Salāmo 144 - Revised Samoan Catholic Bible

O le Tatalo ‘ina ‘ia ManuiaO le Salāmo a Tavita

1‘Ia fa‘afetaia le ALI‘I lo‘u papa,

o lē a‘oa‘o mai i o‘u lima i le tau‘a,

ma ‘ou tamatama‘i lima e tau a‘i le tau‘a.

2O le alofa mai ‘iā te a‘u; o lo‘u ‘olo fo‘i o ia,

o lo‘u ‘olo maualuga, o lo‘u fa‘aolataga,

o lo‘u talitā, o ia fo‘i ‘ou te fa‘atuatua i ai.

O lē na te fa‘ato‘ilaloina lo‘u nu‘u ‘iā te a‘u.

3Le ALI‘I e,

se a ‘ea le tagata ‘e te silafia ai o ia?

po o le atali‘i o le tagata ‘e te manatua mai ai o ia?

4O le tagata o lo‘o tusa ia ma le mea le aogā;

o ona aso e pei o le ata a mavae atu.

5Le ALI‘I e,

‘inā lolo‘u ifo ia lou lagi ma ‘ia e afio ifo;

‘ia papa‘i ifo i mauga, ‘ona pupusa ai lea.

6‘Ia e matuā fa‘a‘emo mai le uila,

ma fa‘ata‘ape‘ape ai ‘iā te i latou;

‘ia e fanafana atu au ū, ma tuli ai ‘iā te i latou.

7Tu‘u mai ia ou ‘a‘ao mai lugā, lavea‘i mai ia ‘iā te a‘u,

fa‘aola mai ia ‘iā te a‘u i vai e tele,

o lima o tagata ‘ese;

8o ē lafo ‘upu pepelo i o latou gutu;

o latou lima taumatau fo‘i o lima taumatau pepelo ia.

9Le Atua e,

‘ou te pese i le pese fou ‘iā te oe;

‘ou te fai pesega ‘iā te oe i le napeli e sefulu ona manoa.

10O lē na te avatua le olataga i tupu;

o lē lavea‘i i lana ‘au‘auna o Tavita a‘i le pelu e leaga ai.

11‘Ia e lavea‘i mai ‘iā te a‘u,

ma fa‘aola mai ‘iā te a‘u a‘i lima o tagata ‘ese,

o ē lafo ‘upu pepelo i o latou gutu;

o latou lima taumatau fo‘i o lima taumatau pepelo ia.

12‘Ina ‘ia ‘avea o matou atali‘i pei o la‘au totō,

‘ua tupu tele a o taulele‘a i latou;

o matou afafine ‘ia pei o tulimanu

‘ua togitogiina e pei o se maota.

13‘Ia tūtūmu o matou fale saito

e maua mai ai lea mea ma lea mea;

‘ia tutupu a matou mamoe ‘ia afe

ma mano i o matou fanua.

14‘Ia malolosi a matou povi i amo;

‘ia lē oso mai, ‘ia lē alu ‘ese atu;

‘ia leai fo‘i se auega i o matou malae.

15‘Amu‘ia le nu‘u o lo‘o fa‘apenā i latou;

‘amu‘ia le nu‘u e fai le ALI‘I mo latou Atua.