1‘Ua fetalai mai le ALI‘I:
Fa‘alogo mai ia ‘iā te a‘u, ‘outou o ē tausisi atu i le amiotonu,
ē ‘ua sā‘ili i le ALI‘I;
‘Inā va‘ava‘ai ia i le papa na tofitofia mai ai ‘outou,
ma le gutu o le lua na ‘elia mai ai ‘outou.
2‘Ia ‘outou va‘ava‘ai ‘iā Aperaamo lo ‘outou tamā
ma Sara o lē na fānaua ‘outou.
Auā na a‘u vala‘auina o ia a o to‘atasi,
ma ‘ou fa‘amanuia ‘iā te ia ma fa‘ato‘ateleina o ia.
3Auā e fa‘amafanafanaina Siona e le ALI‘I,
e fa‘atafunaina ana mea fa‘atafunaina uma lava.
Na te faia lona fanua lafulafuā e pei o Etena,
ma lona toafa e pei o le fa‘ato‘aga a le ALI‘I.
E maua ai le fiafia ma le ‘oli‘oli,
o le fa‘afetai ma le leo o le pese.
4Fa‘alogo mai ia ‘iā te a‘u lo‘u nu‘u e;
o‘u tagata e ua‘i mai ia o ‘outou taliga ‘iā te a‘u.
Auā e alu atu le tulafono ‘iā te a‘u,
‘ou te fa‘atumauina fo‘i la‘u fa‘amasinoga,
e fai ma malamalama o nu‘u.
5‘Ua lata mai le amiotonu mai ‘iā te a‘u,
‘ua alu atu la‘u fa‘aolataga.
O‘u lima fo‘i e fa‘amasinoina ai nu‘u;
e fa‘atalitali mai ‘iā te a‘u o nu‘u tu matāfaga,
latou te fa‘amoemoe fo‘i i lo‘u lima.
6‘Inā tepa a‘e ia ‘outou i le lagi,
ma va‘ai i le lalolagi i lalō;
auā e mavae atu le lagi e pei o le asu,
e pala le lalolagi e pei o le ‘ofu.
E fa‘apenā lava ‘ona oti o ē nonofo ai;
a o la‘u fa‘aolataga e fa‘avavau lava lea,
ma le amiotonu mai ‘iā te a‘u e le gausia lava lea.
7Fa‘alogo mai ia ‘iā te a‘u,
‘outou o ē ‘ua iloa le amiotonu,
o le nu‘u ‘ua i o latou loto la‘u tulafono.
‘Aua le fefefe i le fa‘alumaina mai e tagata;
‘aua fo‘i le fa‘avaivai i lo latou fāifai mai.
8Auā e ‘aina i latou e le mogamoga e pei o le ‘ofu,
e ‘aina fo‘i i latou e le pepe e pei o fulufulu mamoe;
A o lē amiotonu mai ‘iā te a‘u e fa‘avavau lava lea,
ma la‘u fa‘aolataga e autupulagā lea.
9Ala mai ia, ‘inā ala mai,
‘Ia ‘ofu i le malosi, o oe na le ‘a‘ao o le ALI‘I;
ala mai ia e pei o aso anamua.
O tupulaga o le vavau; e lē o oe ‘ea lē na fasiotia Raava,
o lē na manu‘a ai le tanimo?
10E lē o oe ‘ea na pa‘umatū ai le sami,
o le suāsami o le moana sāusau?
O lē na faia mea loloto i le sami
ma ala e ui ai ē ‘ua fa‘atauina?
11E fo‘i mai ē ‘ua togiolaina e le ALI‘I,
latou te ō mai fo‘i i Siona ma le ‘alaga
ma le ‘oli‘oli e fa‘avavau i luga i o latou ulu;
Latou te maua le ‘oli‘oli ma le fiafia;
‘ae sōsōla ‘ese lē fa‘anoanoa ma le mapuitigā.
12O a‘u, o a‘u lava lē fa‘amafanafana ‘iā te ‘outou;
o ai ‘ea oe ‘e te fefe i le tagata e oti,
ma le atali‘i o le tagata e ‘avea o ia e pei o le mutia.
13‘Ua galo fo‘i ‘iā te oe o le ALI‘I o lē na faia oe,
o lē na fofola le lagi, ma fa‘avaeina le lalolagi.
‘Ua e fefe pea i aso uma ‘ona o le ita o lē fa‘asauā,
‘ina ‘ua sauni o ia e fasioti;
a o ifea le ita o lē fa‘asauā?
14O lē ‘ua fa‘ano‘uno‘u ‘ina ‘ua fusifusia
e fa‘avave o ia ‘ina ‘ia tatalaina,
‘ia lē oti fo‘i o ia i le lua,
‘ia lē oge fo‘i i ni mea e ‘ai.
15O a‘u fo‘i o le ALI‘I lou Atua,
o lē e laolao ai le sami pe a ū mai ona peau;
o le ALI‘I o ‘au o lona igoa lea.
16‘Ua ‘ou tu‘uina atu a‘u ‘upu i lou gutu,
‘ua ‘ou ufiufi fo‘i ‘iā te oe i le paolo o lo‘u lima,
e fa‘atumau ai le lagi, ma fa‘avaeina le lalolagi,
e fai atu fo‘i ia Siona, “O lo‘u nu‘u lava oe.”
‘Ua Uma le Puapuagā o Ierusalema17Ala mai ia, ‘inā ala mai; ‘inā tula‘i mai oe Ierusalema,
‘ua e inu nai le lima o le ALI‘I le ipu o lona ita;
‘Ua e inu i le ipu o le ipu e tautevateva ai,
‘ua e inu uma ai lava.
18‘Ua leai se tasi o ana tama uma na ia fānaua na te ta‘ita‘iina o ia;
‘ua leai fo‘i se tasi o ana tama uma na ia tausia
na te tago atu i lona lima.
19‘Ua o‘o mai ‘iā te oe o nei mea e lua;
o ai ‘ea sē na te fa‘amafanafana ‘iā te oe?
O le fa‘atafunaina ma le lepetia,
o le oge ma le pelu; o ai ‘ea?
‘Ou te fa‘amatalaloto ‘iā te oe.
20‘Ua matapogia au tama,
o lo‘o ta‘atitia i latou i mea e amata mai ai ala uma,
e pei o le teō i le ‘upega;
‘Ua tūtūmu i latou i le to‘asā o le ALI‘I,
o le a‘oa‘iga mai lou Atua.
21O le mea lea, se‘i e fa‘alogo mai ai i lenei mea,
o oe le ‘ua tigā ma ‘onā, ‘ae lē o le uaina.
22O lo‘o fa‘apea ‘ona fetalai mai o lou Ali‘i le ALI‘I, o lou Atua fo‘i,
o lē na te faia finauga a lona nu‘u.
Fa‘auta, ‘ou te ‘ave ‘ese i lou lima le ipu e tautevateva ai,
o le ipu, o le ipu lava o lo‘u ita; ‘e te lē toe inu ai lava.
23A ‘ou te tu‘u atu ai i lima o ē fa‘atigā ‘iā te oe,
o ē na fai mai ‘iā te oe.
“Ifo ia, ‘ina ‘ia matou ui atu ai;”
‘ona fai lea o lou tua e pei o le ‘ele‘ele,
e pei o le ala fo‘i i ē sāvali i ai.
Who We AreWhat We EelieveWhat We Do
2025 by iamachristian.org,Inc All rights reserved.
