1‘Ua o‘o i le taeao, ‘ona poloa‘i atu lea o Holofene i ana ‘au ‘ia latou ō a‘e i Paitulia.
2Sa i ai o tagata tau e sāvavali e selau ma le luafulu o afe, a o ē ti‘eti‘e i solofanua e luafulu ma le lua o afe, ‘ae lē taulia o tagata tau na ‘avea fa‘atagataotau‘a ‘atoa ma taulele‘a uma na ‘aumai e ia a‘i itūmālō ‘ese‘ese.
3Na latou sauniuni fa‘atasi uma i le tau‘a ma le fānauga a Isaraelu ma ‘ua latou sāvavali i le malifa o le mauga e o‘o i le tumutumu o mauga e i luga tonu o Totana, ‘ua tolauapi ai e āfua i le mea e igoa ‘iā Pelaima e o‘o atu i Kuamona, e fesagai lea ma Eserelona.
4A o le fānauga a Isaraelu ‘ua latou iloa atu le to‘atele anoanoa‘i o le ‘au, ‘ona latou pa‘u‘ū faō ai lea i le ‘ele‘ele, ‘ua latou lulu‘u le lefulefu i luga i o latou ulu, o tatalo ma le lotogatasi ‘ia fa‘aali e le Atua o Isaraelu lona agaalofa i lona lava nu‘u.
5‘Ona tago lea o i latou i o latou ‘au‘upega o le tau‘a ma ‘ua latou nonofo i mea sa mafai ai ‘ona ui atu ai i le vā o mauga i ni ala vāapiapi ma ‘ua latou leoleo i ai i le ao ‘atoa ma le po.
6O lenei, na maua e Holofene, i lona fa‘ata‘ali‘oli‘o i le ‘a‘ai, o le tasi vaipuna ituapā o le ‘a‘ai, i le itū i saute, sa ta‘ita‘iina ai o vai i le ‘a‘ai i le alāvai; ‘ona ia poloa‘i lea ‘ia tu‘ia lo latou alāvai.
7‘Ae sa i ai nai vaipuna e felāta‘i ma le ‘aupā, sa asu fa‘alilolilo ai lo latou vai, peiseaī ‘ua fia fa‘amāui ai, ‘ae lē malie ai lava lo latou fiainu.
8A o le fānauga a Amona ma Moapi ‘ua latou ō atu ‘iā Holofene, o fai atu: E lē o le tao po o le ū fanafana e fa‘alagolago i ai le fānauga a Isaraelu, a ‘ua puipuia i latou i mauga, ‘ua fai mo latou ‘olo mea maupu‘epu‘e ‘ia e ifo i vanu.
9O lenei, a e fia fa‘ato‘ilalo ‘iā te i latou e aunoa ma se tau‘a, ‘ia e tofia o ē leoleo i vaipuna, ‘ina ‘ia lē asu vai ai i latou, ‘ona e fasia lea i latou e aunoa ma se pelu; e fa‘avaivai ai lava i latou ma tu‘uina mai lo latou ‘a‘ai, sa manatu i latou e lē mafai ‘ona ā‘ea ‘ina ‘ua tu i le atumauga.
10‘Ua lelei fo‘i ia ‘upu i le manatu o Holofene ma le manatu o ana fa‘afeao ma ‘ua na tofia le ta‘ita‘i o le to‘aselau i vaipuna ta‘itasi i lea itū ma le itū o le ‘a‘ai.
11‘Ua mavae atu le luafulu o aso o lenā leoleoga, ‘ona uma ai lea o vai‘eli ma vai i fa‘atanoa ‘iā i latou uma e nonofo i Paitulia, ‘ua leai lava i le ‘a‘ai se vai e mā‘o‘ona ai, e o‘o lava i se aso e tasi, auā sa fa‘asoa fa‘atatau le vai i tagata uma i aso ta‘itasi.
12‘Ona fa‘apotopotoina uma ai lea i luma o Usia o tane ma fafine, o taulele‘a ma tamaiti ma ‘ua fa‘atasi i latou ma le leo e tasi,
13o fai atu: ‘Ia fa‘amasino mai le Atua ‘iā te i matou ma oe, auā ‘ua e fa‘aleagaina i matou ‘ona ‘ua e musu i tautala filemū i tagata o Asuria; o le mea fo‘i lea na fa‘atama‘ia ai i tatou e le Atua i o latou lima.
14O lea fo‘i ‘ua leai se fesoasoani mai, a o ta‘atitia i tatou i o latou luma i le gālala ma le matuā fa‘aumatia.
15O lenei, ‘inā ‘outou fa‘apotopotoina ia o i latou uma o i le ‘a‘ai, ‘ina ‘ia tatou ifo uma lava ma le loto malie i le nu‘u o Holofene.
16Auā e lelei pe a ‘avea i tatou fa‘atagataotau‘a ma tatou fa‘amanū atu ai i le Atua i le ola, ‘ae leaga pe a oti i tatou, i le ‘avea ma luma i tagata uma, o va‘ava‘ai atu i le oti o a tatou avā ma a tatou fānau i o tatou luma.
17‘Ia fai ma matou molimau i le aso nei le lagi ma le lalolagi, ‘atoa ma le Atua o tatou tamā, ‘ua na fa‘asalaina i tatou e tusa ma a tatou agasala, ‘ia ‘outou tu‘u atu nei le ‘a‘ai i lima o le ‘au a Holofene, ma ‘ia vave fa‘aumatia ai o i tatou i le pelu, e fa‘aumiumi na‘uā le fa‘aumatia i le naumati ma le fia inu.
18‘Ua uma ‘upu ia, ‘ona matuā fētāgisi lea ma tagitu‘i o tagata uma o le potopotoga ma ‘ua latou ‘alalaga atu i le Atua ma le leo e tasi, i ni itūlā e tele o fa‘apea atu:
19‘Ua agasala i matou ‘atoa fo‘i ma o matou tamā, ‘ua amioletonu i matou, ‘ua matou faia le amio leaga.
20A o oe, ‘ona o lou agaalofa, ‘ia e alofa mai ‘iā te i matou, pe sasa fo‘i e oe ‘iā i matou e taui ma sui a‘i ‘iā matou amio leaga; ‘ae ‘aua ‘e te tu‘u atu o ē fa‘alagolago ‘iā te oe i le nu‘u ‘ua na lē iloa oe,
21ne‘i fa‘apea ane a nu‘u ‘ese: O ifea o i ai lo latou Atua?
22A ‘ua lē toe lavā i latou i tagitu‘i, ‘ua lailoa i fētāgisi, ma ‘ua latou fa‘alologo.
23‘Ona tula‘i lea o Usia, o liligi ona loimata ma ‘ua fai atu: ‘Ia ‘outou fīfīlemū, le ‘au uso e, ma tatou fa‘atalitali i nei aso e lima i le agaalofa o le Ali‘i.
24Auā ‘anei e fa‘agata e ia lona to‘atama‘i ma fa‘amamalu i lona suafa.
25‘Ae ‘āfai e mavae atu aso e lima ma ‘ua lē maua ai se fesoasoani, ‘ona tatou faia ai lea o mea ia na ‘outou fai mai ai.
Who We AreWhat We EelieveWhat We Do
2025 by iamachristian.org,Inc All rights reserved.
