Numera 28 - Revised Samoan Catholic Bible

O Taulaga ‘Ese‘ese(Eso 29.38-46)

1‘Ua fetalai mai fo‘i le ALI‘I ‘iā Mose, ‘ua fa‘apea mai:

2‘Ia e fai atu i le fānauga a Isaraelu, ‘ia fa‘apea atu ‘iā te i latou, o le taulaga ‘iā te a‘u, o a‘u mea e ‘ai mo taulaga ‘iā te a‘u e fai i le afi, o le mea manogi lelei ‘iā te a‘u, ‘ia ‘outou ‘ana‘ana i ai, ‘ina ‘ia ‘aumaia ‘iā te a‘u i o latou aso ‘ua ‘atofaina.

3‘E te fai atu fo‘i ‘iā te i latou, O le taulaga e fai i le afi lenei tou te avatua i le ALI‘I; e ta‘ilua tama‘i mamoe i aso, e tasi lo la tausaga, e sao ‘ona lelei, e fai ma taulaga mū e lē aunoa.

4‘E te osia le tasi tama‘i mamoe i le taeao, ma le isi tama‘i mamoe ‘e te osia i le afiafi.

5O le omera e tasi o le falaoa lelei e palua ma lona vaega e fa o le sinu o u‘u ‘ua tu‘ia e fai ma taulaga i mea e ‘ai.

6O le taulaga mū e lē aunoa lea na fa‘atūina i le mauga o Sinai, e fai ma mea manogi lelei, o le taulaga e fai i le afi i le ALI‘I.

7O lana taulaga i mea e inu o lona vaega e fa lea o le sinu o le uaina i tama‘i mamoe ta‘itasi; i‘a sasa‘aina i le malumalu e fai ma taulaga i mea e inu o le uaina ‘o‘ona a le ALI‘I.

8O le isi tama‘i mamoe fo‘i ‘e te osia lea i le afiafi; ‘e te osia ai fo‘i e pei o le taulaga i mea e ‘ai o le taeao, ma lana taulaga i mea e inu; o le taulaga e fai i le afi, o le mea manogi lelei i le ALI‘I.O Taulaga o le Aso Sapati

9A o le aso sapati ‘ia lua ni tama‘i mamoe e tasi lo la tausaga, e sao ‘ona lelei; e lua omera fo‘i o le falaoa lelei e palua ma le suāu‘u e fai ma taulaga i mea e ‘ai, ‘atoa ma lana taulaga i mea e inu.

10O le taulaga mū lea i sapati uma e fa‘aopoopoina i le taulaga mū e lē aunoa, ma lana taulaga i mea e inu.

O Taulaga i le Ulua‘i Aso o le Masina

11O amataga fo‘i o ‘outou masina tou te avatua ai le taulaga mū i le ALI‘I, o povi po‘a ta‘anoa e lua, ma se mamoe po‘a e tasi, ma tama‘i mamoe e fitu e tasi lo latou tausaga, e sao ‘ona lelei.Nume 10.10; 1 Samu 20.5; 1 No 23.31; Isai 1.13-14; Kolo 2.16

12‘Ia ta‘itasi le povi po‘a ma omera e tolu o falaoa lelei e palua ma le suāu‘u e fai ma taulaga i mea e ‘ai mo le mamoe po‘a fo‘i e lua omera o falaoa lelei e palua ma le suāu‘u e fai ma taulaga i mea e ‘ai.

13‘Ia ta‘itasi le tama‘i mamoe ma le omera e tasi o le falaoa lelei e palua ma le suāu‘u, e fai ma taulaga i mea e ‘ai; o le taulaga mū lea, o le mea manogi lelei, o le taulaga e fai i le afi i le ALI‘I.

14O a latou taulaga i mea e inu ‘ia ta‘itasi le povi po‘a ma le vaeluagalemū o le sinu o le uaina mo le mamoe po‘a fo‘i o lona vaetolugālemū o le sinu; ‘ia ta‘itasi le tama‘i mamoe ma lona vaega e fa o le sinu o le taulaga mū lea e fai i masina, o masina uma o le tausaga.

15‘Ia osia fo‘i i le ALI‘I o le tama‘i ‘oti po‘a e tasi e fai ma taulaga mo le agasala, e fa‘aopoopoina i le taulaga mū e lē aunoa, ma lana taulaga i mea e inu.

O Taulaga i Areto lē Fa‘afefeteina(Levi 23.5-14)

16O le ulua‘i masina, o le aso e sefulu ma le fa i le masina e fai ai le paseka i le ALI‘I.Eso 12.1-13; Teu 16.1-2

17O le aso e sefulu ma le lima o lea masina e fai ai le tausamiga; o aso e fitu e ‘aina ai areto e lē fa‘afefeteina.Eso 12.14-20; 23.15; 34.18; Teu 16.3-8

18O le aso muamua e fai ai le fa‘apotopotoga pa‘ia; ‘aua tou te fai ai se galuega mamafa e tasi.

19‘Ae tou te avatua le taulaga e fai i le afi, o le taulaga mū ia i le ALI‘I; o povi po‘a ta‘anoa e lua, ma le mamoe po‘a e tasi, ma tama‘i mamoe e fitu e tasi lo latou tausaga, ‘ia sao ‘ona lelei mo ‘outou.Levi 22.20; Teu 15.21

20O a latou taulaga fo‘i i mea e ‘ai o falaoa lelei e palua ma le suāu‘u; tou te osia omera e tolu i povi po‘a e ta‘itasi, ma omera e lua i le mamoe po‘a.

21‘E te osia le omera e tasi i tama‘i mamoe ta‘itasi e fa‘atatau i tama‘i mamoe o fitu.

22O le ‘oti fo‘i e tasi o le taulaga mo le agasala e fai a‘i se togiola mo ‘outou.

23Tou te osia ia taulaga e fa‘aopoopoina i le taulaga mū o le taeao, o le taulaga mū o lē aunoa lea.

24E fa‘apea lava ‘ona ‘outou faia i aso uma i ia aso e fitu, o mea e ‘ai o le taulaga e fai i le afi, o le mea manogi lelei i le ALI‘I; e faia lava ia e fa‘aopoopoina i le taulaga mū e lē aunoa, ‘atoa ma lana taulaga i mea e inu.Levi 23.8

25‘Ia faia e ‘outou le fa‘apotopotoga pa‘ia i le aso fitu; ‘aua tou te fai ai se galuega mamafa e tasi.

O Taulaga Fa‘apolopolo(Levi 23.15-22)

26O le aso fo‘i o mea e fa‘apolopoloina, pe a ‘outou avatua le taulaga i mea e ‘ai fou i le ALI‘I, pe a mavae o ‘outou vaiasosa, ‘ia faia e ‘outou le fa‘apotopotoga pa‘ia; tou te lē fai ai se galuega mamafa e tasi.Eso 23.16; 34.22; Teu 16.9-12

27‘Ae tou te avatua le taulaga mū e fai ma mea manogi lelei i le ALI‘I; o povi po‘a ta‘anoa e lua, ma le mamoe po‘a e tasi, ma tama‘i mamoe e fitu e tasi lo latou tausaga.

28O a latou taulaga fo‘i i mea e ‘ai o falaoa lelei e palua ma le suāu‘u, e tolu omera i povi po‘a e ta‘itasi, e lua omera i le mamoe po‘a e tasi.

29O le omera e tasi i tama‘i mamoe ta‘itasi e fa‘atatau i tama‘i mamoe e fitu.

30O le ‘oti po‘a e tasi e fai a‘i se togiola mo ‘outou.

31Tou te osia ia taulaga e fa‘aopoopoina i le taulaga mū e lē aunoa, ma lana taulaga i mea e ‘ai, ‘atoa ma a latou taulaga i mea e inu; ‘ia sao ‘ona lelei mo ‘outou.