Sirako 13 - Revised Samoan Catholic Bible

O le vā Feagai ma ē Mamalu ma ē Mau‘oloa

1‘Ai sē lote i le pulu e pulutia ai, e ‘ele‘elea ai lava ia;

‘ai sē fa‘auō ma le tagata fa‘amaualuga,

e fa‘a‘ofu fo‘i o ia i le fa‘amaualuga.

2O sē fa‘amasani ma se tagata ‘ua sili ‘ona mamalu ‘iā te ia, ‘ua na amo lava se avega;

‘aua ne‘i fai oe ma soa o se tasi ‘ua sili ‘ona mau‘oloa ‘iā te oe.

3Fa‘apefea ‘ona fa‘auō le ‘ulo ma le ipu ‘omea? auā a fetaui, e nutipalaina.

4E amioletonu le tagata mau‘oloa, ‘ae lilivau lava ia;

e fa‘aleagaina le tagata mativa, ‘ae fa‘alologo o ia.

5‘Āfai ‘ua aogā lava oe ‘iā te ia, ‘ona ia fa‘aaogā ai lea ‘iā te oe;

‘āfai e uma āu mea, ‘ona ia tu‘ulafoa‘i ai lea ‘iā te oe.

6‘Āfai ‘ua e mau‘oloa, e api lava o ia ‘iā te oe ma ‘ave mā ia au mea;

‘ae lē poipoi lava ‘iā te oe.

7‘Āfai ‘ua aogā lava oe ‘iā te ia, ‘ona ia fa‘a‘ole‘ole lea ‘iā te oe,

na te soisoi ‘iā te oe ma fa‘atupu lou fa‘amoemoe,

o fai atu ‘iā te oe ni ‘upu mālie, ma le fa‘apea atu:

“Se ā se mea ‘e te mana‘o i ai?”

8Na te mafatia oe i ana faigā‘ai, se‘ia o‘o ‘ina vetea e ia āu mea,

pe fa‘alua pe fa‘atolu, ‘ae mulimuli ane ‘ona ia tauemu lea ‘iā te oe;

‘ona ia iloa atu lea ‘iā te oe, ‘ae tu‘ulafoa‘i ‘iā te oe ma lialia‘i lona ulu ‘iā te oe.

9‘Ia e fa‘amaulalo atu i le Atua ma fa‘atalitali atu i ona ‘a‘ao.

10‘Ia e fa‘aeteete ‘ina ne‘i ‘ole‘olegia oe,

‘ona e pa‘ū ai lea i le fa‘avalevalea.

11‘Aua ‘e te ta‘ufa‘atauva‘a i lo oe poto,

‘ina ne‘i tōsina ai oe i le fa‘avalevalea, ‘ona e māsiasi ai lea.

12A fa‘alatalata mai ‘iā te oe le tagata mamalu,

‘inā e ‘alo ‘ese ia, auā e atili ai ‘ona ia fa‘alatalata mai ‘iā te oe.

13‘Aua ‘e te fa‘afiato‘aga, ‘ina ne‘i te‘ena oe,

‘aua fo‘i ‘e te tu mamao ma ia, ‘ina ne‘i fa‘agaloina oe.

14‘Aua ‘e te fia talatalanoa ma ‘ia e peiseaī ‘ua ‘oulua tutusa,

‘aua fo‘i ‘e te talitonu i ana ‘upu e tele; auā o le tele o ana ‘upu na te tofotofoina ai oe,

ma soisoi ‘iā te oe, o fesili atu i au amioga lilo.

15O lona loto ‘ua aunoa ma se alofa, e tāofi e ia au ‘upu,

na te lē fa‘asaoina oe ai mea fa‘atigā po o le fale puipui.

16‘Ia tautuanā ma oe, ‘ia e to‘aga lelei i ‘upu ‘ua e fa‘alogo i ai,

auā ‘ua lua feoa‘i ma le mea e fano a‘i oe.

17‘Ae peita‘i ‘ia e fa‘alogo i ai,

o manatu ifo o le miti le mea ‘ua e va‘ai i ai, a ‘ua e mataala lava oe.

18‘Ia e alofa i le Atua i aso uma o lou ola,

ma ‘ia e vala‘au atu ‘iā te ia, ‘ia e maua ai le olataga.

19E fiafia mea ola uma i sē la te tutusa,

e fa‘apea fo‘i o tagata uma ‘ona fiafia i sē la te tuā‘oi.

20O mea ola uma lava, ‘ua ta‘itasi ma fa‘atasia ma sē la te tutusa;

e fa‘auō fo‘i le tagata ma lē la te fa‘afeagai.

21E pei ‘ona lē fa‘auō le luko ma le mamoe,

e fa‘apea lava le tagata amiotonu ma le tagata agasala.

22Pe fa‘apefea ‘ona lotogatasi o le tagata pa‘ia ma le ulī?

Pe fa‘apefea ‘ona tofusia fa‘atasi le mau‘oloa ma le tagata mativa?

23O le asini o le vao, o le mea e ‘ai lea a le leona i le vao tu‘ufua,

e fa‘apea fo‘i o tagata matitiva ‘ona ‘aina e tagata mau‘oa.

24E pei ‘ona ‘inosia le māsiasi e le tagata fa‘amaualuga,

e fa‘apea ‘ona ‘inosia le mau‘oloa e le tagata mativa.

25A fa‘agae‘etia le mau‘oloa, e fa‘amausalīina loa o ia e ana uō;

‘ae ‘āfai e pa‘ū le tagata mativa, e tulia fo‘i o ia e ana lava uō.

26‘Āfai ‘ua tautevateva le mau‘oloa, ‘ua fesoasoani i ai nisi e to‘atele;

‘ua fai e ia ni ‘upu fa‘asausili, ‘ae latou te ta‘uamiotonuina lava ia.

27A o le tagata o le lautele, a fa‘asesēina o ia, e ‘upuleagaina ai fo‘i;

‘ua tautala o ia ma le mafaufau, ‘ae leai se tasi na te fa‘alogo ‘iā te ia.

28‘Ua tautala le mau‘oloa, ‘ona fa‘alologo lea tagata uma,

‘ua latou si‘i lana ‘upu e o‘o lava i ao o le lagi.

29‘Ua tautala le tagata mativa, ‘ona latou fa‘apea ane lea:

“Po o ai ‘ea lenei?”

‘Āfai fo‘i ‘ua tautevateva, ‘ona latou lafotū ai lea ‘iā te ia.

30O le mea lelei le ‘oloa pe a lē o i ai se agasala i le loto fuatia ifo;

‘ae matuā leaga le mativa i le gutu o le tagata amio leaga.

31O le loto o le tagata e liua ai ona mata, e lelei ai pe leaga ai.

32O le mata fiafia o le fa‘ailoga va‘aia o le loto lelei,

e lē mauagofie, vaganā ‘ua e galue lava i ai.