Salāmo 35 - Revised Samoan Catholic Bible

O le Tatalo a Tavita ‘ia Fa‘aolaina o ia a‘i Lima o ē ita ‘iā te IaO le salāmo a Tavita

1Le ALI‘I e,

‘ia e finau ma i latou o ē finau mai ‘iā te a‘u,

‘ia e tau ma i latou o ē fa‘asaga tau mai ‘iā te a‘u.

2‘Ia e tago i le talitā ma le talipupuni

ma ‘ia e tula‘i mai e fesoasoani mai ‘iā te a‘u.

3‘Ia e tō a‘e le tao ma e pupuni atu i ē tuliloa mai ‘iā te a‘u;

‘ia e fetalai mai i lo‘u agaga,

“O lou fa‘aola o a‘u lava lea.”

4‘Ia fa‘amāina ma ia māsiasi o ē sā‘ili ‘ia oti a‘u;

‘ia liutuaina ma ‘ia taufaimamā i latou

o ē mānatunatu i se mea e leaga ai a‘u.

5‘Ia ‘avea i latou ‘ia fa‘apei o aputi o saito ‘ona lelea i le matagi;

‘ia tuleia i latou e le agelu a le ALI‘I.

6‘Ia pouliuli ma ‘ia mase‘ese‘e lo latou ala;

ma ‘ia tuliloaina i latou e le agelu a le ALI‘I.

7Auā na latou natia fua lo latou ‘upega ‘ia maua ai a‘u i le lua,

na latou ‘elia fua lava ‘ia ‘ou oti ai.

8‘Ia o‘o ‘iā te ia le malaia ‘ua na lē iloa;

‘ia maua lava o ia i lona ‘upega na ia natia;

‘ia pa‘ū lava o ia i lea lava malaia.

9‘Ona fiafia lea o lo‘u loto i le ALI‘I;

e ‘oli‘oli lava i lana fa‘aolataga.

10E fai atu o‘u ivi uma lava,

“Le ALI‘I e,

o ai ‘ea sē tusa ma oe,

o lē ‘ua lavea‘i le tagata ‘ua puapuagātia,

mai ‘iā te ia ‘ua i ai le malosi e sili i lona;

e lavea‘iina fo‘i lē ‘ua puapuagātia

ma le mativa i lē ‘ua faoa ana mea?”

11‘Ua tutū mai ‘iā te a‘u o molimau fa‘asauā,

‘ua latou su‘esu‘e ‘iā te a‘u i mea ‘ou te le‘i iloa.

12‘Ua latou taui mai lo‘u lelei i le leaga,

e ausage ai lo‘u agaga.

13‘Ae peita‘i o a‘u nei,

na ‘ou ‘ofu i ‘ie talatala ‘ina o latou mama‘i,

na ‘ou fa‘atigāina a‘u e a‘u i le anapogi;

ma ‘ua fo‘i mai la‘u tatalo i lo‘u fatafata.

14Na ‘ou fealua‘i e peiseaī o la‘u uō o ia po o lo‘u uso;

na ‘ou punou ‘ele‘elea,

e pei o lē ‘ua fa‘anoanoa i lona tinā.

15A ‘ua latou fiafia ‘ina ‘ua ‘ou setusetu;

ma ‘ua latou fa‘apotopoto mai;

‘ua fa‘apotopoto o ē agatele e fa‘atigā ‘iā te a‘u,

a ‘ua ‘ou lē iloa;

na latou fesaeia‘i ‘iā te a‘u, ‘ua lē mapu lava.

16‘Ua lilivau o latou nifo ‘iā te a‘u fa‘atasi ma tagata fa‘alēmata‘u,

o ē faianaga ‘ia maua ai se pōtoi areto.

17Le ALI‘I e, ‘e te silasila i ai se‘ia afea?

‘Ia e fa‘afoisia mai lo‘u agaga mai a latou fa‘atafunaga,

‘ia lavea‘iina a‘u ‘ua to‘atasi mai leona.

18‘Ou te vivi‘i atu ‘iā te oe i le fa‘apotopotoga tele,

ma pese atu ‘iā te oe i luma o le nu‘u e to‘atele.

19‘Aua ne‘i mitamita ‘iā te a‘u o ē ita fua mai ‘iā te a‘u;

‘aua ne‘i fegenoa‘i mata o ē ‘ino‘ino fua mai ‘iā te a‘u.

20Auā e lē tautala i le filemū i latou,

a ‘ua latou mānatunatu i ‘upu pepelo,

i ē ‘ua nofo fīfīlemū i le nu‘u.

21‘Ua fa‘amamaga fo‘i o latou gutu ‘iā te a‘u,

‘ua fai mai, “Ue! ue! ‘ua va‘ai lava i ai o tatou mata.”

22Le ALI‘I e,

‘ua e silasila i ai.

‘Aua ne‘i e lē tali mai;

le Ali‘i e, ‘aua ‘e te vāvāmamao ma a‘u.

23Lo‘u Atua e, lo‘u Ali‘i e,

‘ia e tula‘i mai ma e maleifua mai

i lo‘u fa‘amasinoga ma la‘u nei finauga.

24Le ALI‘I e, lo‘u Atua,

‘ia e fa‘amasino mai ‘iā te a‘u e tusa ma lau amiotonu;

‘aua ne‘i latou mitamita mai ‘iā te a‘u.

25‘Aua ne‘i latou fai ifo i o latou loto,

“Ue! o lo tatou lava mana‘o lenā;”

‘aua ne‘i latou fai ane,

“‘Ua foloina o ia e i tatou.”

26‘Ia taufaimamā ma ia māsiasi fa‘atasi i latou o ē ‘ua mitamita i lo‘u tigā;

‘ia fa‘a‘ofuina i latou i le mā ma le māsiasi o ē fa‘asausili ‘iā te a‘u.

27‘Ia pepese ma taufai‘oli‘oli o ē loto i la‘u amiotonu;

‘ia fai ane pea lava i latou,

“‘Ia vi‘ia le ALI‘I, o lē ‘ua finagalo ‘ia manuia lana ‘au‘auna.”

28E ta‘uta‘u atu fo‘i lo‘u laulaufaiva i lau amiotonu,

ma vivi‘i atu ai ‘iā te oe i le aso ‘atoa.