Amosa 3 - Revised Samoan Catholic Bible

O le To‘asā o le Atua ma Mea na Ala mai Ai

1Le fānauga a Isaraelu e, ‘ia ‘outou fa‘alogologo mai i lenei ‘upu, o lo‘o fetalai mai ai le ALI‘I ‘iā te ‘outou, ‘atoa ma le ‘āiga uma na ‘ou ‘aveina a‘e a‘i le nu‘u o Aikupito; o lo‘o fa‘apea mai:

2‘Ua na o ‘outou lava ‘ua ‘ou iloa i ‘āiga uma o le lalolagi; o le mea lea ‘ou te fa‘asalaina ai ‘outou ‘ona o a ‘outou agasala uma.O le Galuega a le Perofeta

3E feoa‘i fa‘atasi ‘ea se to‘alua pe a le loto gatasi i lā‘ua?

4E tagi ‘ea le leona i le vao, pe a leai se mea ‘ua na saeia?

E lagona atu ‘ea le leo o le tama‘i leona a‘i lona lua, pe ‘āfai ‘ua na lē maua se mea?

5E lavea ‘ea le manulele i le mailei i le lau‘ele‘ele, a ‘ua leai se mailei mo ia?

E ‘ava‘e ‘ea le mailei a‘i le lau‘ele‘ele, a ‘ua lē maua se mea.

6E ilia ‘ea le pū i le ‘a‘ai, ‘ae lē atuatuvale ai tagata?

E tupu ‘ea se malaia i le ‘a‘ai, ‘ae lē faia e le ALI‘I?

7E lē faia lava se mea e le Ali‘i le ATUA, ‘ae fa‘aalia lona finagalo i ana ‘au‘auna o perofeta.

8‘Ua tagi le leona, po o ai se le fefe?

‘Ua fetalai mai le Ali‘i le ATUA, po o ai sē le vavalo?

Samaria

9‘Ia ‘outou tala‘iina atu i maota o Asetota ma maota i le nu‘u o Aikupito ma ‘ia ‘outou fa‘apea atu, “‘Ia ‘outou fa‘apotopoto mai i mauga o Samaria, ‘inā va‘ava‘ai atu ai i vāvāō tetele o i ai, ‘atoa ma sauāga o i ai.”

10Auā o lo‘o fetalai mai le ALI‘I: Latou te lē iloa ‘ona fai mea tonu, o ē fa‘aputu i o latou maota o mea e maua i le sauā ma le vete.

11O le mea lea o lo‘o fa‘apea mai ai le Ali‘i le ATUA, o lē ‘ua ita mai e fealua‘i o ia i le nu‘u; e ‘ave‘esea fo‘i e ia lou malosi a‘i ‘iā te oe, e vetea ou maota.

12O lo‘o fa‘apea mai le ALI‘I: Fa‘apei ‘ona fao e le leoleo mamoe o ‘alaga e lua, po o se fasi taliga i le gutu o le leona, e fa‘apea ‘ona lavea‘iina o le fānauga a Isaraelu o ē nonofo i Samaria, i le pito moega ma Tamaseko fo‘i i le moega.Eso 22.13

13‘Ia ‘outou fa‘alogologo ma fa‘ailoa atu i le ‘āiga o Iakopo, o lo‘o fa‘apea mai le Ali‘i le ATUA, o le Atua o ‘au.Sala 50.7

14O le aso ‘ou te taui atu ai agasala a Isaraelu ‘iā te ia, ‘ou te asiasi fo‘i i fatafaitaulaga i Peteli; e vavae‘eseina fo‘i nifo o fatafaitaulaga, ‘ona pa‘u‘ū ai lea i le ‘ele‘ele.2 Tu 23.15

15‘Ou te taia le fale o le tausaga ma‘alili, ‘atoa ma le fale o le tausaga vevela; e fa‘aumatia fale nifo elefane, e mavae atu fo‘i o fale tetele, o lo‘o fetalai mai ai le ALI‘I.