1Le ALI‘I e, lo‘u Atua,
‘ou te fa‘atuatua lava ‘iā te oe;
‘ia e fa‘aola mai ‘iā te a‘u i ē tuliloa mai ‘iā te a‘u uma lava,
ma ‘ia e lavea‘iina a‘u.
2Ne‘i saeia a‘u e ia e pei o se leona,
ne‘i fa‘amomomoina a‘u ‘ae leai sē lavea‘i mai.
3Le ALI‘I e, lo‘u Atua,
‘āfai ‘ua a‘u faia lenā mea;
pe ‘āfai o i o‘u lima se amio leaga;
4‘āfai ‘ua ‘ou agaleaga atu i lē na ma nofo lelei ma ia;
‘āfai ‘ua ‘ou vetea mea a lē ‘ua ita fua mai ‘iā te a‘u.
5‘Ia tuliloaina a‘u e lē ‘ua ita mai,
ma ‘ia maua mai a‘u e ia;
‘ia solia fo‘i e ia lo‘u ola i le ‘ele‘ele,
ma ‘ia fa‘ata‘atia lo‘u mamalu i le efuefu. Selā.
6Le ALI‘I e,
‘ia e tula‘i mai i lou to‘asā,
‘ia fa‘asilisili oe ‘ona o le ita o ē sauā mai ‘iā te a‘u;
ma ‘ia e maleifua mai ‘ona o a‘u i le fa‘amasinoga ‘ua e fetalai mai ai.
7‘Ona si‘osi‘omia ai lea o oe e le fa‘apotopotoga o nu‘u;
‘ia e fo‘i mai i o latou luga i le mea maualuga.
8E fa‘atonuina nu‘u e le ALI‘I;
le ALI‘I e, ‘ia e fa‘amasino ‘iā te a‘u e tusa ma la‘u amiotonu,
e tusa fo‘i ma la‘u amio sa‘o.
9‘Ia fa‘aumatia le leaga o ē amio leaga;
a ‘ia e fa‘atumauina lē ‘ua amiotonu;
auā e su‘esu‘e loto ma manatu e le Atua amiotonu.
10O le Atua o lo‘u talitā ia,
o le fa‘aola o ia o ē ‘ua tonu o latou loto.
11O le Atua, o le fa‘amasino amiotonu o ia;
‘ua to‘asā fo‘i le Atua i aso uma lava i lē ‘ua amio leaga.
12‘Āfai e lē fo‘i mai o ia,
ona fa‘ama‘ai ai lea e ia o lana pelu;
‘ua ia lolo‘u i lana ‘aufana ma sauni i ai.
13‘Ua ia sauni atu fo‘i ‘iā te ia le ‘au‘upega e oti ai;
na te faia fo‘i ana ū fanafana mū.
14Fa‘auta, ‘ua fa‘atigā o ia i le agasala;
‘ua tō fo‘i i le amio leaga
ma na fānauina le pepelo.
15‘Ua faia e ia le lua, ‘ua ‘elia lava;
‘ae pa‘ū lava o ia i le lua na ia faia.
16E toe i‘u atu lona leaga i lona lava ulu,
e pa‘ū fo‘i lana sauāga i luga o lona tumua‘i.
17‘Ou te vivi‘i atu i le ALI‘I ‘ona o lana amiotonu;
‘ou te pese atu fo‘i i le suafa o le ALI‘I lē Silisili‘ese.
Who We AreWhat We EelieveWhat We Do
2025 by iamachristian.org,Inc All rights reserved.