Isaia 23 - Revised Samoan Catholic Bible

O le Malaia o Turo

1O le avega a Turo.

‘Inā uiō ia ‘outou va‘a o Tasesa,

auā ‘ua fa‘atafunaina o ia;

e leai se fale, e leai fo‘i se mea e ui atu ai;

‘ua fa‘aali atu ai ‘iā te i latou a‘i le nu‘u o Kitimo.

2‘Inā fa‘alologo ia ‘outou o ē nonofo i le nu‘u tuloto,

o tagata fa‘atau‘oa o Saitonu,

e ‘ua ui atu i le sami, na latou fa‘atumuina oe.

3Sa i ai saito o Seora i vai tetele,

o le seleselegāsaito mai le vaitafe

na mau ‘oloa ai o ia;

na fai o ia ma mea e fa‘atau ai ‘oa i nu‘u ‘ese.

4Saitonu e, ‘ia māsiasi oe,

auā ‘ua tautala mai le sami,

o le ‘olo lava o le sami, o lo‘o fa‘apea mai:

“‘Ua lē fa‘atigā a‘u, ‘ua ‘ou le fānau mai,

‘ua ‘ou le tausia ni taulele‘a,

‘ua ‘ou le tausia fo‘i ni taupou.”

5E pei ‘ona tigā o i latou i le tala ‘iā Aikupito,

e fa‘apea ‘ona tigā tele o i latou i le tala ‘iā Turo.

6‘Inā ō atu ia i Tasesa,

‘inā uiō ia ‘outou o ē nonofo i le nu‘u tuloto.

7O la ‘outou ‘a‘ai ‘oli‘oli ‘ea lenei,

o lona amataga mai ona po anamua lava ia?

O ona lava vae e ‘avea mamao ai

o ia ‘ina ‘ia ‘aunu‘ua ai.

8O ai ‘ea ‘ua na pule lenei mea ‘iā Turo

lē ‘ua tufatufa paleali‘i?

O ona tagata fa‘atau‘oa o ali‘i sili i latou,

o ona tagata fa‘atau o ali‘i mamalu o le lalolagi i latou.

9O le ALI‘I o ‘au ‘ua ia pule ai,

‘ina ‘ia fa‘ai‘u vale le fa‘alialia

o mea matagofie uma

ma ia fa‘alēaogāina ali‘i mamalu uma o le lalolagi.

10‘Ia e ui atu i lou nu‘u e pei o le vaitafe,

le tama fafine a Tasesa e,

‘ua lē toe i ai se pupuni.

11‘Ua fa‘aloaloa lona ‘a‘ao i luga o le sami,

‘ua na fa‘agateteina mālō;

na fetalai le ALI‘I i Kanana

‘ia fa‘aumatia ona ‘olo.

12‘Ua fetalai mai o ia:

‘E te lē toe mitamita oe le taupou,

le tama fafine a Saitonu le ‘ua fa‘aleagaina;

‘inā tu ia i luga, ‘inā ō atu ia i Kitimo;

‘ae leai se filemū ‘iā te oe i lea mea.

13Fa‘auta i le nu‘u o Kaletaia; o le nu‘u lea sa leai, na fa‘atūina e Asuria mo ē sa nonofo i le vao; ‘ua latou fa‘atūina o latou ‘olo, ‘ua latou fa‘aumatia ona maota; ‘ua latou faia o ia ma faupuegafale ‘ua pa‘u‘ū.

14‘Inā uiō ia ‘outou va‘a o Tasesa,

auā ‘ua fa‘atafunaina lo ‘outou ‘olo.

15O lea aso fo‘i e galo ai Turo i tausaga e fitugafulu, e tusa ma aso o le tupu e tasi; a mavae tausaga e fitugafulu, ‘ona faia ai lea ‘iā Turo e peiseaī o le pese i le fafine talitane.

16Tago ia i le kitara,

‘inā fealua‘i solo ia i le ‘a‘ai,

o oe le fafine talitane ‘ua fa‘agaloina.

‘Ia e ta malie; ‘ia tele ni pese e lagi,

‘ina ‘ia manatua oe.

17A mavae fo‘i tausaga e fitugafulu e asiasi le ALI‘I ‘iā Turo; ‘ona toe fo‘i atu ai lea o ia i lona taui, ‘ona faita‘aga ai lea o ia ma mālō uma o le lalolagi, o ē o i le fogā‘ele‘ele.Fa‘aa 17.1-2

18A o ana mea e maua ‘atoa ma lona taui e fa‘asāina ia mo le ALI‘I; e le fa‘aputuina i mea e teu ai ‘oloa, e le teua fo‘i; auā o ana mea e maua e fai ia mā latou o ē nonofo i luma o le ALI‘I, ‘ina ‘ia ‘a‘ai ai ‘ia mā‘o‘ona, ia fai ai fo‘i ‘ofu matagofie.