Salāmo 91 - Revised Samoan Catholic Bible

O le Manuia o ē Amio Atua; o le Atua e Mamalu ai i Latou

1O le nofo i le mea lilo o i ai lē Silisili‘ese,

e mau o ia i le paolo o Lē e ona le malosi uma lava.

2‘Ou te fa‘apea atu i le ALI‘I,

“O lo‘u malu o ia ma lo‘u ‘olo;

o lo‘u Atua ‘ou te fa‘atuatua ‘iā te ia.”

3Auā o ia na te lavea‘iina oe i le mailei a lē fai manu,

ma le fa‘ama‘i e oti ai.

4E ufiufi ifo o ia ‘iā te oe i ona ‘apa‘au,

‘e te sulufa‘i fo‘i i lalo o ona ‘apa‘au;

e faia lona fa‘amaoni māu talipupuni ma mea e puipuiina ai oe.

5‘E te lē mata‘u i le mea mata‘utia i le po,

ma le ū fanafana e lele i le ao.

6O le fa‘ama‘i e fealua‘i i le pogisā,

ma le mala e fano ai i le aoatea.

7E pa‘u‘ū se to‘aafe i ou tafatafa,

ma le manoi lou itū taumatau;

‘ae lē tāitāi ane ‘iā te oe.

8Na ‘ona va‘ai i ai ou mata,

‘e te iloa atu fo‘i le taui o ē amio leaga.

9Auā o oe, le ALI‘I e, o lo‘u malu oe,

na e faia lē Silisili‘ese ma mea ‘e te nofo ai.

10E lē o‘o ‘iā te oe se mea leaga

e le tāitāi ane fo‘i se mala i lou fale ‘ie.

11Auā e poloa‘i atu ia i ana agelu ‘iā te oe,

e tausi ‘iā te oe i ou ala uma.

12Latou te ‘ave ‘iā te oe i o latou lima,

ne‘i tū‘ia lou vae i se ma‘a.

13‘E te solia le leona ma le asipi;

‘e te solia lava le leona ta‘anoa ma le tanimo.

14‘Ona ‘ua naunau mai o ia ‘iā te a‘u,

o le mea lea ‘ou te fa‘aolaina ai o ia;

‘ou te fa‘amamalu ‘iā te ia ‘ona ‘ua iloa e ia lo‘u igoa.

15E vala‘au mai o ia ‘iā te a‘u ‘ona ‘ou tali atu ai lea ‘iā te ia;

o a‘u, ‘ou te ‘iā te ia i le puapuagā;

‘ou te lavea‘iina o ia ma ‘ou fa‘atupuina lona mamalu.

16O le olaga fa‘afualoa e malie ai o ia ‘iā te a‘u;

‘ou te fa‘aali atu fo‘i ‘iā te ia la‘u fa‘aolataga.