Salāmo 30 - Revised Samoan Catholic Bible

O lo‘o Vivi‘i atu Tavita i le ALI‘I auā ‘ua Fa‘aolaina o IaO le salāmo, o le pese i le fa‘aulufalega o le fale o Tavita

1Le ALI‘I e,

‘ou te vivi‘i atu ‘iā te oe;

auā ‘ua e fa‘aeaina a‘u;

‘ua e lē tu‘uina atu i ē ‘ua ita mai ‘iā te a‘u

‘iā latou mitamita mai ‘iā te a‘u.

2Le ALI‘I e lo‘u Atua,

na ‘ou ‘alaga atu ‘iā te oe,

‘ona e fa‘amālōlōina ai lea o a‘u.

3Le ALI‘I e,

‘ua e ‘ava‘e ‘iā te a‘u a‘i le tu‘ugamau;

‘ua e fa‘aolaina a‘u, ne‘i ‘ou alu ifo i le lua.

4O ‘outou na o ona tagata amio Atua,

‘ia ‘outou pepese atu i le ALI‘I

ma ‘ia ‘outou vivi‘i pe a manatua lona pa‘ia.

5Auā o lona to‘asā ‘ua se ‘emo o le mata lea,

a o lona alofa tunoa o le ola lava lea;

e afe ane le tagi i le afiafi,

a o le ‘alaga fiafia i le taeao.

6Na ‘ou fai atu lava a‘u ‘ina ‘ua ‘ou manuia,

“E lē fa‘agae‘etia a‘u e o‘o i le fa‘avavau.”

7Le ALI‘I e,

o lou alofa lava na e fa‘atumauina ai le malosi i lo‘u mauga;

‘ua e liliu ‘ese ou fofoga,

‘ona ‘ou atuatuvale ai lea.

8Le ALI‘I e,

‘ua ‘ou ‘alaga atu ‘iā te oe;

ma ‘ou ‘ai‘oi atu i le ALI‘I.

9“Se a le aogā o lo‘u toto i lo‘u alu ifo i le tu‘ugamau?

E vivi‘i ‘ea le ‘ele‘ele ‘iā te oe?

pe na te fa‘aali atu ‘ea lou fa‘amaoni?

10Le ALI‘I e,

‘ia e fa‘afofoga mai ma alofa mai ‘iā te a‘u.

Le ALI‘I e,

‘ia fai oe mo‘u fesoasoani.”

11‘Ua e liua lo‘u tagitu‘i i le siva;

‘ua e tala‘eseina lo‘u ‘ie talatala,

‘ae fusia a‘u i le fiafia;

12‘ina ‘ia pese atu ‘iā te oe lo‘u mamalu ma le lē mapu;

le ALI‘I e lo‘u Atua,

‘ou te vivi‘i atu ‘iā te oe e fa‘avavau lava.