1Le ALI‘I e,
‘ia e fa‘afofoga mai i lē amiotonu,
‘ia e liliu mai i la‘u ‘alaga;
‘ia e fa‘afofoga mai i la‘u tatalo e lē faia i laugutu ‘ole‘ole.
2‘Ia o‘o mai lo‘u fa‘amasinoga mai ou luma;
‘ia silasila mai ou fofoga i le amio sa‘o.
3‘Ua uma ‘ona e tofotofoina lo‘u loto; ‘ua e asiasia mai i le po;
‘ua uma ‘ona e su‘esu‘e mai ‘iā te a‘u,
a ‘ua leai se mea na e maua;
o lo‘u manatu e le agasala lo‘u gutu.
4A o mea e faia e tagata, o afioga mai lou fofoga
na ‘ou tausia ai a‘u ne‘i ui i ala o lē ‘ua sauā.
5‘Ia e tāofi a‘e lo‘u savali i ou ala,
‘ina ne‘i lē mau o‘u vae.
6Le Atua e,
‘ou te vala‘au atu ‘iā te oe;
auā ‘e te fa‘afofoga mai ‘iā te a‘u;
‘ia e liliu mai ou fofoga ‘iā te a‘u,
‘ia e fa‘afofoga mai i a‘u ‘upu.
7‘Ia ‘iloga mai lou alofa,
o oe le fa‘aola o ē fa‘atuatua ‘iā te oe
i ē tautete‘e i lou ‘a‘ao taumatau.
8‘Ia e leoleo mai ‘iā te a‘u e pei o le tamatama‘i mata;
‘ia e natia a‘u i le paolo o ou ‘apa‘au,
9i luma o ē amio leaga, o ē fa‘asauā mai ‘iā te a‘u,
o ē ita mai ‘iā te a‘u, o ē si‘osi‘o ‘iā te a‘u ‘ia a‘u oti.
10‘Ua puputa lava o latou tino;
o lo‘o tautalatala fa‘asausili o latou gutu.
11O lenei, ‘ua latou si‘osi‘omia i matou o matou o sāvavali;
‘ua va‘ai o latou mata ‘ua punou ifo i le ‘ele‘ele.
12E tusa ma le leona ‘ua naunau i le fia saei o manu,
po ‘ua fa‘apei o le leona ta‘anoa ‘ua nofo i mea lilo.
13Le ALI‘I e,
‘ia e tula‘i mai; ‘ia e muamua atu ‘iā te ia,
‘ia e lafo ‘iā te ia i lalo;
‘ia e lavea‘i mai ‘iā te a‘u i lau pelu a‘i tagata amio leaga.
14Le ALI‘I e,
‘ia e lavea‘i mai ‘iā te a‘u i lou ‘a‘ao a‘i tagata,
o tagata o le lalolagi, ‘ua i le ola nei lo latou tofi,
‘ua e fa‘amā‘o‘onaina i latou i au mea lelei;
‘ua malilie i latou i fānau;
o a latou mea fo‘i o totoe ‘ua tu‘u lava ia mā o latou tamaiti.
15A o a‘u, ‘ou te va‘ava‘ai i ou fofoga i le amiotonu;
‘ou te malie pe a a‘u ala ‘ua foliga ‘iā te oe.
Who We AreWhat We EelieveWhat We Do
2025 by iamachristian.org,Inc All rights reserved.
