1O le alofa mai o le ALI‘I ‘ou te pese ai lava e fa‘avavau;
‘ou te fa‘ailoa atu i lo‘u gutu lou fa‘amaoni i lea tupulaga ma lea tupulaga.
2Auā na ‘ou fa‘apea ane:
E atiina a‘e le alofa e fa‘avavau lava;
o le lagi lava ‘e te fa‘atumauina i ai lou fa‘amaoni.
3“‘Ua ma osia le feagaiga ma lē na ‘ou filifilia,
na ‘ou tautō lava ‘iā Tavita la‘u ‘au‘auna.
4‘‘Ou te fa‘atumauina lau fānau e fa‘avavau lava;
‘ou te atiina a‘e fo‘i lou nofoāli‘i i lea tupulaga ma lea tupulaga.’” Selā
5Le ALI‘I e,
e vivi‘i le lagi i ou vāvega;
e vi‘ia fo‘i lou fa‘amaoni i le fa‘apotopotoga o le ‘au pa‘ia.
6Auā o ai ‘ea i le lagi e fa‘atusaina le ALI‘I?
o ai so le fānau a ē malolosi e tusa ma le ALI‘I?
7O le Atua e tatau ‘ona mata‘utia tele i le fa‘apotopotoga o le ‘au pa‘ia;
e tatau fo‘i ‘ona mata‘utia o ia e i latou uma o ē vagavagai ‘iā te ia.
8Le ALI‘I e, le Atua o ‘au, o ai sē malosi e tusa ma oe le ALI‘I e?
o lou fa‘amaoni fo‘i e si‘osi‘o ai ‘iā te oe.
9O oe lava, ‘e te pule i le fa‘amaualuga o le sami;
a sousou ona peau, o oe lava e laolao ai.
10O oe lava, na e tu‘imomomoina Raava e pei o sē ‘ua fasiotia;
o lou ‘a‘ao malosi ‘ua e fa‘ata‘ape‘ape ai i ē na ita ‘iā te oe.
11E ou le lagi, e ou fo‘i ma le lalolagi;
o oe na e fa‘avaeina le atu laulau ‘atoa ma mea ‘ua tumu ai.
12O oe, na e faia le itū i matū ma le itū i saute;
o Tapora ma Heremoni la te ‘alaga fiafia lava i lou suafa.
13O ‘iā te oe le ‘a‘ao malosi;
e malosi lava lou ‘a‘ao,
o lo‘o maualuga lou ‘a‘ao taumatau.
14O le amiotonu ma le fa‘amasinoga o lo‘o tumau ai lou nofoāli‘i;
o le alofa ma le fa‘amaoni la te muamua atu i ou luma.
15‘Amu‘ia le nu‘u ‘ua latou lagona, le leo fiafia;
le ALI‘I e, latou te sāvavali i le malamalama o ou fofoga.
16Latou te fiafia lava i lou suafa i aso uma lava;
o lau amiotonu fo‘i e maualuluga ai i latou.
17Auā o oe lo latou matagofie e i ai le malosi;
o lou finagalo alofa fo‘i ‘ua fa‘amaualugaina ai lo matou nifo.
18Auā o lo matou talitā o le ALI‘I lava lea;
o le Pa‘ia fo‘i o Isaraelu, o lo matou tupu lava ia.
19‘Ona e fetalai ane ai lea i le fa‘aaliga
i lou tagata amio Atua, ma ē fa‘apea ane,
“‘Ua a‘u tu‘uina atu le fesoasoani i lē ‘ua malosi;
‘ua ‘ou fa‘aeaina lē ‘ua filifilia mai le nu‘u.
20‘Ua ‘ou maua Tavita la‘u ‘au‘auna;
‘ua ‘ou fa‘au‘uina o ia i la‘u u‘u pa‘ia.
21O lē e tumau ‘iā te ia lo‘u lima;
e fa‘amalosia fo‘i o ia e lo‘u lima.
22E lē fa‘asauā ‘iā te ia lē ‘ua ita ‘iā te ia;
e lē fa‘atigāina fo‘i o ia e le tagata amio leaga.
23‘Ou te tu‘ipalaina i ona luma ē ‘ua ita ‘iā te ia;
‘ou te taia fo‘i ē ‘ua ‘ino‘ino ‘iā te ia.
24‘Ae ‘iā te ia lava lo‘u fa‘amaoni ma lo‘u alofa;
o lo‘u igoa fo‘i e fa‘amaualugaina ai lona nifo.
25‘Ou te fa‘ao‘o atu fo‘i lona lima i le sami
ma lona lima taumatau i vaitafe.
26E vala‘au mai o ia ‘iā te a‘u,
‘O lo‘u Tamā lava oe, o lo‘u Atua,
ma le papa o lo‘u olataga.’
27O a‘u fo‘i, ‘ou te faia o ia ma ulumatua,
e silisili o ia i tupu o le lalolagi.
28E tumau pea lo‘u alofa ‘iā te ia e fa‘avavau,
e fa‘amaonia fo‘i la‘u feagaiga ‘iā te ia.
29‘Ou te tofia lana fānau ‘ia fa‘avavau,
o lona nofoāli‘i fo‘i e pei o aso o le lagi.
30‘Āfai e lafoa‘iina la‘u tulafono e ana fānau,
ma latou lē sāvavali i a‘u fa‘amasinoga;
31‘āfai latou te solia a‘u tulafono,
ma latou lē tausia a‘u poloa‘iga.
32‘Ona ‘ou asiasia ai lea o latou solitulafono i le sasa,
‘ou te asiasia fo‘i a latou amio leaga i ta.
33A o lo‘u alofa e lē mavae atu lea ‘iā te ia,
‘ou te lē pepelo fo‘i i lo‘u fa‘amaoni.
34‘Ou te lē tu‘umavaega la‘u feagaiga,
‘ou te lē liliu lava le ‘upu ‘ua pa‘ū atu i o‘u laugutu.
35Na ‘ou tautō fa‘atasi i lo‘u pa‘ia,
‘ou te lē pepelo lava ‘iā Tavita.
36E fa‘avavau lava lana fānau,
o lona nofoāli‘i fo‘i e pei o le lā lea i o‘u luma.
37Pei o le masina e fa‘atumauina ia e fa‘avavau
ma le molimau i le lagi e fa‘amaoni lava.” Selā.
O le Fa‘anoanoa ‘ina ‘ua To‘ilalo le Tupu38A o oe, ‘ua e tete‘eina mai ma e ‘inosia mai,
‘ua e matuā to‘asā mai i lē na e fa‘au‘uina.
39‘Ua e lafoa‘i le feagaiga a lau ‘au‘auna;
‘ua e solia lona paleali‘i i le ‘ele‘ele.
40‘Ua e fa‘asoloina ona pā uma lava;
‘ua e faia fo‘i ona ‘olo ma faupu‘egama‘a.
41‘Ua vete fo‘i ana mea e i latou uma ‘ua ui ane i le ala;
‘ua fa‘alumaina o ia e i latou ‘ua tuā‘oi ma ia.
42‘Ua e fa‘amaualugaina le lima taumatau o ē ita ‘iā te ia;
‘ua e fa‘a‘oli‘oliina i latou uma o ē fai o ia mo latou fili.
43‘Ua e liliu‘esea fo‘i le mata o lana pelu,
ma ‘ua e lē fa‘atumauina o ia i le tau‘a.
44‘Ua e fa‘ai‘uina lona mamalu,
‘ua e lafo i lalo i le ‘ele‘ele lona nofoāli‘i.
45‘Ua e fa‘apu‘upu‘uina aso o lona taule‘ale‘a;
‘ua e fa‘a‘ofu ‘iā te ia i le mā. Selā.
O le Tatalo mo se Sa‘olotoga46Le ALI‘I e,
‘e te lafi oe se‘ia afea?
e fa‘avavau ‘ea?
e mū lou to‘asā e pei o le afi se‘ia afea?
47‘Ia e manatua le pu‘upu‘u o lo‘u olaga;
se a le mea ‘ua e faia ai fua le fānau uma a tagata.
48O ai se tagata ola na te lē iloa le oti
na te lavea‘iina ‘ea lona agaga a‘i le pule a le tu‘ugamau? Selā.
49Le Ali‘i e,
o ifea lou alofa anamua,
na e tautō ai i lou fa‘amaoni ‘iā Tavita?
50Le Ali‘i e, ‘ia e manatua le fa‘alumaina o au ‘au‘auna;
‘ua ‘ou tau‘ave i lo‘u fatafata ‘upu uma a nu‘u e tele;
51‘ua fa‘aluma mai ai o ē ‘ua ita ‘iā te oe le ALI‘I e,
‘ua latou fa‘alumaina ai tulagāvae o lē na e fa‘au‘uina.
52‘Ia fa‘afetaia le ALI‘I e fa‘avavau lava.
Amene ma Amene.
Who We AreWhat We EelieveWhat We Do
2025 by iamachristian.org,Inc All rights reserved.
