo alofa atu i faipule sili o itūmālō e selau lua sefulu ma le fitu pau mai Initia pau mai Aitiope, e fa‘apea fo‘i i latou ‘ua fa‘amaoni i lo matou mālō. E amio fa‘asausili ni isi e to‘atele pe a latou maua se mamalu tele mai tagata e so‘ona agalelei atu ‘iā te i latou.
14E lē gata ‘ona latou fia fa‘asaunoa i tagata o lo matou mālō, ‘ae peita‘i ‘ua latou taupulepule i le ola o ē agalelei ‘iā te i latou e peiseaī ‘ua lē lava le manuia ‘ua o‘o mai ‘iā te i latou.
15‘Ua latou titina le loto fa‘afetai i loto o tagata, ‘ae lē gata i lea, ‘ua sipa fo‘i i latou ‘ona o vi‘iga a e amio leaga, ‘ona latou tāofi ifo ai lea o le a latou ‘alo ‘ese i le fa‘amasinoga tonu a le Atua, lē ‘ua ‘ino‘ino i le leaga, ‘ua silafia fo‘i e ia o mea uma lava.
16E fa‘afia ma fa‘afia ‘ona o‘o i ē pule ‘ona latou ‘auai i le fa‘amasa‘a fua o le toto o tagata e le sala, ma isi amioga leaga tele, ‘ona ‘ua tōsina i latou i le mau‘upu o a latou uō na latou tofia e tausi i mea a le mālō.
17O togafiti leaga a nei tagata amio fa‘api‘opi‘o ‘ua ala ai ‘ona fa‘asesēina le loto lelei o faipule sili o nu‘u.
18E lē aogā ‘ona fa‘amanatu atu tala i mea leaga na tutupu anamua ‘ona o le fa‘ama‘i pipisi o faipule fa‘api‘opi‘o, ‘ae silasila i mea leaga i nei ona po.
19o le a matou va‘ava‘ai lelei mo le lumana‘i ‘ina ‘ia filemū ma maninoa le mālō mo tagata uma,
20e ala mai i le fesuisuia‘iga o a matou faiga ma le fa‘amasinoina e tusa ma le mafaufau sa‘o o mea ‘ua molia i o matou luma.
21Auā na malotia i matou e Hamanu, le atali‘i o Hametata (o le tagata Maketonia, o le tagata ‘ese lava ia e leai sona toto Peresia, ‘ua lē loto lelei fo‘i o ia pei o i matou)
22‘ua agaleleiina fa‘au o ia e i matou e pei ‘ona matou loto lelei atu i nu‘u uma, ‘ua o‘o fo‘i ‘ina ta‘ua o ia o lo matou tamā ma sa to‘ele le ifo ‘iā te ia o tagata uma auā e pito ane lona tulaga i le nofoāli‘i o le tupu.
23‘Ae peita‘i ‘ua lē mafai ‘ona ia tāofiofi lona fia sili, ‘ua fia faoa e ia lo matou mālō ma lo matou ola.
24O lona poto i fai togafiti uiga ‘ese ma lona taufa‘asesē ‘ua ia tagi mai ai ‘ina ‘ia oti Moretekai, lo matou fa‘aola ma le tagata na agalelei mai pea ‘iā te i matou, e fa‘apea ma Eseta lo matou soa le mata‘uleagaina, ‘atoa fo‘i ma lo la nu‘u uma lava.
25‘Ua fa‘apea ifo o ia o le ala lea o le a mafai ai ‘ona ia fa‘avaivai i matou ma ‘ave le mālō Peresia i tagata Maketonia.
26A o nei tagata Iutaia ‘ua tu‘uina i le fanoga e lea tagata amio leaga sautuatolu, ‘ua matou maua i latou e lē o ni tagata fai amio leaga a o tagata tausi i tulafono matuā lelei lava,
27o atali‘i fo‘i i latou o le Silisili‘ese, le Atua soifua e ona le malosi uma lava, o le ‘ua na matuā fa‘amanuiaina le mālō mo o matou tamā, mo i matou fo‘i.
28‘Aua la ne‘i ‘outou ‘amana‘ia o tusi na ‘auina atu e Hamanu, le atali‘i o Hametata, auā o lē na faia ia mea ‘ua uma ‘ona sisi i le faitoto‘a o Susana, o ia ‘atoa ma lona ‘āiga uma. Auā o le Atua, le pule aoao i mea uma, na fa‘asala loa ‘iā te ia i le fa‘asalaga ‘ua tatau mo ia.
29O lenei, ‘ia ‘outou fa‘apipi‘i se ata o lenei tusi i mea uma e potopoto ai tagata, ‘ia tu‘u i tagata Iutaia ‘ia tausi e i latou ‘iā latou lava tulafono i luma o tagata uma, ma ‘ia fesoasoani atu ‘iā te i latou ‘ina ‘ia puipuia o i latou e i latou i le aso na ‘atofaina ai lo latou fanoga, o le aso sefulu ma le tolu lea o lona sefulu ma le lua o masina, o Atara lea, pe a osofa‘i mai ai tagata ‘iā te i latou.
30Auā o le Atua, le pule aoao i mea uma, ‘ua na liua le aso o le fanoga ma aso fiafia mo lona nu‘u filifilia.
31A o ‘outou tagata Iutaia, ‘ia ‘outou tausia ma le ‘oli‘oli lenā aso i o ‘outou aso tetele fa‘amanatu, ‘ina ‘ia ‘avea ai i aso nei ma aso lumana‘i fo‘i ma fa‘amanatuga o le fa‘aolataga mo ‘outou ma tagata Peresia ‘ua loto lelei, a o le fa‘amanatuga o le fa‘afanoga mo ‘outou fili.
32O ‘a‘ai ma nu‘u uma lava e lē usita‘i i latou i nei fa‘atonuga, o le a matuā fa‘atafunaina ia i le pelu ma le afi, e lē toe mafai ‘ona ‘ainā e tagata, e ‘inosia fo‘i e manu fe‘ai ma manu felelei.
33 ‘Ua fa‘ailoa i nu‘u uma le tusi na tusia e avatua e fai ma tulafono i itū mālō uma, ‘ina ‘ia saunia sa Iutā i lenā aso e taui ma sui i ē ‘ua ita ‘iā te i latou.
34‘Ua ō atu ē ‘ua tele vavave ē na ti‘eti‘e i manu tele vavave, ma falata, ‘ua fa‘ata‘aliseina ma fa‘avaveina i le poloa‘iga a le tupu. Na avatua fo‘i tulafono a‘i Susana le maota.
35‘Ona alu atu lea o Moretekai nai luma o le tupu ‘ua ‘ofu i ‘ofu o tupu, o le ‘ie uli ma le ‘ie lino sinasina, ma le pale auro tele, ma le ‘ofu talaloa o le ‘ie vavae ma le pauli. ‘Ua ‘alalaga fiafia fo‘i ma ‘oli‘oli le ‘a‘ai o Susana.
36Na i ai fo‘i i sa Iutā po le malamalama, ma le ‘oli‘oli ma le fiafia, ma le mamalu.
37O mea fo‘i na o‘o i ai le poloa‘iga a le tupu ma lana tulafono, i itū mālō uma ma ‘a‘ai uma, ‘ua tupu ai le ‘oli‘oli ma le fiafia i sa Iutā, ‘ua fai fo‘i le tausamiga ma le aso lelei. E to‘atele fo‘i tagata o le nu‘u ‘ua fai ma tagata o sa Iutā; auā ‘ua matata‘u i latou i sa Iutā.
Who We AreWhat We EelieveWhat We Do
2025 by iamachristian.org,Inc All rights reserved.
