Sirako 34 - Revised Samoan Catholic Bible

‘Ia Fa‘alagolago tasi i le Atua ma ‘ia Amiotonu i ona Luma

1O le tagata valea ‘ua ‘a‘apa atu i le fa‘amoemoe fa‘avalea ma le pepelo;

a o miti e o‘otia ai loto o ē ‘ua leai se mafaufau.

2O lē to‘aga i miti pepelo,

‘ua pei o sē ‘a‘apa atu i le ata ma ‘ua tuliloa i le matagi.

3O le mea lea ma le mea lea, o mea ia e va‘aia i le miti;

‘ua pei o le ata o le tagata i luma o ona mata.

4Se ā se mea mamā e maua mai i se mea ‘ele‘elea?

Se ā se mea moni e fa‘aalia mai e le mea pepelo?

5O le mea noa lava le ‘i‘ite i mea sesē,

le taumate i le pepelo ma le miti fa‘aleaga.

6E o‘otia ai lava lou loto i mea fatufua,

e pei o le loto o le fafine ‘ua fa‘atigā;

‘aua lava le to‘aga i ai lou loto,

vaganā ‘ua ‘auina mai e le Silisili‘ese i sana asiasiga.

7Auā ‘ua fa‘asesēina ni isi e to‘atele ‘iā latou miti,

‘ua palasi leaga o ē sa fa‘alagolago i ai.

8A o ‘upu o le tulafono e taunu‘u lava e aunoa ma se pepelo,

e malamalama fo‘i le poto mai laugutu o lē fa‘atuatua.

9A se tasi e le‘i tofotofoina, se ā se mea ‘ua na iloa?

O lē ‘ua o‘o ‘iā te ia mea e tele, e tele ai ona manatu;

a o lē ‘ua a‘oa‘oina o ia i mea e tele, e fai ana ‘upu ma le mafaufau.

10‘Ai se tasi e le‘i tofotofoina, e itiiti nai mea ‘ua na iloa;

a o lē ‘ua o‘o ‘iā te ia mea e tele, ‘ua fa‘ateleina fo‘i lona atamai.

11‘Ai se tasi e le‘i fa‘aosoosoina, ni a ni mea ‘ua na iloa?

A o lē na ‘ole‘olegia o ia, e tele ai lona poto.

12E tele ni mea na ‘ou iloa atu i a‘u malaga ma ni masaniga i faiga ‘ese‘ese e tele.

13O nisi aso na fanū a ‘ou oti lava ‘ona o mea ia;

a ‘ua lavea‘iina a‘u i le alofa o le Atua.

O le Fa‘alagolago i le Ali‘i

14E tausia lava e le Atua o agaga o ē matata‘u ‘iā te ia,

e fa‘amanuiaina i latou i lana silafaga.

15Auā o lo latou fa‘alagolago i lē na te fa‘aola ‘iā i latou,

a o fofoga o le Atua ‘ua ‘iā i latou e alolofa ‘iā te ia.

16O lē mata‘u i le Ali‘i, e lē tetemū lava ia,

e lē fefe fo‘i, auā o le Atua o lona fa‘alagolagoga.

17‘Amu‘ia le agaga o lē mata‘u i le Ali‘i.

18Po o ai e tepa atu i ai o ia, po o ai lona malosi?

19O fofoga o le Ali‘i ‘ua i luga o ē matata‘u ‘iā te ia;

o ia o le ‘olo malosi, le fa‘alagolago mautū,

le mālū i le vevela, le paolo i le mutinitini o le lā.

20O ia e leoleo ‘ina ne‘i tatou tautevateva,

e fesoasoani mai pe a tatou pa‘u‘ū;

na te fa‘aea le agaga ma fa‘amalamalama o tatou mata;

na te foa‘i mai le mālōlōina ma le ola ma le fa‘amanuiaga.

O Taulaga

21‘Ua ‘ele‘elea le mea alofa a lē faitaulaga i mea gaoia;

e lē fiafia le Atua i tauemuga a tagata amio leaga.

22‘Ua na o i latou e fa‘atalitali ‘iā te ia i ala o le fa‘amaoni ma le amiotonu, e afio i ai le Ali‘i.

23E lē finagalo malie le Silisili‘ese i mea alofa a tagata amio leaga,

e lē silasila ifo o ia i taulaga a ē agasala,

e lē fa‘amāgaloina fo‘i a latou agasala i le tele o a latou taulaga.

24O lē momoli se taulaga a‘i mea a le tagata mativa,

‘ua pei o lē na te fasiotia se tama i luma o lona lava tamā.

25O le mea e ‘ai a ē puapuagātia, o le ola lea o ē matitiva;

a o le tagata totolima lava lē na te faoa.

26O lē na te faoa le mea e ‘ai e maua i le afu o le muaulu,

‘ua pei o lē na te fasioti i lē la te tuā‘oi.

27O lē ‘ua na fa‘amaligi le toto, ma lē ‘ua na tāofia le totogi o le ‘au‘auna tauia, o le uso lava i lā‘ua.

28E ati a‘e e le tasi, e lepetia e le tasi,

se ā se aogā ‘iā i lā‘ua? Na o le tigāina lava.

29E talosia e le tasi, e fetu‘uina e le tasi,

po o ai o lā‘ua e fa‘afofogaina le Atua?

30‘Ai sē pa‘i atu i le tino o le tagata oti,

‘ona fa‘amamā lea o ia ‘iā te ia,

‘ae toe pa‘i atu fo‘i i ai, se ā se aogā o lona fa‘amamāina?

31E fa‘apea le tagata na te anapogi ‘ona o ana agasala,

‘ona ia toe faia lea o agasala lava ia,

se ā se aogā ‘iā te ia o lona anapogi?

O ai fo‘i na te talia lana talosaga?