Salāmo 106 - Revised Samoan Catholic Bible

O le Fa‘aaliga o Agasala a Isaraelu ma le ‘Onosa‘i o le Atua

1‘Ia ‘outou vivi‘i atu i le ALI‘I.

Vivi‘i atu ‘outou i le ALI‘I, auā e lelei lava o ia;

auā e fa‘avavau lava lona alofa.

2O ai sē na te mafaia ‘ona ta‘u atu i mea mamana a le ALI‘I?

O ai sē na te fa‘ailoa ona vi‘iga uma lava?

3‘Amu‘ia i latou o ē tausi i le fa‘amasinoga,

o ē fai le amiotonu e lē aunoa.

4Le ALI‘I e, ‘ia e manatu mai ‘iā te a‘u

e tusa ma lou finagalo alofa i ou tagata.

‘ia e asiasi mai ‘iā te a‘u ma lau fa‘aolataga.

5‘Ina ‘ia ‘ou iloa atu le manuia o ē na e filifilia,

‘ina ‘ia ‘ou fiafia i le fiafia o lou nu‘u;

‘ina ‘ia ‘ou mitamita fa‘atasi ma ē ‘ua fai mou tofi.

6‘Ua matou agasala ‘atoa ma o matou tamā,

‘ua amio fa‘api‘opi‘o i matou, ‘ua matou amio leaga lava.

7E le‘i mafaufau o matou tamā i ou vāvega i Aikupito;

e le‘i manatua e i latou le tele o au mea alofa;

a ‘ua fouvale i tala ane o le sami, o le sami Ulaula.

8A ‘ua na fa‘aola ‘iā i latou ‘ona o lona lava suafa,

‘ina ‘ia fa‘ailoa atu ai lona mana.

9‘Ua ia a‘oa‘i atu i le sami Ulaula, i le ‘ua matūtū;

‘ua ia ‘aumaia i latou i mea loloto e pei o le vao.

10‘Ua na fa‘aola ‘iā i latou nai le lima o lē na ‘ino‘ino ‘iā i latou,

ma na fa‘aolaina ai nai le lima o lē na ita i ai.

11A ‘ua lofia i le sami ē na fa‘asauā ‘iā i latou;

‘ua leai so latou na toe.

12‘Ona talitonu lea o i latou i ana afioga,

‘ua latou pepese i ona vi‘iga.

13‘Ua vave galo ‘iā te i latou o ana mea na fai;

e le‘i fa‘atali atu i latou i lana pule.

14‘Ua latou tu‘inanau lava i le vao,

‘ua latou tofotofo fo‘i i le Atua i le vao.

15‘Ona foa‘iina atu ai lea e ia ‘iā i latou o le mea na latou mana‘o ai;

a ‘ua fa‘atupuina le tino vale ‘iā te i latou.

16‘Ua matatau‘a fo‘i i latou ‘iā Mose i le toagalauapi,

ma Arona le tagata pa‘ia o le ALI‘I.

17‘Ua fa‘amaga le ‘ele‘ele, ‘ona foloina ai lea o Tatano,

‘ua ufitia ai ē na fa‘apotopoto ‘iā Apiramo.

18‘Ua mū fo‘i le afi i lo latou fa‘apotopotoga,

‘ua susunuina i le afi mumū o ē na amio leaga.

19‘Ua faia e i latou le tama‘i povi i Horepa,

‘ua latou ifo fo‘i i le tupua u‘amea.

20Sa liliu e i latou lo latou mamalu

i le fa‘atusa o le povi na te ‘ai vao.

21‘Ua galo ‘iā te i latou lo latou Fa‘aola le Atua,

o lē na faia mea tetele i Aikupito.

22O vāvega i le nu‘u o Hamo,

ma mea e mata‘utia i le sami Ulaula.

23‘Ona ia fetalai mai lea e fa‘aumatia i latou e ia,

‘ana lē se anoa Mose na filifilia e ia,

na tu i ona luma i le mea ‘ua sofaia,

‘ia liliu‘eseina lona to‘asā ‘ina ne‘i fa‘aumatia i latou.

24‘Ua ‘ino‘ino fo‘i i latou i le nu‘u matagofie;

e le‘i talitonu i latou lana afioga.

25A ‘ua latou muimui i totonu o latou fale ‘ie,

e le‘i fa‘alogo i latou i le si‘ufofoga o le ALI‘I.

26‘Ona ia si‘i ai lea o lona ‘a‘ao ‘iā i latou,

e fasi ai ‘iā te i latou i le vao;

27‘ina ‘ia fasi fo‘i la latou fānau i nu‘u ‘ese,

ma fa‘ata‘ape‘ape ‘iā te latou i nu‘u.

28‘Ua latou fa‘atasi atu fo‘i ‘iā Paalapeoro,

ma latou ‘a‘ai i taulaga i ē ‘ua oti.

29Sa latou fa‘alili atu ‘iā te ia ‘iā latou mea na fai;

‘ona oso mai lea ‘iā i latou o le fa‘ama‘i.

30‘Ona tula‘i ai lea o Fineaso, ma na fai le fa‘amasinoga;

‘ona tāofia ai lea o le fa‘ama‘i.

31Sa ta‘ua fo‘i lea mea ‘iā te ia e fai ma amiotonu

i lea tupulaga ma lea tupulaga e fa‘avavau.

32‘Ua fa‘atupu fo‘i e i latou lona to‘asā i le vai o Meripa,

na leaga ai fo‘i Mose ‘ona o i latou.

33Auā na latou fa‘a‘ono‘ono i lona loto,

i le ‘ua so‘ona tautala ona laugutu.

34E le‘i fa‘aumatia e i latou o ia nu‘u

na fetalai atu ai le ALI‘I ‘iā te i latou.

35A ‘ua latou nofo fefiloi ma nu‘u ‘ese,

‘ona a‘oa‘oina ai lea o i latou ‘iā latou amioga.

36‘Ua latou ‘au‘auna fo‘i i o latou tupua;

‘ua fai fo‘i ia mea ma mailei ‘iā i latou.

37‘Ua latou fai fo‘i o latou atali‘i,

ma o latou afafine ma taulaga i temoni,

38ma latou sasa‘a le toto o ē le sala.

O toto o latou atali‘i ma o latou afafine,

ē na latou fai ma taulaga i tupua o Kanana;

‘ona leaga ai lea o le lau‘ele‘ele i le toto.

39‘Ona leaga ai lea o i latou ‘iā latou lava amio,

‘ua latou faita‘aga fo‘i ‘iā latou mea na fai.

40‘Ona mumū ai lea o le to‘asā o le ALI‘I i lona nu‘u,

‘ua ia ‘ino‘ino fo‘i i lona tofi.

41‘Ua na tu‘uina atu ai i latou i lima o nu‘u ‘ese;

‘ua pule fo‘i ‘iā i latou o ē na ‘ino‘ino ‘iā te i latou.

42‘Ua fa‘asauā fo‘i ‘iā i latou o ē na ita i ai,

‘ua fa‘ato‘ilaloina fo‘i i latou i o latou lima.

43‘Ua atu lasi ‘ona lavea‘i o ia ‘iā te i latou,

a o i latou ‘ua latou fa‘a‘ono‘ono ‘iā te ia ‘iā latou pulega;

na solia fo‘i i latou ‘ona o a latou amio leaga.

44A ‘ua silasila mai o ia i lo latou puapuagā,

‘ina ‘ua fa‘afofoga i lo latou ‘alalaga.

45‘Ona ia manatua lea mo i latou o lana feagaiga,

ma ‘ua salamō e tusa ma lona alofa tele.

46‘Ua ia avatu fo‘i ‘iā i latou ‘ia alofagia

e i latou uma ē na fa‘atagataotau‘aina i latou.

47Le ALI‘I e, lo matou Atua, ‘ia e fa‘aola mai ‘iā te i matou,

ma e fa‘apotopoto ‘iā i matou a‘i nu‘u ‘ese,

‘ina ‘ia vivi‘i i lou suafa pa‘ia,

‘ia mitamita fo‘i i vi‘iga ‘iā te oe.

48‘Ia fa‘afetaia le ALI‘I, o le Atua o Isaraelu

mai le vavau ma ‘ia o‘o i le fa‘avavau;

ma ‘ia fa‘apea mai o le nu‘u uma lava, “Amene.”

‘Ia ‘outou vivi‘i atu i le ALI‘I.