Poto 3 - Revised Samoan Catholic Bible

O le I‘uga o Tagata Amiotonu

1O agaga o ē amiotonu o lo‘o i le ‘a‘ao o le Atua,

e lē o‘otia fo‘i i latou i puapuagā o le oti.

2E mata ‘ua oti i latou i le va‘ava‘ai a ē vālelea,

‘ua pei o se mea fa‘atigā lo latou i‘uga,

3e peiseaī ‘ua fa‘aumatia ‘ina ‘ua latou fa‘amāvae ma i tatou;

‘ae o lo‘o i le manuia lava i latou.

4‘Āfai fo‘i ‘ua puapuagātia i latou i luma o tagata,

a ‘ua ‘ato‘atoa lo latou fa‘amoemoe i le ola e fa‘avavau.

5‘Ua itiiti nai mea na latou tigāina ai, ‘ae tele lava lo latou taui,

auā ‘ua tofotofoina i latou e le Atua i le ‘ua na maua ai i latou ‘ua aogā lava ‘iā te ia.

6‘Ua na tofotofoina i latou e pei o le auro i le ‘ogāumu,

‘ua na talileleia i latou e pei o le taulaga mū,

na te silasila fo‘i ‘iā te i latou i ona aso ‘ua tu‘upoina ai.

7E fepulafi o ē amiotonu,

e ‘emo‘emo i latou e pei o le afi e sosolo i le vao utuutu.

8E fa‘amasinoina e i latou o nu‘u ‘ese,

latou te pule fo‘i i nu‘u uma; e fai lo latou Atua ma tupu e fa‘avavau.

9O i latou e fa‘alagolago ‘iā te ia, e malamalama ‘iā te i latou le ‘upu moni.

O i latou e fa‘amaoni ‘iā te ia, latou te soamafuta ma ia i le alofa,

auā o le alofa ma le manuia, o le tofi lea o ona tagata filifilia. O le I‘uga o ē Agaleaga

10A o tagata agasala e fa‘asalaina i latou e tusa ma o latou mafaufauga leaga,

auā ‘ua latou tauemu i le tagata amiotonu ma ‘ua latou fa‘amamao i le Atua.

11Auā e malaia lē na te tu‘ulafoa‘i le poto ma le amiotonu;

e vale fo‘i lo latou fa‘amoemoe, e fai fua la latou taumafai,

e fa‘alēaogāina fo‘i a latou galuega.

12‘Ua vālelea o latou fafine, ‘ua silimusa a latou fānau i le leaga.

13‘ua malaia la latou fānauga.

O le Āufānaua

O le mea lea ‘ua manuia ai o le fafine ‘ua lē fānau,

a ‘ua mamā o ia, ‘ua sao lona moega i le agasala;

e maua e ia lona taui i le aso e asia ai o agaga amiotonu!

14‘Amu‘ia fo‘i le eunuka ‘ua lē tago lona lima i le amio leaga,

‘ua lē leaga fo‘i ona mafaufauga i le Atua:

auā e tu‘uina mai ‘iā te ia le mea alofa tāua

ma le tofi aupito mamalu i le afio‘aga o le Atua.

15Auā ‘ua matuā mamalu le fua o galuega lelei,

o le a‘a fo‘i o le poto e lē āumamae lava ia.

16‘Ae lē i‘u lelei le fānauga a tagata mulilua,

e fa‘aumatia o ē na fānau mai i se moega ‘ua fa‘aleagaina.

17‘Āfai e fa‘alevaleva lo latou olaga, e ta‘ufa‘atauva‘aina lava i latou,

e lē fa‘aaloaloina fo‘i le fa‘ai‘uga o latou tausaga e tele.

18‘Ae ‘āfai e vave oti i latou, e lē o i ai so latou fa‘amoemoe

po o se fa‘amafanafanaga i le aso o le fa‘aaliga.

19Auā e leaga pea lava le i‘uga o le fānauga amioletonu.