1‘Ona ala usu atu ai lea o Ierupaala, o Kitiona lava lea, ma le nu‘u uma na ‘iā te ia, ‘ua ia tolauapi e latalata ane i le vaipuna i Hareta; sa i ai le itūtau‘a a Mitiana i le itū atu i matū ‘iā i latou, e latalata ane i le mauga o More i le vanu.
2‘Ua fetalai mai le ALI‘I ‘iā Kitiona, “E to‘atele na‘uā le nu‘u o lo‘o ‘iā te oe; ‘ou te lē tu‘uina atu Mitiana i o latou lima, ne‘i mitamita mai Isaraelu, i o‘u luma e fa‘apea mai, ‘O lo‘u lava lima ‘ua ola ai a‘u.’
4‘Ona fetalai mai ai lea o le ALI‘I ‘iā Kitiona, “E to‘atele pea le nu‘u; ‘ia e ‘aveina ifo i latou i le vai, ‘ona ‘ou tofotofoina ai lea o i latou mo oe i lea mea; o le ‘ou te fai atu ai ‘iā te oe, ‘Lua te ō ma lenei,’ ‘ona ‘oulua ō ai lea ma ia; o le ‘ou te fai atu ai fo‘i ‘iā te oe, ‘Lua te lē ō ma lenei,’ ‘ona lē alu ai lea o ia.”
5‘Ua ‘aveina ifo e ia le nu‘u i le vai, ‘ona fetalai mai ai lea o le ALI‘I ‘iā Kitiona, “O i latou uma o ē etoeto i o latou laulaufaiva i le vai, e pei ‘ona etoeto o le ulī, ‘e te tu‘u‘ese atu ‘iā te i latou; e fa‘apea fo‘i i latou uma o ē to‘otuli e inu ai.”
6‘Ua faitauina e ‘ua tu‘u o latou lima i o latou gutu, ma etoeto ai le vai, ‘ua tolu selau o ia tagata; a o le nu‘u uma ‘ua totoe, ‘ua latou to‘otuli e inu i le vai.
7‘Ona fetalai mai ai lea o le ALI‘I ‘iā Kitiona, “O le tolu selau o tagata e ‘ua etoeto i le vai ‘ou te fa‘aola ai ‘iā te ‘outou, ma tu‘uina atu Mitiana i lou lima; a o le nu‘u uma ‘ua totoe, ‘ia ta‘itasi ma alu i lona nu‘u.”
13‘Ua o‘o atu Kitiona, fa‘auta, o lo‘o ta‘u atu e le tasi tagata o lana miti i le tasi, ‘ua fa‘apea atu, “Fa‘auta, na fai la‘u miti; fa‘auta fo‘i, na ta‘avalevale le tasi pōtoi karite i le itūtau‘a a Mitiana, ‘ua o‘o i le tasi fale ‘ie, ‘ua to‘ia ai, ‘ona pa‘ū ai lea, ‘ua mafuli i lalo, ‘ua ta‘atia lava le fale ‘ie.”
14‘Ona tali mai ai lea o le tasi, “E leai se isi mea lenei, ‘ua na o le pelu a Kitiona le atali‘i o Ioasa, o le tagata o Isaraelu lea ‘ua tu‘uina atu e le Atua i lona lima o Mitiana ma le itūtau‘a uma.”
15‘Ua fa‘alogo Kitiona i le tala o le miti ma lona fa‘amatalaga, ‘ona ifo ai lea o ia i le Atua. ‘Ua toe fo‘i atu i le itūtau‘a a Isaraelu, ‘ua ia fa‘apea atu ai, “Tutū mai ia, auā ‘ua tu‘uina mai i o ‘outou lima e le ALI‘I o le itūtau‘a a Mitiana.”
16‘Ua ia vāea le tolu o selau i ‘au e tolu; ‘ua ia avatu fo‘i pū i lima o i latou uma, ma kate le i‘i‘o, ma sulu i totonu o kate.
17‘Ua ia fa‘apea atu ‘iā i latou, “‘Ia ‘outou va‘ava‘ai mai ‘iā te a‘u, ma ‘ia fa‘aa‘oa‘o mai ai lava; fa‘auta fo‘i, a a‘u o‘o i le togālauapi e pito mai, ‘ona ‘outou faia lava lea e pei ‘ona ‘ou faia.
18A matou ilia pū, o a‘u ma i latou uma o ‘iā te a‘u, o ‘outou fo‘i tou te ilia pū ‘ia so‘o lava le togālauapi uma, ma ‘outou fai ane, ‘O le pelu a le ALI‘I ma Kitiona.’”
19‘Ona o‘o atu lea o Kitiona ma tagata e to‘aselau ‘ua ‘iā te ia i le togālauapi e pito mai, i le amataga o le leoleoga i le itū po vaeloto; ‘ua latou fa‘ato‘ā laga mata moe; ‘ona latou ilia lava lea o pū, ma ta‘ei i kate i o latou lima.
20‘Ona ilia lea o pū e ‘au e tolu, ma latou ta‘ei i kate, ‘ua u‘u fo‘i sulu i o latou lima tauagavale, o pū fo‘i i o latou lima taumatau e ili ai; ‘ona latou ‘alalaga atu ai lea, “O le pelu a le ALI‘I ma Kitiona.”
21‘Ua latou tutū e ta‘itasi i le mea sa i ai e si‘o ai le togālauapi, ‘ona taufetuli ai lea o le itūtau‘a uma, ‘ua ‘alalaga, ‘ua sōsōla lava.
22‘Ua ilia pū e le tolu selau, ‘ona fa‘ao‘o atu ai lea e le ALI‘I o le pelu a le tasi i le tasi i le itūtau‘a uma; ‘ona sōsōla ai lea o le itūtau‘a i Peteseta i Sererata ‘ua o‘o i le tuā‘oi o Apelemeola, e lata ane i Tapata.
23‘Ua fa‘apotopotoina tagata o Isaraelu mai Nafatali, ma Asera, ma Manase uma lava, ‘ona latou tuliloaina ai lea o Mitiana.
24‘Ua ‘a‘auina atu fo‘i e Kitiona o savali i le mauga uma o Efaraima, ‘ua fa‘apea atu, “‘Inā fa‘aifo ia, e pupuni ‘iā Mitiana, ‘ia muamua ‘iā te i latou, ma ‘ia ‘outou maua ai le vai, e o‘o atu i Petepara ma Ioritana.” ‘Ona fa‘apotopoto ai lea o tagata uma o Efaraima, ma latou maua le vai e o‘o atu i Petepara ma Ioritana.
25‘Ona latou maua ai lea o tamaali‘i o Mitiana e to‘alua, o Oreva ma Seeva; ‘ua latou fasia fo‘i Oreva i luga o le papa o Oreva, o Seeva fo‘i ‘ua latou fasia i le mea e soli ai vine o Seeva; ‘ua latou tuliloa ‘iā Mitiana. ‘Ua latou avatu ulu o Oreva ma Seeva ‘iā Kitiona i le la itū o Ioritana.
Who We AreWhat We EelieveWhat We Do
2025 by iamachristian.org,Inc All rights reserved.
