Esoto 30 - Revised Samoan Catholic Bible

O le Fatafaitaulaga e mū ai mea Manogi(Eso 37.25-28)

1‘E te faia fo‘i le fatafaitaulaga, o le fata e mū ai mea manogi; ‘e te faia i le la‘au o le setima.

2O le kupita e tasi lona umi, ma le kupita e tasi lona lau, e fai fa‘atafafā, o kupita e lua lona maualuga; e fai ona nifo i lea lava mea.

3‘E te ufiufi fo‘i ia i le auro lelei, o lona ufi ma ona itū e so‘o ai, ma ona nifo; ‘e te fai ai fo‘i le pale auro e fa‘ata‘ali‘oli‘o ai.

4‘E te faia ona mama auro e lua, i lalo o lona pale, i ona tuli fata, i ona itū e lua ‘e te faia; e fai ma mea e sulu ai amo e amo a‘i.

5‘E te faia fo‘i o ia amo i le la‘au o le setima, ‘e te ufiufitia i le auro;

6‘e te tu‘uina ai i luma o le ‘ie puipui, o lo‘o i luma i le ‘atola‘au o le tulafono, i luma o le nofoa o le alofa, o i luga o le ‘atola‘au o le tulafono, o le mea lea tā te fetaia‘i ai ma oe.

7E fa‘amū fo‘i e Arona i ona luga o mea manogi i taeao uma lava pe a teuteu e ia o lamepa, ia fa‘amū ai le mea manogi.

8Pe a tutu fo‘i e Arona o lamepa i le afiafi, ‘ia fa‘amū ai e ia o mea manogi; o le mea manogi i luma o le ALI‘I e lē aunoa i o ‘outou tupulaga amulī.

9‘Aua tou te fa‘amū ai mea manogi ‘ese, po o taulaga mū, po o taulaga i mea e ‘ai; ‘aua fo‘i tou te sasa‘a i ai ni taulaga i mea e inu.

10E faia fo‘i e Arona i luga o nifo o le fata o le togiola i le toto o taulaga mo le agasala e togiola a‘i, ‘ia ta‘itasi i tausaga; e faia e ia o le togiola i o ‘outou tupulaga amulī, ‘ia ta‘itasi i tausaga; e sili ‘ona pa‘ia lea mea i le ALI‘I.

O Lafoga mo le Fale Fetāfa‘i

11‘Ua fetalai mai fo‘i le ALI‘I ‘iā Mose, ‘ua fa‘apea mai:

12A e faitau i le fānauga a Isaraelu, e fa‘atatau i ē ‘ua tatau ‘ona faitauina, ‘ia latou ta‘itasi ma ‘aumai o latou togiola i le ALI‘I, pe a faitauina i latou, ne‘i o‘o se mala ‘iā te i latou pe a faitauina i latou.

13O lenei le mea latou te ta‘itasi ma ‘aumai, ē ‘ua faitaulia, o le vaeluaga o le sekeli, o le sekeli lea o le malumalu; (e luafulu o kire o le sekeli lea;) o le vaeluaga o le sekeli o le taulaga lea i le ALI‘I.

30‘Ia e fa‘au‘u fo‘i ‘iā Arona ma ona atali‘i, ma ‘ia e fa‘apa‘iaina i latou, ‘ina ‘ia latou faia le faiva o ositaulaga ‘iā te a‘u.

31‘E te tautala atu fo‘i i le fānauga a Isaraelu, ‘ia fa‘apea atu, “E fai lenei mea ma u‘u e pa‘ia ‘iā te a‘u e fa‘au‘u ai, e o‘o i o ‘outou tupulaga amulī.

32‘Aua ne‘i liligiina i tino o tagata; ‘aua fo‘i ne‘i ‘outou faia se mea fa‘apea, e tusa ma lenei mea, e pa‘ia lea mea, e pa‘ia pea lava ‘iā te ‘outou.

33O sē na te palu fefiloi se u‘u fa‘apea, pe fa‘au‘uina ai se tagata ‘ese, ‘ia vavae‘eseina lava ia i lona nu‘u.”

O Mea Manogi

34‘Ua fetalai mai le ALI‘I ‘iā Mose: ‘Ia e ‘ave ni mea manogi, o le pulu natafa, ma le sekeleta, ma le pulu kalipana, o mea manogi lelei, ma le pulu lipano lelei; ‘ia tutusa uma lava, ia mea.

35‘E te fai ai le mea manogi, o le mea palu fefiloi i le faiva o le fai mea manogi, e fa‘amasimaina, e lelei, e pa‘ia.

36‘E te matuā tu‘inini‘i fo‘i nai isi mea, ma tu‘uina atu ai i luma o le ‘atola‘au o le tulafono, i le fale fetāfa‘i o le fa‘apotopotoga, i le mea tā te fetaia‘i ai ma oe; ‘ia sili ‘ona pa‘ia lea mea ‘iā te ‘outou.

37O le mea manogi fo‘i ‘e te faia, ‘aua lava le faia se mea fa‘apea; mā ‘outou; e pa‘ia lava lea mea ‘iā te oe mo le ALI‘I;

38o sē na te faia se mea fa‘apea e sogisogi i ai, ‘ia vavae‘eseina lava ia i lona nu‘u.