Iopu 27 - Revised Samoan Catholic Bible

O ‘Upu a IopuIopu

1‘Ua sauni atu pea fo‘i e Iopu lana lauga, ‘ua fa‘apea atu,

2“O lo‘o soifua le Atua, o lē na ‘ave‘esea lo‘u fa‘amasinoga;

o Lē e ona le malosi uma lava o lē ‘ua fa‘atigā mai ‘iā te a‘u.

3O aso uma ‘ua i ai ‘iā te a‘u lo‘u ola,

‘ua i ai fo‘i i o‘u pogaiisu le mānava mai le Atua,

4e lē tautala ai lava o‘u laugutu i se mea lē tonu,

e lē tautala fo‘i lo‘u laulaufaiva i se mea pepelo.

5‘Ia mamao lava ‘iā te a‘u ‘ona ‘ou ta‘ua ‘outou ‘ua tonu;

se‘ia o‘o lava i lo‘u oti ‘ou te lē fa‘ate‘aina lava la‘u amio sa‘o.

6‘Ou te tāofimauina la‘u amiotonu, ‘ou te lē tu‘ua lava;

e lē fa‘aleagaina a‘u i lo‘u loto i o‘u aso uma.

7“O lē ‘ua fai a‘u mōna fili,

‘ia ‘avea o ia e pei o se tagata amio leaga;

o lē ‘ua tala‘i mai fo‘i ‘iā te a‘u, ‘ia pei o lē ‘ua amioletonu.

8Auā e ui lava ‘ina ‘ua mau mea le tagata fa‘alēmata‘u,

se a lona fa‘amoemoe pe a ‘ave‘esea e le Atua lona agaga?

9E fa‘afofogaina ‘ea e le Atua lana ‘alaga,

pe a o‘o ‘iā te ia le puapuagā?

10E fiafia ‘ea o ia i Lē e ona le malosi uma lava?

E vala‘au ‘ea o ia i le Atua i aso uma?

11‘Ou te a‘oa‘o atu ‘iā te ‘outou i le ‘a‘ao o le Atua;

‘ou te lē natia mea ‘ua i ai i Lē e ona le malosi uma lava.

12Fa‘auta, ‘ua ‘outou iloa e ‘outou uma lava;

o lenei, se a le mea ‘ua ‘outou fai mai ai ‘upu matuā fa‘atauva‘a?

13“O lenei le tofi o le tagata amio leaga mai le Atua,

o le tofi fo‘i o ē fa‘asauā latou te maua mai i Lē e ona le malosi uma lava.

14‘Āfai e fa‘ato‘ateleina ona atali‘i e fai i latou mo le pelu;

e le mā‘o‘ona fo‘i ana fānau i mea e ‘ai.

15E tanumia e lē oti o ē o totoe ‘iā te ia;

e lē fētāgisi fo‘i ona fafine ‘ua oti a latou tane.

16E ui ‘ina fa‘afaupu‘e e ia o ario e pei o le efuefu,

ma sauni ‘ofu e pei o le ‘omea.

17E saunia e ia, ‘ae ‘ofu ai lē ‘ua amiotonu,

e tufatufa fo‘i ario e lē ‘ua sa‘o lana amio.

18‘Ua ia faia lona fale e pei o se pepe,

e pei o se fale apitaga fo‘i ‘ua faia e le leoleo.

19E ta‘oto le mau‘oa ma ana ‘oloa, ‘ae lē fa‘aopoopoina atu i ona tamā;

e ala a‘e o ia, ‘ua leiloloa ana mea uma.

20E o‘o atu ‘iā te ia mea mata‘utia e pei o vai,

e ‘avea o ia e le asiosio i le po.

21E lelea o ia i le matagi mai sasa‘e, ‘ona alu ai lea;

e matuā lelea ‘ese ai o ia i le mea sa nofo ai.

22E fa‘ao‘o e le Atua ia mea ‘iā te ia, ‘ae lē fa‘asaoina,

e matuā fia sola ‘ese o ia i lona ‘a‘ao.

23E pati lima tagata ‘iā te ia,

ma tuliuisa ‘iā te ia ai le mea e nofo ai o ia.