Malaki Fa‘atomuaga - Revised Samoan Catholic Bible

Fa‘atomuagaO le tusi a Malaki sa tusia i le vaitaimi pe tusa lea o le 516 T.L.M, ‘ina ‘ua māe‘a o le fausiaga o le Malumalu i Ierusalema. O le fe‘au ‘autū a le perofeta, o le vala‘auga lea o le ‘au ositaulaga ma tagatanu‘u ‘ina ‘ia toe fa‘afou lo latou fa‘atuatua e ala lea i le tausi i lo latou feagaiga ma le Atua. ‘Ua manino mai ‘ua tele ‘ina solomuli le olaga tapua‘i o tagata i le Atua. ‘Ua leai fo‘i se fa‘aaloalo o le ‘au ositaulaga i le Ali‘i ma le malumalu. ‘Ua latou momoli fo‘i taulaga sesē ma le solia o poloa‘iga a le Atua. ‘Ae le gata i lea ‘ua tele ‘ina ola so‘onafai ma sauā le ‘au ositaulaga i tagata matitiva ma le ‘au vaivai. O Tamaloloa ‘ua agaleaga i o latou avā ma fa‘atete‘a i latou e tusa ma o latou mana‘oga fa‘aloloto.‘Ua lu‘itauina ai e Malaki tagatanu‘u uma ‘ae maise le ‘au ositaulaga, ‘ia latou faimeatonu ma fa‘amaoni i le feagaiga a le Atua ma Isaraelu. ‘Ia latou mata‘u ma fa‘aaloalo i le Ali‘i ma momoli taulaga e sili ‘ona mamā ma le amiotonu. ‘Āfai o le a latou faia e tusa ma poloa‘iga a le Atua, o le a fa‘apenā ‘ona fa‘amanuia le Ali‘i ‘iā te i latou.O le Fa‘asologa o Matā‘upu:O le agasala a Isaraelu 1.1—2.16O le fa‘amasinoga a le Atua ma lona alofa tunoa 2.17—4.6