Iopu 39 - Revised Samoan Catholic Bible

O isi Afioga a le Atua ‘iā Iopu

1“‘Ua e iloa ‘ea ona po e fānau ai le ‘oti o le vao o i mato?

E lē tausia ‘ea ‘aila pe a fānanau i latou?

2‘E te mafaia ‘ea ‘ona faitauina le ‘ato‘atoa o masina o a latou tō?

Po o ‘ua e iloa ona po e fānanau ai i latou?

3Latou te to‘otuli, latou te fānanau mai a latou tama,

latou te fa‘ate‘aina o latou tigā.

4E malolosi a latou tama, e tutupu i latou i le vao;

e ō ‘ese atu i latou, ‘ae lē toe fo‘i mai ‘iā te i latou.

5“O ai ‘ea ‘ua ‘auina atu le asini o le vao ‘ia sa‘oloto?

O ai ‘ea ‘ua tatalaina mea e noata‘i i le asini o le vao?

6O lē ‘ua ‘ou tu‘uina atu i ai le nu‘u naumati mōna fale,

ma le vao lafulafuā ma mea e tata‘a ai?

7Na te ‘ata i le pisapisaō o le ‘a‘ai;

na te lē fa‘alogo i le ‘alaga o le ta‘ita‘i asini.

8O le mea ‘ua maua i mauga o lana mea e ‘ai lea,

‘ua ia sā‘ili‘ili atu fo‘i i la‘au iti lauolaola uma.

9“E mafai ‘ea le rema ‘ona ‘au‘auna ‘iā te oe?

pe moe i le po i lou fale povi?

10‘E te mafai ‘ea ‘ona nonoa o le rema i le atu puē i sona maea?

pe mulimuli o ia ‘iā te oe e fa‘amalūlūina ai vanu?

11‘E te fa‘atuatua ‘ea ‘iā te ia ‘ina ‘ua tele lona malosi?

pe ‘e te tu‘uina atu ‘iā te ia lau galuega?

12‘E te manatu i ai ‘ea na te ‘aumaia ‘au saito,

ma fa‘aputuina i lau mea e sasa ai saito?

13“E sausau ‘apa‘au o le renani,

o le ‘apa‘au ‘ea ma fulufulu o le kasita?

14Na te tu‘u ana fua i le ‘ele‘ele,

ma ‘ua fa‘amafanafanaina ai i le efuefu.

15A ‘ua galo ‘iā te ia pe solia e se vae,

pe solipalaina e se manu fe‘ai.

16‘Ua agavale ia i ana tama, e peiseaī e le ni ana;

‘ua fai fua lana galuega e leai sona atuatuvale.

17Auā ‘ua lē tu‘uina atu e le Atua le poto ‘iā te ia;

‘ua ia le tufa atu i ai fo‘i le mafaufau.

18Pe a ‘apatā a‘e i luga ona ‘apa‘au,

‘ua ‘ata o ia i le solofanua ma lē o ti‘eti‘e i ai.

19“Na e avatua ‘ea i le solofanua le malosi?

‘Ua e fa‘a‘ofu ‘ea i lona ua i fulufulu maveve?

20‘Ua e mafai ‘ea ‘ona fa‘aosooso ‘iā te ia e pei o le sē akerise?

E ma‘eu le mata‘utia o lona fa‘afogifogi.

21‘Ua ‘eli lava ia i le vanu, ‘ua fiafia fo‘i i le malosi;

‘ua alu atu e fa‘afetaia‘i i le ‘au‘upega.

22E ‘ata o ia i le fefe, e lē mata‘u lava o ia;

e lē liliu ‘ese fo‘i i le pelu.

23‘Ua ta‘alili i ai le utu e tu‘u ai u,

le tao pupula, ma le tao.

24O le ta‘alili ma le feosofa‘i, na ia folo ai le ‘ele‘ele;

e lē toetū filemū pe a lagona le leo o le pū.

25A ilia le pū, ‘ua ia fai ane, ‘Ue!’ ‘ua lagona mamao atu fo‘i le tau‘a,

ma le pisapisaō o ē ta‘ita‘i ‘au ma le ‘alalaga.

26“O le atamai ‘ea mai ‘iā te oe, e lele ai le nesa,

ma fālō atu ai ona ‘apa‘au i le itū i saute?

27O lau ‘upu ‘ea e lele maualuga ai le aeto,

ma fai ai lona ōfaga i le mea maualuga?

28E nofo o ia ma mau pea i le mato,

i luga o le tumutumu o le mato, ma le tumutumu o le mauga.

29‘Ua ia va‘ava‘ai atu mai lea mea i le mea e ‘ai,

‘ua va‘ai mamao atu ai ona mata.

30E inu lava e ana tama le toto;

o le mea fo‘i e i ai le fasi, o i ai lava ia.”