1 Samuelu 27 - Revised Samoan Catholic Bible

‘Ua Sola Tavita i Kata. ‘Ua Tu‘uina atu Sekeleka ‘iā te Ia

1‘Ua fai ifo Tavita i lona loto, “E i‘u ‘ina ‘ou oti i se aso i le lima o Saulo; e leai se mea e lelei ‘iā te a‘u nā ‘ona ‘ou matuā sola i le nu‘u o Filisitia; ‘ona tu‘ua lea o a‘u e Saulo, e lē toe sā‘ili ‘iā te a‘u i nu‘u uma o Isaraelu, ‘ona ‘ou sao ai lea i lona lima.”

2‘Ona tula‘i lea o Tavita, ‘ua alu atu o ia ‘atoa ma tagata e to‘aono selau sa ‘iā te ia, ‘iā Akisa le atali‘i o Maoka, le tupu o Kata.1 Samu 21.10; 23.13; 2 Samu 15.18; 1 Tu 2.39

3‘Ua nonofo Tavita ma Akisa i Kata o ia ma ona tagata, ta‘itasi ma lona ‘āiga; o Tavita fo‘i ma ana avā e to‘alua, o Ainoama le Isereelu, ma Apikaila le avā a Napalu le Karamelu.

4‘Ua ta‘uina atu ‘iā Saulo, ‘ua sola Tavita i Kata, ‘ona lē toe sā‘ili lea o ia ‘iā te ia.

5‘Ua fai atu Tavita ‘iā Akisa, “‘Āfai ‘ua alofagia a‘u e oe, ‘ia tu‘u mai se mea ‘ou te nofo ai i se faoa ‘a‘ai, ‘ona ‘ou nofo lea i lea mea; se a le mea e nofo ai lau ‘au‘auna i le ‘a‘ai o le tupu fa‘atasi ma oe?”

6‘Ona tu‘u atu lea e Akisa ‘iā te ia i lea lava aso o Sekeleka; o le mea lea ‘ua fai ai Sekeleka mo tupu o Iuta, ‘ua o‘o i lenei aso.Iosu 15.31; 1 Samu 30.1

7O ona aso ‘atoa sa nofo ai Tavita i le nu‘u o Filisitia, o le tausaga ma masina e fa.

8‘Ua ō a‘e Tavita ma ona tagata, ‘ua latou osofia Kasuri, ma Kasera, ma Amaleka; auā o i latou nei sa nonofo i le nu‘u mai le vavau, i le mea e alu atu ai i Sura, e o‘o atu i le nu‘u o Aikupito.Eso 15.22; Iosu 13.2; 1 Samu 15.7-8

9‘Ua fasi e Tavita le nu‘u, ‘ua lē fa‘aola se tane po o se fafine, ‘ua ia ‘aumai fo‘i o mamoe, ma povi, ma asini, ma kamela, ma ‘ofu; ‘ona fo‘i mai lea o ia, ‘ua alu ‘iā Akisa.

10‘Ua fai mai Akisa, “Po o fea nu‘u na ‘outou osofia i le asō?”

‘Ua fai atu Tavita, “O le itū i saute o sa Iutā,” po o “le itū i saute o sa Ieramaelū,” po o “le itū i saute o sa Kenī.”Fa‘ama 1.16; 4.11; 1 Samu 15.6; 23.27; 30.29; 1 Samu 15.6; 23.27; 30.29; 2 No 2.9

11‘Ua lē fa‘aola e Tavita se tane po o se fafine e sau i Kata, o lo‘o fa‘apea ane, “Ne‘i ta‘ua i tatou e i latou, e fa‘apea, ‘o lo‘o fa‘apea ‘ona fai e Tavita;’” o le a fa‘apea fo‘i lana amio i aso uma e nofo ai o ia i le nu‘u o Filisitia.

12‘Ua talia e Akisa le tala a Tavita, ‘ua fa‘apea ane o ia, “‘Ua matuā ‘inosia o ia ‘iā te ia e lona nu‘u o Isaraelu; o lea e fai ai o ia ma ‘au‘auna ‘iā te a‘u e fa‘avavau.”