Iopu 29 - Revised Samoan Catholic Bible

O ‘Upu a IopuIopu

1‘Ua sauni atu pea fo‘i e Iopu lana lauga, ‘ua fa‘apea atu,

2“E! tā fia fa‘apei o masina ‘ua mavae;

e pei o aso na tausi mai ai le Atua ‘iā te a‘u;

3‘ina o pupula mai lona lamepa, i luga a‘e o lo‘u ulu,

ma ‘ua ‘ou mafaia ‘ona savali i le pouliuli ‘ona o lona malamalama;

4e pei ‘ona i ai o a‘u i ona po o lo‘u malosi,

‘ina o ma fa‘auō ma le Atua i lo‘u fale ‘ie;

5‘ina o fa‘atasi ma a‘u Lē e ona le malosi uma lava,

ma ‘ua vagaia a‘u e la‘u fānau.

6‘Ina o mulumuluina o‘u vae i le suāsusu;

na liligi mai fo‘i e le papa tafe suāu‘u mo a‘u.

7‘Ina ‘ou ui ane i le ‘a‘ai i lo‘u alu atu i le faitoto‘a,

ma ‘ou sauni lo‘u nofoa i le malae.

8Na iloa mai a‘u e taulele‘a ma latou ‘alo‘alo ‘ese ai;

na tula‘i fo‘i toeaina, ‘ua latou laulaututū.

9Na fa‘alologo ali‘i sili,

ma tu‘u o latou lima i o latou fofoga.

10Na fa‘alologo ai si‘ufofoga o ali‘i;

na pipi‘i a‘e fo‘i o latou laulaufaiva i o latou gutu.

11Na fa‘alogo mai taliga, ‘ona fa‘a‘amu‘ia mai ai lea ‘iā te a‘u;

na iloa mai e mata, ‘ona vivi‘i mai ai lea ‘iā te a‘u.

12Auā na ‘ou lavea‘iina lē ‘ua puapuagāina, ‘ina ‘ua vala‘au mai o ia,

ma lē ‘ua aumatuā, ‘atoa ma lē ‘ua leai sona fesoasoani.

13Na o‘o mai ‘iā te a‘u le fa‘amanū o lē na fai a fano;

o a‘u fo‘i na pese fiafia ai le loto o le fafine ‘ua oti lana tane.

14Na fai le amiotonu mo‘u ‘ofu ma ‘ou ‘ofu ai;

na fai la‘u fa‘amasinoga e peiseaī o se ‘ofu talaloa ma se pulou.

15Na fai a‘u ma mata o le tauaso,

na fai o‘u vae ma vae o le pipili.

16Na fai a‘u ma tamā o ē ‘ua matitiva;

na ‘ou su‘esu‘eina fo‘i le finauga sa ‘ou lē iloa.

17Na ‘ou gagauina gao o lē amio leaga,

ma ‘ou se‘ia mai ona nifo le mea na faoa.

18Na ‘ou fa‘apea fo‘i,

‘‘Ou te oti i lo‘u ōfaga, e fa‘ateleina fo‘i o‘u aso e pei o le oneone.

19Na sosolo atu o‘u a‘a i le vai,

na susū fo‘i o‘u lau i le sau o le po.

20Sa fou lo‘u mamalu ‘iā te a‘u,

ma la‘u ‘aufana sa fa‘afouina pea i lo‘u lima.’

21“Sa fa‘alogologo mai tagata ‘iā te a‘u,

ma fa‘atalitali mai,

sa latou lē tautala ‘ina ‘ua fai la‘u pule.

22E le‘i toe fai mai i latou ‘ina ‘ua mavae atu la‘u ‘upu;

sa mālie lava la‘u lauga ‘iā te i latou.

23Sa latou fa‘atalitali mai ‘iā te a‘u e pei ‘ona fa‘atalitali i le timu;

sa latou fa‘amaga o latou gutu e pei ‘ona fa‘amaga i le timuga mulimuli.

24A ‘ou ‘ata‘ata ‘iā te i latou,

latou te le‘i tāofi i ai;

latou te le‘i fa‘ate‘aina fo‘i o‘u mata fiafia.

25Sa ‘ou filifilia lo latou ala;

sa ‘ou nofo atu fo‘i o le sili ‘iā te i latou;

ma ‘ou nofo e pei o se tupu i ana ‘au,

e fa‘apei o lē na te fa‘amatalaloto i ē o fa‘anoanoa.