Fa‘ata‘oto 8 - Revised Samoan Catholic Bible

O le Silisili o le Aogā o le Poto

1E lē ‘ua vala‘au ‘ea le poto

ma leo tele mai le fa‘autauta?

2O lo‘o tu o ia i le tumutumu o mea maualuga

i tafatafa ane o le ala, i le fetaulaigāala.

3‘Ua ‘alaga o ia i le itū o le puipui,

i le ala o le ‘a‘ai,

i le mea e ui atu ai i le faitoto‘a.

4“‘Ou te vala‘au ‘iā te ‘outou tagata;

ma ‘ou leo tele atu i le fānau a tagata.

5‘Outou ē faigofie e,

‘ia ‘outou iloa le fa‘autauta;

ma ‘outou ē vālelea, ‘ia loto matala ‘outou.

6‘Ia ‘outou fa‘alogologo mai,

auā ‘ou te tautalatala i mea sili;

e tautala o‘u laugutu i mea tonu.

7Auā e tautala lo‘u gutu ma le fa‘amaoni;

a o le amio leaga, e ‘inosia lea i o‘u laugutu.

8O ‘upu uma a lo‘u gutu ‘ua tonu ia;

e lē o i ai se ‘upu fa‘a‘ole‘ole ma le fa‘api‘opi‘o.

9E sa‘o uma lava ia i lē ‘ua lagona;

e tonu fo‘i i ē ‘ua maua le poto.

10‘Ia ‘outou talia la‘u a‘oa‘o atu, ‘ae ‘aua i le ario;

ma ia talia le poto e sili i le auro e aupito lelei.

11Auā e sili ‘ona lelei le poto i penina;

ma mea fa‘afiafia uma lava e lē tusa ma ia.

12O a‘u o le poto ma te mau ma le fa‘autauta;

‘ou te maua fo‘i le poto i mafaufau.

13O le mata‘u i le ALI‘I, o le ‘ino‘ino lea i le leaga;

o le fa‘amaualuga ma le loto fefete,

ma le amio leaga, ma le gutu fa‘api‘opi‘o,

‘ou te ‘ino‘ino i ai.

14‘Ua ‘iā te a‘u le mafaufau ma le poto;

o a‘u nei lē atamai, ‘ua ‘iā te a‘u le malosi.

15O a‘u e tupu ai tupu;

e pule tonu ai fo‘i ali‘i.

16O a‘u e ali‘i ai ali‘i sili ma ali‘i,

o fa‘amasino uma o le lalolagi.

17‘Ou te alofa atu ‘iā i latou o ē alofa mai ‘iā te a‘u;

o ē sā‘ili‘ili mai fo‘i ‘iā te a‘u,

latou te maua a‘u.

18O lo‘o ‘iā te a‘u le ‘oloa ma le mamalu;

o le ‘oloa ‘anagatā ma le amiotonu.

19O la‘u fua e sili ‘ona lelei lea i le auro,

o le auro lelei lava;

o mea fo‘i e tupu mai ‘iā te a‘u,

e sili ‘ona lelei ia i le ario sili.

20‘Ou te savali i le ala o le amiotonu,

i magāala o le fa‘amasinoga.

21‘Ina ‘ia ‘ou avatua le ‘oloa i ē ‘ua alofa ‘iā te a‘u,

‘ia fai mo latou; ‘ou te fa‘atumuina fo‘i mea e teu ai o latou ‘oa.

22O le ALI‘I e ona lava a‘u,

o le amataga o lona ala,

e muamua i ana galuega anamua.

23Na fa‘au‘uina a‘u mai le vavau,

mai le amataga, a o leai se lalolagi.

24Na fānaua a‘u, a o leai ni mea loloto;

a o leai fo‘i ni puna e puna tele mai ai le vai.

25Sa fānaua a‘u, a o le‘i fa‘avaeina mauga,

e leai fo‘i ni mauga iti;

26a o le‘i faia e ia le lau‘ele‘ele ma le vao,

ma le tumutumu o le efu o le lalolagi.

27A o fa‘atumauina e ia le lagi na ‘ou i ai,

‘ina o tusi fa‘ata‘ali‘oli‘o e ia i luga o le fogātai.

28A o fa‘amauina e ia o ao i luga;

a o fa‘amauina e ia o puna o le moana.

29A o tofia e ia le tuā‘oi o le sami,

‘ia lē sopo‘ia e lona suāsami lona matāfaga;

a o tusia e ia fa‘avae o le lalolagi;

30na ‘ou i ai ma ia, o a‘u o le tufuga;

na fai fo‘i a‘u mōna fiafia i lea aso ma lea aso;

sa ‘ou ‘oli‘oli i ona luma i aso uma lava.

31Sa ‘ou ‘oli‘oli i mea e mau ai tagata i lona lalolagi;

o lo‘u fiafia fo‘i, sa i le fānau o tagata lea.

32“O lenei, le fānau e,

fa‘alogologo mai ia ‘iā te a‘u;

‘amu‘ia lava i latou o ē tausi i o‘u ala.

33‘Ia ‘outou fa‘alogologo i mea e a‘oa‘o atu,

‘ia ‘outou popoto ai; ‘aua fo‘i le te‘ena.

34‘Amu‘ia le tagata ‘ua fa‘alogologo mai ‘iā te a‘u;

o lo‘o mataala i ‘ou puipui i lea aso ma lea aso;

o lo‘o leoleo i pou o o‘u faitoto‘a.

35Auā o lē ‘ua maua a‘u, ‘ua maua e ia le ola;

e maua fo‘i e ia le alofa mai i le ALI‘I.

36A o lē agasala mai ‘iā te a‘u,

‘ua fa‘asaunoa e ia lona lava ola;

‘atoa uma o ē ‘ino‘ino ‘iā te a‘u,

‘ua latou manana‘o i le oti.”