Salāmo 25 - Revised Samoan Catholic Bible

O le Finau a Tavita i le TataloO le salāmo a Tavita

1Le ALI‘I e,

‘ou te fa‘anaunau atu ‘iā te oe ma lo‘u loto.

2Lo‘u Atua e,

‘ou te fa‘atuatua ‘iā te oe;

‘aua ne‘i fa‘amāina a‘u;

‘aua ne‘i mitamita mai ‘iā te a‘u o ē ita mai ‘iā te a‘u.

3O i latou uma fo‘i o ē fa‘atalitali ‘iā te oe,

‘aua ne‘i fa‘amāina i latou;

e fa‘amāina o ē fai fua a latou amio pepelo.

4Le ALI‘I e,

‘ia e fa‘ailoa mai ‘iā te a‘u ou ala;

‘ia e a‘oa‘o mai ‘iā te a‘u i ou magāala.

5‘Ia e ta‘ita‘i mai ‘iā te a‘u i le mea moni mai ‘iā te oe,

ma a‘oa‘o mai ‘iā te a‘u,

auā o oe o le Atua o lo‘u olataga;

‘ou te fa‘atalitali ‘iā te oe i le aso ‘atoa.

6Le ALI‘I e,

‘ia e manatua lou alofa mutimutivale ma lou agalelei;

auā talu mai le vavau lava ia.

7‘Aua ‘e te manatua a‘u agasala ‘ina ‘ou taule‘ale‘a ma ‘ou solitulafono;

‘ae tusa ma lou alofa ‘ia e manatua mai a‘u,

le ALI‘I e, ‘ona o lou agalelei.

8O le ALI‘I, e agalelei ma amiotonu ia,

o le mea lea na te fa‘asinoina atu ai le ala i tagata agasala.

9E ta‘ita‘iina e ia o ē agamalū i le fa‘amasinoga;

na te a‘oa‘o mai fo‘i i ē agamalū i lona ala.

10O ala uma lava o le ALI‘I,

o le alofa ia ma le fa‘amaoni

i ē ‘ua tausi i lana feagaiga ma ana tulafono.

11Le ALI‘I e,

‘ona o lou suafa,

‘ia e fa‘amāgalo mai ai la‘u agasala,

auā ‘ua tele lava ia.

12O ai ‘ea le tagata o lē mata‘u i le ALI‘I?

E fa‘asinoina atu i ai e ia le ala na te filifilia.

13E mau o ia i le manuia;

o lana fānau fo‘i e fai mo latou le nu‘u.

14O lo‘o fa‘aali e le ALI‘I lona finagalo i ē matata‘u ‘iā te ia;

na te fa‘ailoa atu fo‘i lana feagaiga ‘iā te i latou.

15O lo‘o fa‘asaga pea lava o‘u mata i le ALI‘I;

auā o ia lava e tatalaina o‘u vae a‘i le ‘upega.

16‘Ia e liuliu alo mai ‘iā te a‘u ma alofa mai ‘iā te a‘u;

auā o a‘u ‘ou te to‘atasi ma puapuagātia.

17‘Ua fa‘ateleina puapuagā o lo‘u loto;

‘ia e ‘ave‘eseina a‘u i mea ‘ou te tigā ai.

18‘Ia e silasila mai i lo‘u puapuagā ma lo‘u tigā;

ma ‘ia e fa‘amāgaloina a‘u agasala uma lava.

19‘Ia e silasila i ē o ita mai ‘iā te a‘u,

auā e to‘atele i latou;

‘ua latou ‘ino‘ino fo‘i ‘iā te a‘u i le ‘ino‘ino fa‘asauā.

20‘Ia e leoleo ‘iā te a‘u ma lavea‘i mai ‘iā te a‘u;

‘aua ne‘i ‘ou mā, auā ‘ou te fa‘atuatua ‘iā te oe.

21‘Ia tausia a‘u e le amio sa‘o ma le amiotonu;

auā ‘ou te fa‘atalitali ‘iā te oe.

22Le Atua e,

‘ia e lavea‘i ‘iā Isaraelu i ona puapuagā uma lava.