Salāmo 14 - Revised Samoan Catholic Bible

O le Uiga o le Amioga a ē Amio LeagaMa le usu pese. O le salāmo a Tavita(Sala 53)

1‘Ua fai ifo le tagata valea i lona loto,

“E leai se Atua.”

‘Ua leaga lava i latou; ‘ua ‘inosia a latou amioga;

e leai se tasi ‘ua amio lelei.

2O lo‘o silasila mai le ALI‘I mai le lagi i le fānau a tagata,

‘ina ‘ia silafia pe ai se tasi ‘ua poto,

se ‘ua sā‘ili i le Atua.

3‘Ua latou ‘alo‘alo ‘ese uma lava, ‘ua leaga fa‘atasi i latou;

e leai se tasi ‘ua amio lelei,

e leai lava se tasi.

4E lē o iloa ‘ea e i latou uma lava o ē fai amio leaga?

O lo‘o ‘aina e i latou lo‘u nu‘u,

e pei ‘ona latou ‘a‘ai i mea e ‘ai;

‘ua latou le vala‘au i le ALI‘I.

5‘Ua matata‘u tele i latou i lea mea;

auā o i le tupulaga o ē amiotonu le Atua.

6‘Ua ‘outou fa‘amāina le filifiliga a lē ‘ua puapuagātia;

auā o lona malu o le ALI‘I lea.

7E! fia iloa sē na te ‘aumaia mai Siona le fa‘aolataga o Isaraelu.

Pe a fa‘afoisia mai e le ALI‘I le tāfeaga a lona nu‘u,

‘ona ‘oli‘oli ai lea o Iakopo, e fiafia ai Isaraelu.