1‘Aua ne‘i ‘iā te i matou, le ALI‘I e,
‘aua ne‘i ‘iā te i matou, a ‘ia tu‘uina atu le vi‘iga i lou suafa,
‘ona o lou alofa ma lou fa‘amaoni.
2Se a le mea e fai mai ai nu‘u ‘ese,
“O ifea o i ai lo latou Atua?”
3A o lo matou Atua, o i le lagi lava ia;
‘ua faia e ia o mea uma ‘ua ia finagalo i ai.
4O latou tupua, o ario ma auro ia,
o le galuega a lima o tagata.
5E fai o latou gutu, ‘ae lē gagana i latou;
e fai o latou mata, ‘ae lē va‘ai i latou.
6E fai o latou taliga, ‘ae lē fa‘alogo i latou;
e fai o latou isu, ‘ae lē sogisogi i latou.
7E fai o latou lima, ‘ae lē fetāgofi i latou;
e fai o latou vae, ‘ae lē sāvavali i latou;
e leai se leo i o latou fa‘aī.
8O ē faia ia mea ‘ua tutusa lava ma i latou;
o i latou uma o ē fa‘atuatua i ai.
9Isaraelu e, ‘ia e fa‘atuatua i le ALI‘I;
o ia lava lo latou fesoasoani ma lo latou talitā.
10Le ‘āiga o Arona e, fa‘atuatua ia ‘outou i le ALI‘I;
o ia lava lo latou fesoasoani ma lo latou talitā.
11‘Outou na, o ē matata‘u i le ALI‘I,
‘inā fa‘atuatua ia i le ALI‘I;
o ia lava lo latou fesoasoani ma lo latou talitā.
12‘Ua manatu mai le ALI‘I ‘iā i tatou;
e fa‘amanūina mai e ia;
e fa‘amanuia e ia le ‘āiga o Isaraelu;
e fa‘amanuia e ia le ‘āiga o Arona.
13E fa‘amanuia mai e ia i ē matata‘u i le ALI‘I,
o tagatanu‘u ‘atoa ma ali‘i.
14E fa‘aopoopoina ‘iā te ‘outou e le ALI‘I,
o ‘outou ‘atoa ma la ‘outou fānau.
15O lo‘o fa‘amanuia mai ‘outou e le ALI‘I,
o lē na faia le lagi ‘atoa ma le lalolagi.
16O le lagi, o le lagi lava, e i le ALI‘I lea;
a ‘ua tu‘uina mai e ia le lalolagi mo le fānau a tagata.
17E lē vivi‘i atu i le ALI‘I ē ‘ua oti,
ma i latou uma o ē ō ifo i le mea ta‘aligoligoa.
18A o i tatou nei, tatou te fa‘amanū atu i le ALI‘I,
e āfua mai nei lava, ‘ae o‘o i le fa‘avavau.
‘Ia ‘outou vivi‘i atu i le ALI‘I.
Who We AreWhat We EelieveWhat We Do
2025 by iamachristian.org,Inc All rights reserved.
