Ieremia 9 - Revised Samoan Catholic Bible

O le Auega a Ieremia ‘ona o le Agasala a Iuta ma lo Latou Malaia

1E! fia liua lo‘u ulu ma suāvai,

ma o‘u mata ma punaloimata,

‘ina ‘ia ‘ou tagi i le ao ma le po

‘ona o tagata o lo‘u nu‘u ‘ua fasiotia.

2E! tā fia maua i le vao se fale apitaga e api ai malaga;

‘ina ‘ia ‘ou tu‘ua lo‘u nu‘u ma alu ‘ese ai.

Auā o tagata mulilulua i latou uma,

o le fa‘apotopotoga o tagata fa‘a‘ole‘ole.

3‘Ua latou lolo‘u o latou laulaufaiva e pei o latou ‘aufana,

e tala pepelo ai; latou te lē totoa i fai mea fa‘amaoni i le nu‘u;

auā ‘ua alualu la latou amio leaga ma latou lē iloa a‘u,

‘ua fetalai mai ai le ALI‘I.

4‘Ia ‘outou ta‘itasi ma fa‘aeteete o ia ‘iā te ia i lana uō,

‘aua fo‘i ne‘i fa‘atuatua i se uso e tasi;

auā o uso uma e ta‘ito‘atasi ma matuā sisi‘o i lona uso

ma uō uma e ta‘itasi ma fealualua‘i ma fe‘ave‘avea‘i.

5E ta‘ito‘atasi i latou ma pepelo i lana uō,

e lē tautala fo‘i i latou ma le fa‘amaoni.

‘Ua latou fa‘amasani o latou laulaufaiva i tautala pepelo,

‘ua tautigā i latou i fai mea fa‘api‘opi‘o.

6O le mea ‘e te nofo ai o lo‘o i totonu o le nu‘u fa‘a‘ole‘ole lea;

o le fa‘a‘ole‘ole latou te lē mafafai ai ‘ona iloa o a‘u,

‘ua fetalai mai ai le ALI‘I.

7O le mea lea, o lo‘o fa‘apea ‘ona fetalai mai ai o le ALI‘I o ‘au,

Fa‘auta, ‘ou te su‘esu‘e ‘iā te i latou ma tofotofo ‘iā te i latou;

auā pe se a se isi mea ‘ou te faia i le tama fafine a lo‘u nu‘u?

8O latou laulaufaiva o ū fanafana ‘ia e oti ai;

le tautalatala fa‘a‘ole‘ole.

E ta‘itasi ma tautala ma le filemū i lana uō i lona gutu,

a o lona loto ‘ua lamalama ‘iā te ia.

9‘Ou te lē taui atu ‘ea ‘iā te i latou ‘ona o ia mea;

o lo‘o fetalai mai ai le ALI‘I.

E le taui atu ‘ea ma sui o lo‘u agaga i le nu‘u fa‘apenā?

10‘Ona o le atu mauga ‘ou te faia le tagi ma le auega,

o le pese fo‘i e aualofa ai ‘ona o mea i le vao e tata‘a ai manu.

Auā ‘ua susunuina, ‘ua lē uia e tagata;

e lē lagona ai le leo o manu;

‘ua sōsōla manu felelei ‘atoa ma manu vaefā,

‘ua latou o.

11‘Ou te faia fo‘i Ierusalema ma faupu‘egama‘a,

o le mea e fale ai tanimo;

‘ou te fa‘atafunaina lava ‘a‘ai o Iuta,

e lē nofo ai se tasi.

12Po o ai le tagata poto, ‘ia lagona e ia lenei mea? Po o ai fo‘i ‘ua fetalai mai ‘iā te ia le fofoga o le ALI‘I, ‘ia na fa‘ailoa mai ai le mea ‘ua fa‘aumatia ai le lau‘ele‘ele, ‘ua susunuina e pei o le vao, ‘ua lē uia e se tasi?

13‘Ua fetalai mai fo‘i le ALI‘I: ‘Ua latou lafoa‘iina la‘u tulafono na ‘ou tu‘uina atu i o latou luma ma latou lē fa‘alogo i lo‘u leo ma latou le sāvavali i ai;O le Fa‘anoanoaga o Tagata o Ierusalema

17O lo‘o fa‘apea ‘ona fetalai mai o le ALI‘I o ‘au:

‘Inā mafaufau ia ‘outou ma ‘ia ‘outou ‘a‘ami atu i fafine pepese,

‘ina ‘ia latou ō mai ma ‘ia ‘outou fe‘auina atu i fafine popoto,

‘ina ‘ia ō mai fo‘i i latou.

18‘Ia latou fa‘ata‘alise mai ma ‘ia latou lagi le pese e aualofa ai mo i tatou,

‘ia tafe ifo loimata i o tatou mata ma ‘ia maligi ifo le suāvai i o tatou laumata.

19Auā ‘ua lagona atu le leo o le auega i Siona,

“E, ‘ua fa‘atafunaina i tatou! ‘ua matuā mā lava i tatou, auā ‘ua tu‘ua e i tatou lo tatou lau‘ele‘ele, auā ‘ua latou lepetia o tatou fale.”

20O lenei,

o ‘outou fafine, ‘inā fa‘alogologo mai ia i le afioga a le ALI‘I,

‘ia lagona e o ‘outou taliga le ‘upu mai lona fofoga,

ma ‘ia ‘outou a‘oa‘o atu ‘iā ‘outou tama fafine se fatu,

‘ia ta‘itasi fo‘i ma a‘oa‘o atu i lana uō se pese e aualofa ai.

21“Auā ‘ua alu a‘e le oti i o tatou fa‘amalama,

‘ua ulufale mai i o tatou maota,

e fano ai tamaiti i le ala, ma taulele‘a i malae.”

22‘Inā fai atu ia, O lo‘o fa‘apea ‘ona fetalai mai o le ALI‘I:

“E pa‘u‘ū tino o tagata oti, e pei o otaota i luga o le lau‘ele‘ele,

e pei o le fusi saito fo‘i i tua o lē selesele,

‘ae leai sē na te fa‘aputuina.”

23O lo‘o fa‘apea ‘ona fetalai mai o le ALI‘I:

‘Aua ne‘i mitamita le tagata poto i lona poto,

‘aua ne‘i mitamita le tagata malosi i lona malosi,

‘aua ne‘i mitamita fo‘i le mau‘oa i ana ‘oloa.

24A o lē mitamita, ‘inā mitamita ia o ia i lenei mea,

‘ina ‘ua mafaufau o ia ma ‘ua iloa a‘u,

o a‘u lava o le ALI‘I, o lē faia le alofa

ma le fa‘amasinoga ma le amiotonu i le lalolagi.

Auā o mea ia ‘ou te fiafia i ai,

o lo‘o fetalai mai ai le ALI‘I.

25Fa‘auta, e o‘o mai ona po, o lo‘o fetalai mai ai le ALI‘I, ‘ou te taui atu ai ‘iā te i latou uma o ē ‘ua peritomeina fa‘atasi ma ē ‘ua lē peritomeina: o ē nonofo i le vao; auā o ia nu‘u uma ‘ua lē peritomeina ma le ‘āiga uma o Isaraelu e le‘i peritomeina o latou loto.