Poto 7 - Revised Samoan Catholic Bible

O ‘Upu a Solomona e Vi‘ia ai le Poto

1O a‘u fo‘i o le tagata ‘augavale, e tusa ma tagata uma,

‘ua ‘ou tupu mai i le ulua‘i tagata na faia o ia i le ‘ele‘ele;

‘ua gaosia lo‘u tino i le manava o lo‘u tinā;

2e tusa ma masina e sefulu ‘ua fa‘ato‘aina ai a‘u i le toto,

i le galuega a le tino o le tagata, i le filemū o le itūpō e moe ai.

3‘Ua fānau lava a‘u, ‘ona ‘ou mānava ai fo‘i lea i le ‘ea faitele;

‘ua fa‘apa‘ūina o a‘u i le ‘ele‘ele e tasi e pei fo‘i o isi tagata;

o le tagi lava na ‘ou mua‘i si‘i ai lo‘u leo.

4O le ‘ie lava na aui ai a‘u ma ‘ua tausia ai a‘u ma le alofa tele.

5Auā e leai se tupu na lē fa‘apea lava le amataga o lona ola.

6‘Ua tasi la le ala e ulu mai ai tagata uma i le ola,

e tasi fo‘i le ala e mavae ‘ese ai. O le Naunau o Solomona i le Poto

7O le mea lea ‘ua ‘ou naunau ai i le atamai ma ‘ua foa‘iina mai lava ‘iā te a‘u;

‘ua ‘ou tagi atu i le Atua ma ‘ua sau ‘iā te a‘u le agaga o le poto.

8‘Ua ‘ou fa‘asilia ia i mālō uma ma nofoāli‘i,

‘ua ‘ou tāofi ifo e leai lava se ‘oloa pe a fa‘atatau ‘iā te ia.

9‘Ua ‘ou lē fa‘atusaina fo‘i ma ia o ma‘a tāua,

auā o auro uma o le lalolagi o oneone fa‘atauva‘a pe a fa‘atatauina ma le poto,

o le ario fo‘i ‘ua tusa ma le palapala i ona luma.

10Na ‘ou fa‘asili lo‘u alofa i ai i lo‘u mana‘o i le tino malosi ma le ‘aulelei

ma ‘ua tonu ‘iā te a‘u e ‘avea o ia mo‘u malamalama,

auā o lona malamalama e lē au tineia.

11A ‘ua ō mai o mea lelei uma ‘iā te a‘u fa‘atasi ma ia,

‘ua ‘ou talia ni ‘oloa e lē mafaitaulia nai ona lima.

12Ma ‘ua ‘ou ‘oli‘oli i mea uma, auā o le poto lenā sa savali pea i o‘u luma,

sa ‘ou lē iloa fo‘i o ia lava o le tinā o mea lelei uma ia.

13Na ‘ou a‘oa‘o le poto ma le loto ‘ua sa‘o,

‘ou te foa‘i atu fo‘i e aunoa ma se matau‘a,

‘ou te lē nanā lona mau‘oloa.

14Auā o ia o le tu‘ugā‘oloa mo tagata,

e lē āu fa‘aumatia lava ia; o ē ‘ua latou fa‘aaogāina,

‘ua mautufa‘aga ai i latou i le alofa fa‘auō o le Atua,

‘ua ta‘uleleia i ona luma ‘ona o tu lelei na a‘oa‘oina ai i latou. O le Tatalo a Solomona ‘ina ‘ia maua le Poto

15‘Ua tu‘u mai e le Atua ‘ia ‘ou fa‘amatalaina e tusa ma lo‘u mafaufau,

‘ia ‘ou mafaufau tonu fo‘i e tusa ma le mea alofa ‘ua ‘ou maua mai;

auā o ia o le ta‘ita‘i o le poto, o ia fo‘i o le fa‘atonutonu o ē popoto.

16O lona ‘a‘ao ‘ua i ai i tatou ma a tatou fa‘amatalaga,

o le poto ‘atoa uma ma le fa‘autauta ma le a‘oa‘oga.

17O ia ‘ua ‘ou maua mai ai le poto a‘ia‘i i mea uma na faia,

‘ua ‘ou iloa ai le uiga o le lalolagi ma le galuega a mea na faia a‘i;

18o le amataga ma le tutonu o augātausaga,

o le feliua‘i o ala ta‘amilo o le lā ma le feauaua‘i o tau;

19o le sologa o tausaga ma le tulaga o fetū i le vateatea;

20o le uiga o mea ola ‘ese‘ese ma masaniga a manu,

o le malosi o matagi, ma mānatunatuga o tagata,

o itū‘āiga ‘ese‘ese o la‘au ma le aogā o vaila‘au;

21o mea lilo ma mea aliali ‘ua malamalama ‘iā te a‘u;

auā na a‘oa‘oina ai a‘u e le poto na ia gaosia mea uma. O le Agaga o le Poto

22Auā o lo‘o ‘iā te ia le agaga o le malamalama; ‘ua pa‘ia,

‘ua tasi ma ‘ua sautualasi, ‘ua fa‘aagaga, ‘ua mau‘upu,

‘ua titio, ‘ua sao lona lelei, ‘ua manuia, ‘ua agamālie,

‘ua naunau i mea lelei, ‘ua ma‘ama‘ai, ‘ua lē aū fa‘alavelavea, ‘ua agalelei;

23‘ua agaalofa i tagata, ‘ua agamalū, ‘ua mautū,

‘ua lē mafa‘agae‘etia, ‘ua i ai le mana uma,

‘ua iloa e ia mea uma, ‘ua ulufia e ia o agaga uma o ē atamamai,

o ē mamā, o ē aupito ma‘ama‘ai.

24Auā e sili le titio o le poto i lo mea uma e gāoioi,

na te ulufia mea uma lava ‘ona o lona mamā sili.

25O le mānavaga ia o le mana o le Atua,

o le ‘ave mamā o le mamalu o le Atua e ona le mana uma;

o le mea lea e lē o i ai ‘iā te ia se mea ‘ele‘elea e tasi.

26O le pupula lava ia o le malamalama e fa‘avavau,

ma le fa‘aata mamā o le mamalu o le Atua,

ma le fa‘atusa o lona lelei.

27‘Ua tasi lava ia, a ‘ua mafai ‘iā te ia mea uma;

e lē liua lava ia, ‘ae na te fa‘afouina o mea uma ma ‘ua ulufale o ia,

i augatupulaga, i agaga o tagata pa‘ia, ‘ua ‘avea ai i latou ma uō a le Atua mana perofeta.

28Auā ‘ua na o lē soamafuta ma le poto ‘ua alofa i ai le Atua.

29Auā e sili lona matagofie i le lā ma fa‘aputuga ‘ese‘ese o fetū;

a fa‘atusaina ma le malamalama, e sili ai le poto lava ia.

30Auā e sui le pogisā i le malamalama,

‘ae lē mafai i le leaga ‘ona fa‘ato‘ilalo i le poto.