Sirako 49 - Revised Samoan Catholic Bible

O Iosia

1O le fa‘amanatuina o Iosia ‘ua ‘avea ma se paluga o mea manogi,

o le galuega a lē fai mea manogi.

2E suamalie e pei o le meli i laugutu uma le fa‘amanatuina o ia,

e pei fo‘i o se fati mālie i se faigā‘ai e inua ai le uaina.

3Na tofia o ia e le Atua e fa‘atupu le salamō o le nu‘u

ma ‘ua ‘ave‘esea e ia o mea ‘inosia a ē amio leaga.

4Na ia ua‘i atu lona loto i le Ali‘i ma ‘ua na fa‘amausalī le amiotonu i aso sa faula‘i ai agasala.

O Ieremia

5O Tavita, Esekia ma Iosia ‘ua vavae‘eseina i latou,

a o isi tupu o Iuta ‘ua latou faia uma lava le agasala;

6auā ‘ua latou tu‘ulafoa‘i le tulafono a le Silisili‘ese

ma ‘ua latou ta‘ufa‘atauva‘a le mata‘u i le Atua.

7‘Ua latou tu‘uina atu lo latou mālō i tagata ‘ese,

o lo latou mamalu fo‘i i se nu‘u ‘ese,

8na latou susunuina le ‘a‘ai na filifilia ‘ia tu‘u i ai le mea pa‘ia

ma ‘ua latou fa‘agaogao ona auala ‘ona o Ieremia,

9auā na latou taufa‘ataugā ‘iā te ia,

o ia na fa‘apa‘iaina e fai ma perofeta a o le‘i fānau mai o ia,

‘ina ‘ia lia‘iina e ia ma lepetia ma fa‘aumatia,

‘ia toe fa‘atūina fo‘i e ia ma fa‘afouina. O Esekielu

10Na iloa e Esekielu le fa‘aaliga o le mamalu na fa‘aalia ‘iā te ia i le nofoa fa‘ata‘avalevale a le ‘au kerupi.

11Auā ‘ua na manatua o fili i timuga tetele,

‘ua agalelei atu i ē fa‘asino i ala tonu.

O Perofeta e To‘asefulu ma le Lua

12A o ivi o perofeta e to‘asefulu ma le to‘alua,

‘ia fua mai ni fua i o latou tu‘ugamau,

auā ‘ua latou fa‘amalosia o Iakopo,

‘ua latou fa‘aola ‘iā te ia i le fa‘atuatua mausalī. O Serupapelu

13Tatou te fa‘alupe fa‘apefea ‘iā Serupapelu?

Auā ‘ua pei o se mama fa‘amaufa‘ailoga i le lima taumatau. O Iosua

14E fa‘apea fo‘i o Iosua le atali‘i o Iosatako,

na latou ati a‘e i o latou lava aso le maota,

ma fa‘atū le malumalu pa‘ia i le Ali‘i,

o saunia mo se mamalu e fa‘avavau.

O Neemia

15E fa‘apea o Neemia, e manatua o ia i aso e tele,

o lē ‘ua toe atiina a‘e mo i tatou o ‘aupā vali sa lepetia

ma ‘ua na toe fa‘atū o puipui ma fa‘amau fa‘alava, toe ati a‘e o tatou fale.

O Enoka

16‘Ua leai se tasi e pei o Enoka o ē na fānanau mai i le lalolagi,

auā o ia ‘ua ‘avea nai le lalolagi. O Iosefa

17‘Ua leai se tasi e pei o Iosefa, lē na fānau mai e fai ma ali‘i o ona uso ma fa‘alagolago o le ‘āiga,

o le ta‘ita‘i o ona uso, o le fa‘amausaliga o le nu‘u.

18Na tausia ma le āva o ona ivi,

‘ua fai ai o valo‘aga ‘ina ‘ua maliu o ia. O Semu ma Setu

19O Semu ma Setu ‘ua fa‘amamaluina i lā‘ua i tagata,

a ‘ua sili pea lava i tagata uma o Atamu, o ia o le tupuga.