Salāmo 61 - Revised Samoan Catholic Bible

‘Ua fa‘alagolago Tavita i le AtuaMa le usu pese i le nekina. O le salāmo a Tavita

1Le Atua e,

‘ia e fa‘afofoga mai i la‘u ‘alaga;

‘ia e liliu mai la‘u tatalo.

2‘Ou te vala‘au atu ‘iā te oe a‘i le gata‘aga o le nu‘u,

pe a fa‘avaivai lo‘u loto.

‘Ia e ta‘ita‘iina a‘u i le papa,

e sili ‘ona maualuga ‘iā te a‘u.

3Auā ‘ua fai oe mo‘u malu,

o le ‘olo malosi a‘i lē ‘ua ita mai.

4‘Ou te nofo e fa‘avavau lava i lou fale fetāfa‘i;

‘ou te fa‘atuatua i le paolo o ou ‘apa‘au. Selā.

5Auā o oe, le Atua e,

‘ua e fa‘afofoga mai i a‘u tautoga;

na e foa‘iina mai le tofi o ē matata‘u i lou suafa.

6‘E te fa‘afualoaina le soifua o le tupu;

‘ia ‘avea ona tausaga ‘ia autupulagā.

7E ti‘eti‘e o ia e fa‘avavau i luma o le Atua;

‘ia e saunia le alofa ma le fa‘amaoni la te leoleoina ai o ia.

8‘Ona ‘ou fai pesega ai lea i lou suafa e fa‘avavau,

‘ina ‘ia ‘ou avatua i lea aso ma lea aso o mea na ‘ou tautō ai.