Iopu 5 - Revised Samoan Catholic Bible

O isi ‘upu o le A‘oa‘iga a Elifasa ‘iā Iopu ma lana Apoapoa‘i ‘iā te Ia.

1“‘Inā vala‘au atu ia, pe ai se tasi e tali mai ‘iā te oe?

po o ai fo‘i so le ‘au pa‘ia ‘e te fa‘asaga i ai?

2O le ita e fasia ai le tagata valea,

o le matau‘a fo‘i e oti ai le vale.

3Na ‘ou iloa le tagata valea ‘ua sosolo ona a‘a;

a ‘ua ‘ou fa‘afanoloaina le mea na mau ai o ia.

4‘Ua mamao lana fānau i le olataga,

‘ua solia fo‘i i latou i le faitoto‘a,

‘ae leai sē na te lavea‘iina.

5‘Ua ‘aina lana saito e lē ‘ua fia ‘ai,

‘ua ‘avea ai fo‘i e ia a‘i mea matuitui,

‘ua naunau atu le malaia i o latou ‘oloa.

6Auā e lē alu a‘e mai le ‘ele‘ele le malaia,

e le tupu mai fo‘i mai le lau‘ele‘ele le tigā.

7A ‘ua fānau mai le tagata ‘ia tigāina,

e pei ‘ona lele a‘e o aloiafi.

8“‘Ae peita‘i a‘u, ‘ou te sā‘ili atu i le Atua,

‘ou te tu‘uina atu la‘u mea i le Atua.

9O lē ‘ua faia mea tetele e lē masu‘esu‘eina,

o vāvega e lē mafaitaulia.

10O lē ‘ua foa‘iina mai le timu i le lau‘ele‘ele,

o lē ‘ua tu‘uina mai fo‘i o vai i le vao.

11E ‘ava‘e i le mea maualuga o ē ‘ua maulalo;

e fa‘aeaina fo‘i o ē ‘ua fa‘anoanoa ‘ia saogalemū ai.

12‘Ua fa‘alēaogāina e ia o mafaufauga o ē fai togafiti,

‘ona lē fai ai lea i o latou lima mea ‘ua latou manatu i ai.

13E maua e ia o ē popoto ‘iā latou lava togafitiga,

e fa‘alēaogāina fo‘i le pule a ē fa‘a‘ole‘ole.

14‘Ua oso atu i latou i le pouliuli a o ao,

latou te tautago fo‘i i le aoauli e peiseaī o le po.

15‘Ae fa‘aolaina e ia o ē matitiva a‘i le pelu o latou gutu

ma le lima o lē ‘ua malosi.

16O le mea lea ‘ua fai ai le fa‘amoemoe o lē ‘ua vaivai,

‘ae punitia le gutu o lē amio leaga.

17“Fa‘auta mai, ‘amu‘ia le tagata ‘ua a‘oa‘iina e le Atua;

o le mea lea ‘aua ‘e te ta‘ufa‘atauva‘aina

le a‘oa‘iga a Lē e ona le malosi uma lava.

18Auā o ia na te fa‘atigāina, o ia fo‘i na te fusia;

o ia e manu‘a ai, o ona ‘a‘ao fo‘i e fofō ai.

19E lavea‘i mai o ia ‘iā te oe i puapuagā e ono,

o lona fitu lava e lē papa‘i atu ai se leaga ‘iā te oe.

20Na te lavea‘iina oe i le oge ‘ia lē oti ai,

na te lavea‘iina fo‘i oe i le pelu i le tau‘a.

21‘E te lilo ai oe i le sasa a le laulaufaiva,

‘e te lē fefe fo‘i i le fa‘atafunaina pe a o‘o mai.

22‘E te ‘ata i le fa‘atafunaina ma le oge,

‘e te lē mata‘u fo‘i i manu fe‘ai.

23Auā e fai sa ‘outou feagaiga,

o oe ma ma‘a o le ‘ele‘ele;

tou te lelei fo‘i ma manu fe‘ai.

24‘E te iloa fo‘i, ‘ua saogalemū lou fale ‘ie;

‘e te asiasi lava i lou fale, a ‘e te lē agasala.

25‘E te iloa fo‘i e to‘atele lau fānau,

e tusa fo‘i o ē ‘ua tutupu ‘iā te oe ma le vao iti o le lau‘ele‘ele.

26‘E te o‘o i le tu‘ugamau o ē toeaina lava,

e pei ‘ona alu a‘e o le fa‘aputuga saito i lona tau.

27Fa‘auta, ‘ua matou su‘esu‘eina lenei mea, o lo‘o fa‘apea lava ia;

‘inā e fa‘afogafoga mai i ai ma ‘ia e silafia ai.”