Salāmo 34 - Revised Samoan Catholic Bible

O le Fa‘amanū a Tavita i le ALI‘I i lona Fesoasoani ‘iā te IaO le salāmo a Tavita ‘ina ‘ua fa‘atagā amio valea o ia i luma o Apimeleko, ‘ona tuli ai lea o ia ‘iā te ia, ‘ona alu ‘ese ai lea o ia

1‘Ou te fa‘afetai i le ALI‘I i aso uma lava;

e lē aunoa ona vi‘iga i lo‘u gutu.

2E mitamita lo‘u agaga i le ALI‘I;

e fa‘alogologo i ai ē ‘ua puapuagātia,

‘ona latou fiafia ai lea.

3‘Ia ‘outou fa‘ane‘ene‘e atu i le ALI‘I fa‘atasi ma a‘u;

ma ‘ia tatou vivi‘i fa‘atasi i lona suafa.

4Na ‘ou sā‘ili atu i le ALI‘I,

‘ona tali mai ai lea o ia ‘iā te a‘u,

ma na lavea‘iina a‘u a‘i mea uma na ‘ou fefe ai.

5Na latou va‘ava‘ai atu ‘iā te ia,

‘ona fa‘a‘oli‘oliina lea o i latou;

e lē mā fo‘i o latou mata.

6Na vala‘au atu lenei tagata ‘ua tigāina,

‘ona fa‘afofoga mai ai lea o le ALI‘I,

ma na fa‘aola ‘iā te ia i ona puapuagā uma lava.

7E tolauapi le agelu a le ALI‘I,

e si‘osi‘omia ai ē o matata‘u ‘iā te ia,

e lavea‘i fo‘i o ia ‘iā te i latou.

8‘Inā tofotofo ia ‘outou,

ma ‘ia ‘outou iloa e lelei le ALI‘I;

‘amu‘ia lava le tagata o lē fa‘atuatua ‘iā te ia.

9O ‘outou nā o ona tagata pa‘ia,

‘ia ‘outou matata‘u i le ALI‘I,

auā e leai se mea e mativa ai ē ‘ua matata‘u ‘iā te ia.

10E oge mea leona ta‘anoa ma latou fia ‘a‘ai;

‘ae e leai se mea lelei e mativa ai i latou o ē sā‘ili i le ALI‘I.

11Le fānau e, ‘inā ō mai ia,

‘inā fa‘alogologo mai ia ‘iā te a‘u;

‘ou te a‘oa‘o atu ‘iā te ‘outou ‘ia matata‘u i le ALI‘I.

12O ai ‘ea le tagata ‘ua mana‘o i le ola,

ma ‘ua loto ‘ia tele ona aso, ‘ia iloa ai e ia mea lelei?

13‘Aua ne‘i tautala lo‘u laulaufaiva i ‘upu leaga,

ma ou laugutu ne‘i tautala fa‘a‘ole‘ole.

14‘Inā ‘alo ‘ese ia i mea leaga, a ‘ia fai mea lelei;

‘inā sā‘ili‘ili atu ia i le filemū ma tausisi i ai.

15O fofoga o le ALI‘I o lo‘o fa‘asaga i ē amiotonu,

e liliu mai fo‘i ona taliga ‘iā latou ‘alaga.

16A o fofoga o le ALI‘I, o lo‘o fa‘asaga i ē fai amio leaga,

‘ina ‘ia tineia le fa‘amanatuina o i latou a‘i le lalolagi.

17‘Ua ‘alalaga ē ‘ua amiotonu,

‘ona fa‘afofoga mai ai lea o le ALI‘I;

‘ua ia lavea‘i mai fo‘i ‘iā te i latou a‘i o latou puapuagā uma.

18‘Ua latalata mai le ALI‘I i ē ‘ua loto momomo;

‘ua ia fa‘aola fo‘i i ē ‘ua loto nutimomoia.

19E tele lava mea leaga e o‘o i lē ‘ua amiotonu;

‘ae lavea‘iina o ia e le ALI‘I a‘i ia mea uma.

20E leoleoina e ia o ona ivi uma;

e lē gau lava se tasi.

21E fasiotia e le malaia lē ‘ua amio leaga;

o i latou fo‘i ē ‘ua ‘ino‘ino i lē ‘ua amiotonu e fa‘asalaina i latou.

22E lavea‘iina e le ALI‘I o agaga o ana ‘au‘auna;

e lē fa‘asalaina fo‘i so latou o ē fa‘atuatua ‘iā te ia.