Iopu 38 - Revised Samoan Catholic Bible

O le Afioga a le Atua ‘iā Iopu

1‘Ona tali mai ai lea o le ALI‘I ‘iā Iopu mai le afā, ‘ua fa‘apea mai:

O le Ali‘i

2“O ai ‘ea lenei ‘ua na fa‘apouliuligia la‘u pule,

i ‘upu e lē o i ai le poto?

3‘Inā fusi ia lou sulugātiti e pei o le tagata malosi;

‘ou te fesili atu fo‘i ‘iā te oe, ‘inā e fa‘ailoa mai ia ‘iā te a‘u.

4“O ifea sa e i ai ‘ina o ‘ou fa‘avaeina le lalolagi?

‘Inā fa‘aali mai ia pe ‘āfai ‘ua e iloa mafaufau.

5O ai ‘ea na ia fuafuaina ai, pe ‘āfai ‘ua e iloa?

O ai fo‘i ‘ua na fa‘ata‘oto i ai le fua?

6‘Ua tu‘uina ‘ea ona fa‘avae i luga o le a?

O ai ‘ea fo‘i na na tu‘uina ifo lona ma‘a tulimanu;

7‘ina o pepese fa‘atasi fetū o le taeao,

ma ‘alalaga fiafia atali‘i uma o le Atua.

8“O ai fo‘i na ia pupuni le sami i puipui ‘ina ‘ua o‘o mai,

e peiseaī na sau mai le manava?

9‘Ina ‘ua ‘ou faia le ao mōna ‘ofu,

ma le pogisā ma mea e aui ai;

10‘ina ‘ua ‘ou tu‘u atu i ai fo‘i ona tuā‘oi,

ma avane i ai fa‘amaufa‘alava ma puipui;

11ma ‘ou fai atu i ai,

‘‘E te o‘o mai ‘i‘inei, a ‘e te lē sopo‘ia;

o ‘i‘inei fo‘i e pau mai ai ou galu fa‘amaualuluga.’

12“Talu le amataga o ou aso ‘ua e pule ‘ea i le taeao?

‘Ua e fa‘asino atu ‘ea i le tafa o ata le mea e aliali mai ai.

13‘Ina ‘ia tago atu i tulu‘iga o le lalolagi,

ma ‘ia lūlū‘eseina ai o ē amio leaga?

14E liua o ia e pei o le ‘omea i le fa‘amaufa‘ailoga,

‘ona latou tutū mai ai lea e pei se ‘ofu.

15E ‘ave‘esea fo‘i i ē amio leaga lo latou malamalama,

‘ua gauia fo‘i le lima o lē ‘ua fa‘amaualuga.

16“‘Ua e o‘o atu ‘ea i puna o le sami?

po ‘ua e fealualua‘i ‘ea i mea loloto o le moana?

17‘Ua fa‘aalia ‘ea ‘iā te oe faitoto‘a o le oti?

po ‘ua e iloa ‘ea faitoto‘a o le ata o le oti?

18‘Ua e mafaufau ‘ea i le lautele o le lalolagi?

‘Inā fa‘aali mai ia, pe ‘āfai na e iloa ia mea uma.

19“O ifea le ala i le mea e nofo ai le malamalama?

O le pouliuli fo‘i o ifea le mea e mau ai o ia.

20‘Ina ‘ia e momoli atu ai i lona tuā‘oi,

‘ina ‘ia e iloa fo‘i le ala i lona fale?

21‘Ua e iloa ‘ea ia mea ‘ina ‘ua fānau mai oe i ia ona po,

‘ina ‘ua tele fo‘i le faitau o ou aso?

22“‘Ua e ulu atu ‘ea i mea e teu ai le kiona?

‘ua e va‘aia ‘ea fo‘i mea e teu ai le uato‘a?

23O mea ia ‘ua ‘ou tu‘u ma ona po o le puapuagā,

ma le aso e tau ai le tau‘a.

24O ifea le ala e vaevaeina atu ai le malamalama,

e fa‘asalalauina ai le matagi mai sasa‘e i luga o le lalolagi?

25“O ai ‘ua vaevaeina o alāvai mo uaga,

ma le ala mo le uila o le faititili?

26‘Ina ‘ia tō mai le ua i le lau‘ele‘ele,

e lē o i ai se tagata; ma le vao, e lē ‘ainā e tagata,

27‘ina ‘ia mālie ai le mea ‘ua ta‘aligoligoa ma le mea ‘ua gaogao;

‘ina ‘ia fa‘atupuina ai fo‘i le vao iti.

28“E i ai ‘ea se tamā o le timu?

po o ai ‘ua fānaua le suāsau?

29E sau ‘ea le vaito‘a mai le manava o ai?

O le sauto‘a fo‘i mai le lagi o ai ‘ea na na fānaua?

30‘Ua ufitia le vai e peiseaī se ma‘a,

‘ua to‘a fo‘i le fogātai.

31“‘E te mafai ‘ea ‘ona nonoa i noataga o Kima?

Pe ‘e te mafaia fo‘i ‘ona tatala i fusi o Kisila?

32‘E te mafaia ‘ea ‘ona fa‘ao‘oina mai o Masarota i ona lava po?

Pe ‘e te mafaia fo‘i ‘ona ta‘ita‘iina o Asa fa‘atasi ma lana fānau?

33‘Ua e iloa ‘ea tulafono i le lagi?

Pe na e tu‘uina atu ‘ea lana pule i le lalolagi?

34“‘E te mafaia ‘ea ‘ona fa‘ao‘oina atu lou leo i ao,

‘ia lofia ai oe i vai e tele?

35‘E te mafaia ‘ea ‘ona ‘a‘auina atu o uila,

latou te ō ai ma latou fai mai ‘iā te oe,

‘Fa‘auta, o i matou nei?’

36O ai ‘ea ‘ua tu‘uina atu le poto i totonu o le tagata?

Po ai fo‘i ‘ua na avatu le mafaufau i le loto?

37O ai na te mafaia ‘ona faitau o ao i lona poto?

Po ai fo‘i na te mafaia ‘ona liligi ifo o fagu o le lagi,

38pe a liu palapala le efuefu

ma ‘ua pipi‘i fa‘atasi le ‘ele‘ele?

39“‘E te mafaia ‘ea ‘ona tuli o se manu ‘ia saeia mā le leona?

pe ‘e te fa‘amā‘o‘ona i leona ta‘anoa,

40a o latou fa‘apuga i o latou ana,

ma nofo lamalama i mea latou te fale ai?

41O ai ‘ea na te sauni mā le oreva lana mea e ‘ai,

pe a fētāgisi atu ana tama i le Atua,

a o sē i latou ‘ina ‘ua leai se mea e ‘ai?