Salāmo 118 - Revised Samoan Catholic Bible

E Tumau le Alofa o le ALI‘I; e Lelei ‘ona Fa‘atuatua ‘iā te Ia; o le Valo‘aga i le Mesia

1Vivi‘i atu ia ‘outou i le ALI‘I auā e lelei o ia

auā e fa‘avavau lava lona alofa.

2‘Ia fa‘apea atu lava Isaraelu,

“E fa‘avavau lava lona alofa.”

3‘Ia fa‘apea atu lava le ‘āiga o Arona,

“E fa‘avavau lava lona alofa.”

4‘Ia fa‘apea atu lava i latou o ē matata‘u i le ALI‘I,

“E fa‘avavau lava lona alofa.”

5Na ‘ou vala‘au atu i le ALI‘I i lo‘u puapuagā;

na tali mai le ALI‘I ‘iā te a‘u, ma na ‘aumaia a‘u i le mea lautele.

6O lo‘o ‘iā te a‘u le ALI‘I; ‘ou te lē fefe;

se a se mea e faia e tagata ‘iā te a‘u.

7O lo‘o ‘iā te a‘u le ALI‘I e fa‘atasi ma i latou ‘ua fesoasoani mai ‘iā te a‘u;

a o a‘u nei, ‘ou te iloa atu le taui o ē ‘ua ‘ino‘ino mai ‘iā te a‘u.

8O lē fa‘atuatua i le ALI‘I,

e sili lea i le fa‘alagolago i tagata.

9O le fa‘atuatua i le ALI‘I,

e sili lea i le fa‘alagolago i ali‘i.

10‘Ua si‘osi‘o mai nu‘u ‘ese uma ‘iā te a‘u;

o le suafa o le ALI‘I ‘ou te fa‘aumatia ai i latou.

11‘Ua latou si‘osi‘o mai ‘iā te a‘u, ‘ua si‘osi‘o mai lava ‘iā te a‘u;

o le suafa o le ALI‘I ‘ou te fa‘aumatia ai i latou.

12Na latou si‘osi‘o mai ‘iā te a‘u fa‘apei o lagomeli;

e tineia i latou pei o le afi la‘au talatala;

o le suafa o le ALI‘I ‘ou te fa‘aumatia ai i latou.

13Na e tulei tele mai ‘iā te a‘u, ‘ina ‘ia ‘ou pa‘ū;

a ‘ua fesoasoani mai le ALI‘I ‘iā te a‘u.

14O le ALI‘I, o lo‘u malosi o ia ma la‘u pese,

‘ua ‘avea fo‘i o ia mo‘u fa‘aolataga.

15O leo o le ‘alaga fiafia ma le olataga,

o i ai ia i fale ‘ie o ē amiotonu.

“‘Ua se toa le ‘a‘ao taumatau o le ALI‘I.

16‘Ua maualuga le ‘a‘ao taumatau o le ALI‘I;

‘ua se toa le ‘a‘ao taumatau o le ALI‘I.”

17‘Ou te lē oti, ‘ou te ola lava,

ma ‘ou ta‘uta‘u atu mea na faia e le ALI‘I.

18Na matuā a‘oa‘i mai le ALI‘I ‘iā te a‘u;

a ‘ua na lē tu‘uina a‘u i le oti.

19To mai ia ‘iā te a‘u o faitoto‘a o le amiotonu;

‘ou te ulufale atu i ai, ma ou vivi‘i atu i le ALI‘I.

20O le faitoto‘a lenei o le ALI‘I,

e ulu atu ai ē ‘ua amiotonu.

21‘Ou te vivi‘i atu ‘iā te oe; auā na e tali mai ‘iā te a‘u,

‘ua ‘avea fo‘i oe mo‘u fa‘aolataga.

22O le ma‘a na lafoa‘iina e tufuga fai fale,

‘ua fai lea ma ma‘a tulimanu aupitoaluga.

23O le mea lea ‘ua faia e le ALI‘I;

o le mea tatou te ofo ai pe a va‘ai i ai.

24O le aso lenei ‘ua faia e le ALI‘I;

‘ia tatou ‘oli‘oli ma fiafia i ai.

25Le ALI‘I e,

‘ou te ‘ai‘oi atu ‘ia e fa‘aola mai lava;

‘ou te ‘ai‘oi atu, le ALI‘I e,

‘ia e fa‘amanuia mai lava.

26‘Ia manuia lē o maliu mai i le suafa o le ALI‘I;

matou te fa‘amanuia atu ‘iā te ‘outou a‘i le fale o le ALI‘I.

27O le Atua o le ALI‘I lea,

‘ua na fa‘amalamalama mai ‘iā te i tatou;

‘inā noanoa ia i maea le taulaga,

‘ia o‘o i nifo o le fatafaitaulaga.

28O oe lava lo‘u Atua, ‘ou te vivi‘i atu ‘iā te oe;

o oe lava lo‘u Atua, ‘ou te fa‘ane‘ene‘e atu ‘iā te oe.

29Vivi‘i atu ia ‘outou i le ALI‘I, auā e lelei o ia;

auā e fa‘avavau lava lona alofa.