Poto 18 - Revised Samoan Catholic Bible

‘Ua Susulu le Malamalama ‘iā Isaraelu

1A o ou tagata pa‘ia, sa ‘iā i latou le malamalama tele;

sa fa‘alogo tagata Aikupito i o latou lava leo, a ‘ua latou lē iloa atu o latou mata.

Ma ‘ua latou vivi‘i atu ‘iā te oe, auā ‘ua lē o‘otia i latou i mea fa‘atigā lava ia.

2O i latou na mua‘i fa‘asauāina, ‘ua latou fa‘afetai atu auā ‘ua lē toe fa‘asauāina i latou;

ma ‘ua latou tagi atu ‘ina ‘ia tumau pea lenā ‘ese‘esega.

3O lea fo‘i ‘ua latou maua ai le afi o le ao fa‘aniutū, ‘ua fai ma latou ta‘ita‘i i le ala sa latou lē iloa,

‘ua e fa‘asao ai i latou i le ‘a‘asa o le lā i la latou malaga manuia.

4‘Ae sa tatau lava ‘ona fa‘apouliuligia ma ‘ia tāofia i le falepuipui o le pogisā,

o i latou sa fa‘apologaina o lau fānau o le a ‘avea ma ala e fa‘aalia mai ai i le lalolagi le malamalama e lē aumavae o lau tulafono. O le Fasiotia o Ulumatua o Aikupito

5Sa latou loto e fasioti i le fānau a ē amiotonu; i le ‘ua lafoia le tasi o i latou,

a ‘ua fa‘aolaina ‘ina ‘ia fa‘asalaina a‘i i latou;

na e ‘ave‘esea ‘iā i latou le to‘atele o a latou fānau ma ‘ua e fa‘agoto i latou ‘atoa uma i le sami sousou.

6Na mua‘i fa‘ailoa lenā lava po i o matou tamā,

‘ina ‘ia latou iloatino ai o folafolaga sa latou fa‘atuatua i ai ma ‘ia fa‘amalosia ai o latou loto.

7‘Ona fa‘atalitali ai lea o lou nu‘u i le fa‘aolataga o ē amiotonu ma le fa‘aumatia o ē amio leaga.

8E pei lava ‘ona e fa‘asalaina o matou fili,

e fa‘apea fo‘i ‘ona e fa‘amamalu ‘iā i matou ‘ona ‘ua e vala‘auina i matou ‘iā te oe.

9Auā na osia fa‘alilo le taulaga a le fānau amiotonu a le ‘au pa‘ia ma ‘ua latou faia ma le loto gatasitasi lenā feagaiga o le amiotonu,

‘ia latou fa‘atasi pea i le tali o mea lelei ma mea leaga ma ‘ua latou pepese o vi‘iga na tu‘ufa‘asolo mai e o latou tamā.

10‘Ae sa ta‘alili fo‘i o leo nunuvale o le fili,

sa lagona ai le tagiauē a ē fētāgisi i la latou fānau.

11Sa fa‘asalaina le pologa ma lona matai i le sala lava e tasi,

sa taufaitigā le tagatanu‘u ma le tupu i le puapuagā lava e tasi.

12Sa tutusa i latou uma ‘ona ‘ua fasia i le oti lava e tasi ni o latou tagata e lē mafaitaulia.

Sa lē lava fo‘i o tagata ola e tanu i ē na oti, auā o le ‘emo o le mata na fa‘aumatia ai o i latou ‘ua aupito mamalu i le fānauga a le nu‘u.

13Sa latou mumusu i talitonu, ‘ona o a latou mea fa‘ataulāitu;

a ‘ua o‘o ‘ina fa‘aumatia a latou ulumatua, ‘ua fa‘ato‘ā talitonu ai i latou o le nu‘u lava lea o le Atua.

14Auā o le itūpō sa liligo ai o mea uma ma ‘ua o‘o ai le po i le vaeluaga o lana ta‘amilosaga,

15na oso ifo ai mai le lagi, mai lona nofoāli‘i fa‘atupu, o lau lava fetalaiga mamana,

e pei o se toa faigatā, i lenā ‘ele‘ele ‘ua tusa i ai le fanoga;

16o fe‘avea‘i lau poloa‘iga e lē toe tālaina, e pei o se pelu ma‘ai; ma ‘ua tu ai,

e fa‘ao‘o le oti i mea uma sa tu i le ‘ele‘ele, a ‘ua tau atu i le lagi.

17‘Ona mata‘utuia loa lea i latou i ni miti ma ni fa‘aaliga mata‘utia,

‘ua o‘otia i latou i le fefe sa latou lē nofo fa‘atalitali i ai.

18Sa lafoia i latou i lea mea po o lea mea, o tāli oti, ma ‘ua latou fa‘aali ai le ala o lo latou oti.

19Auā ‘ua fa‘aalia ‘iā te i latou lea mea e ni foliga sa fa‘amata‘u ‘iā te i latou,

‘ina ne‘i oti i latou ma le lē iloa le ala na fa‘atigāina ai i latou.

O le Tatalo a Arona na Lavea‘i ai Isaraelu

20‘Ua o‘o fo‘i i tagata amiotonu le tofotofoga o le oti, ma ‘ua taia i le fanua tu‘ufua nisi e to‘atele o lou nu‘u;

a ‘ua lē fa‘alevaleva lou to‘asā.

21Auā ‘ua fa‘ata‘alise atu le tagata ‘ua lē mata‘uleagaina e ‘ai‘oi atu mo le nu‘u,

o si‘i a‘e le talitā o lana ‘au‘aunaga, o momoli atu lana talosaga ma lana ōlega i le fa‘amū le mea manogi;

‘ua te‘ena lava e ia o lou to‘asā ma ‘ua na tāofia le mala, o fa‘aalitino ai o ia o lau lava ‘au‘auna.

22E lē o le malosi o le tino po o le malosi o le ‘au‘upega na ia manumālō ai i le nunuvale o le nu‘u,

a o lana lava ‘upu ‘ua na tāofia ai lē sa na olopalaina i latou,

o fa‘amanatu atu i tautoga na faia i o latou tua‘ā ma le feagaiga pa‘ia.

23‘Ua o‘o lava ‘ina pa‘u‘ū fa‘aputuputu o tagata oti le tasi i luga o le tasi,

‘ona tu lea o ia i le vā, ‘ua tāofi e ia le fa‘asalaga ma ‘ua na pupuni le ala sa tau atu i ē o lo‘o ola.

24Auā o le ‘ofu talaloa sa ‘ofu ai o ia, ‘ua i ai le lalolagi uma;

o igoa mamalu o tupuga sa togitogi i atuma‘a e fā,

sa togitogia fo‘i o lou mamalu i le paleali‘i o lona muaulu.

25O mea lava ia na tāofia ai lē sa na olopalaina le nu‘u,

o mea ia na ia mata‘u ai; auā ‘ua latou tofotofo tasi i lou to‘asā, ‘ona uma ai lea.