Isaia Fa‘atomuaga - Revised Samoan Catholic Bible
Fa‘atomuaga‘Ua fa‘aigoa lenei tusi o Isaia, i le igoa o le perofeta lauiloa ma aloa‘ia sa soifua mai pe tusa o le 765 T.L.M i Ierusalema. Na vala‘auina Isaia e fai ma perofeta i le vaitaimi tonu na maliu ai le tupu o Iuta o Usia i le 740 T.L.M (6.1-13). E tusa ma le fa sefulu tausaga o galue fa‘aperofeta Isaia i le vaitaimi tonu o le malosi o pulega o le mālō o Asuria. Sa molimauina e Isaia le malosi o Asuria ‘ina ‘ua pūlea e Asuria Isaraelu i le 733 T.L.M ma le fa‘atafunaga o Samaria e Asuria i le 721 T.L.M. Sa to‘atele fo‘i tagata Isaraelu sa ‘ave fa‘apagotā i Asuria ‘ae ‘ua amata fo‘i ‘ona fa‘amata‘uina o Iuta e Asuria. Sa tele fo‘i ‘ina ‘a‘afia faigamālō, tapua‘iga ma olaga o tagata o Isaraelu ma Iuta i lenā vaitau. E mafai ‘ona vaevaeina lenei tusi i ni vaega tetele se tolu.(1) Matā‘upu 1-39, e fa‘asino tonu i le vaitau na fa‘amata‘uina ai Iuta e le mālō o Asuria, o se tasi o mālō malosi sa tuā‘oi ma Iuta. Sa iloa lelei e Isaia ‘ua fa‘amata‘uina le olaga sa‘oloto o tagata o Iuta e Asuria, ‘ae lē gata i lea sa mata‘ituina fo‘i e le perofeta le agasala ‘ua a‘afia ai tagata o le mālō ‘ona o le lē usita‘i i le Atua, fa‘apea fo‘i ‘ua lē fa‘alagolago tagata ‘iā te ia. Sa ‘avea lea ma fa‘aosofiaga i le perofeta ma vala‘auina tagata ma o latou ta‘ita‘i ‘ina ‘ia ola i se olaga fa‘amaoni ma le amiotonu. Sa lapata‘i atu fo‘i le perofeta o le a o‘o ‘ina i‘uvale ma fa‘atafunaina o le mālō pe ‘āfai latou te lē fa‘alogo i le Atua. Sa valo‘ia fo‘i e Isaia o le a o‘o mai le taimi o le filemū i le lalolagi ma le afio mai o le suli o Tavita e fai ma tupu silisili.(2) Matā‘upu 40-55, o lo‘o talanoaina ai i nei matā‘upu le matuā pagātia o tagata o Iuta ‘ina ‘ua latou fa‘atāfea atu i Papelonia. ‘Ua ‘avea lea ma ala ‘ua leai ai se fa‘amoemoe i tagata latou te toe maua ai se sa‘olotoga. ‘Ae ui i lea sa folafola e le perofeta le sa‘olotoga o le a faia e le Atua mo ona tagata ma lo latou toe fo‘i atu i lo latou ‘āiga i Ierusalema e toe āfua ai se taeao fou. O le ‘autū ‘iloga o nei matā‘upu ‘ua fa‘asino lea i le Atua, o le Ali‘i o le tala‘aga fa‘asolopito ma o ana fuafuaga mo ona tagata ‘ua aofia ai la latou fe‘au mo mālō uma, o le a fa‘amanuiaina ‘ona o Isaraelu. O le “‘au‘auna a le Ali‘i” o se tasi lea o manatu ‘iloga o le Feagaiga Tuai o lo‘o fa‘apenā ‘ona talanoaina i lenei tusi.(3) Matā‘upu 56-66, ‘ua fa‘a‘autū lea i le taimi ‘ua toe fo‘i mai tagata i Ierusalema ma ‘ua mo‘omia lava ni tala fa‘amalosi loto e uiga i le fa‘ataunu‘uina o mea uma na folafola mai e le Atua i le mālō. O lo‘o fa‘aalia ni manatu e uiga i le amiotonu ma le sa‘o, le tausiga o le Sapati, o taulaga ‘atoa ma talosaga. O se vaega tāua o nei matā‘upu o le 61.1-2, “‘Ua i o‘u luga le Agaga o le Ali‘i le Atua auā ‘ua ia fa‘au‘uina a‘u e tala‘i le talalelei i ē tigāina…fa‘amatalaloto i ē fa‘anoanoa uma lava.” o ‘upu ia sa fa‘aaogāina e Iesu i le amataga o lana galuega; e fa‘amatalaina ai lona vala‘auga ma lana galuega fa‘aola.O le Fa‘asologa o Matā‘upu:O lapata‘iga ma folafolaga 1.1—12.6O le fa‘asalaga o atunu‘u uma 13.1—23.18O le fa‘amasinoga a le Atua i le lalolagi 24.1—27.13O isi lapata‘iga ma folafolaga 28.1—35.10O Esekia le tupu o Iuta ma tagata Asuria 36.1—39.8O fe‘au o le folafolaga ma le fa‘amoemoe 40.1—55.13O lapata‘iga ma folafolaga 56.1—66.24
