1 Makapaio 3 - Revised Samoan Catholic Bible

O le Ta‘ita‘iga a Iuta Makapaio(2 Maka 8.1-7)

1Ma ‘ua tula‘i mai lona atali‘i o Iuta, ‘ua igoa ‘iā Makapaio, e sui ‘iā te ia.

2Ma ‘ua fesoasoani mai ‘iā te ia ona uso uma lava ‘atoa ma i latou sa fa‘atasi ma lona tamā, ma ‘ua latou tau le tau‘a mo Isaraelu ma le loto fiafia.

3‘Ua na fa‘alauteleina le mamalu o lona nu‘u;

‘ua ‘ofu o ia i le ufifatafata e pei o se fitafita toa

ma ‘ua fusi e ia lona ‘au‘upega o le toa

e si‘i ai le tau‘a ma ‘ua puipui i le togālauapi i lana pelu.

4‘Ua fa‘atusaina i le leona i ana galuega,

‘ua pei o se tama‘i leona ‘ua tagi i le tuligāmanu.

5‘Ua tuliloa o ē amio leaga,

o sā‘ili‘ili solo ‘iā te i latou;

ma ‘ua na susunu i le afi i latou sa fa‘atigā i lona nu‘u.

6‘Ua solomuli o ē ita mai, ‘ona o le mata‘u ‘iā te ia,

‘ua mata‘utuia o ē fai amio leaga;

o lona lima na ta‘ita‘iina ai le olataga.

7Ma ‘ua na fa‘a‘ono‘ono i tupu e to‘atele

ma ‘ua fa‘afiafia ‘iā Iakopo i ana galuega;

e ta‘uleleia fo‘i lona fa‘amanatuga e o‘o i le fa‘avavau.

8Ma ‘ua fealua‘i i ‘a‘ai o Iuta ma ‘ua na fa‘aumatia ai o ē amio leaga

ma ‘ua liu‘eseina a‘i le to‘asā ia Isaraelu.

9Ma ‘ua ta‘ua lona igoa e o‘o i tulu‘iga o le lau‘ele‘ele

ma ‘ua na fa‘apotopotoina o ē ‘ua lata ‘ona fano.

10Ma ‘ua fa‘apotopotoina e Apoloni o nu‘u ‘ese, ‘atoa ma le ‘au e to‘atele ma le malolosi mai Samaria, e tau ai le tau‘a ma Isaraelu. ma ‘ua na sopo‘ia le vaitafe o le Eufirate ma ‘ua savali atu i le atu mauga.

‘Ua Manumālō o Iuta i le Tau‘a(2 Maka 8.8-36)

38Ma ‘ua tofia e Lusia o Tulonaio, le atali‘i o Turumene ma Nikanora ma Korekia, o ali‘i mamalu, o uō a le tupu.

39Ma ‘ua tu‘u atu ‘iā te i latou o tagata tau e fagafulu afe ma le fitu o afe, o ē ti‘eti‘e i solofanua, ‘ina ‘ia latou ō atu i le lau‘ele‘ele o Iuta ma fa‘ata‘ape‘ape ‘iā te i latou, e tusa ma le ‘upu a le tupu.

40Ma ‘ua latou ō ma la latou ‘au ‘atoa ma ‘ua latou ō mai ma ‘ua latou tolauapi e lata ane i Emau, i le fanua laulelei.

41‘Ua fa‘alogo e tagata fa‘atau‘oloa o le nu‘u le tala i le ō mai o i latou, ‘ona latou tago lea i le ario ma le auro tele lava, ma a latou ‘au‘auna ma ‘ua latou ō mai i le togālauapi i le fia maua le fānau a Isaraelu e fai mā latou pologa; ma ‘ua fa‘aopoopo ‘iā te i latou le ‘au a Asuria ma le ‘au mai nu‘u ‘ese.

42Ma ‘ua iloa atu e Iuta mōna uso ‘ua fa‘atuputeleina o mea leaga ma ‘ua aga‘i mai le vaega ‘au i lo latou lau‘ele‘ele; ma ‘ua latou iloa ‘upu a le tupu na ia poloa‘i ai i lona nu‘u ‘ia fasiotia ma fa‘aumatia Isaraelu;

43‘ona tautalatala lea le tagata i lē la te tuā‘oi, “‘Ia tatou laga le to‘ilalo o lo tatou nu‘u ma tau le tau‘a mo lo tatou nu‘u ma lo tatou malumalu.”

44‘Ona potopoto ai lea i latou ‘ina ‘ia sauniuni i le tau‘a ma fai talosaga ma fa‘atoga atu i le agaalofa ma le alofa mutimutivale.

45Sa lē ‘ainā fo‘i o Ierusalema,

sa tusa ma le fanua tu‘ufua;

sa lē i ai se tasi o lana fānau e ulufale ma ulufafo ai;

sa solipalaina fo‘i le malumalu,

sa i le ‘olo fo‘i o le fānauga a nu‘u ‘ese;

‘ua ‘avea lava ia ma nofoaga o nu‘u ‘ese;

ma ‘ua ‘ave‘esea le fiafia mai ‘iā Iakopo,

‘ua mavae le tagi o le fagufagu ma le kitara.

46Ma ‘ua fa‘apotopotoina i latou ma ‘ua latou ō mai i Mesepa, auā o Mesepa o le mea sa mua‘i fai ai talosaga a Isaraelu. Fa‘ama 20.1-3; 1 Samu 7.5-6

47Ma ‘ua latou anapopogi i le aso lea ma ‘ua latou fa‘a‘ofu i ‘ofu talatala ma lulu‘u le lefulefu i luga i o latou ulu ma ‘ua latou saei o latou ‘ofu;

48ma ‘ua latou fofola o tusi o le tulafono sa sā‘ilia e nu‘u ‘ese ‘ina ‘ia tusia ai o fa‘atusa o latou tupua; 2 Maka 8.23

49ma ‘ua latou ‘aumaia o teuga o ositaulaga, ma mea fa‘apolopolo, ma mea e sefulua‘i a latou mea; ma ‘ua latou ‘amia mai o Naseri ‘ua uma o latou aso; Nume 6.1

50ma ‘ua latou ‘alalaga atu i le lagi ma le leo tele, o fai ane: “Se a se mea matou te faia i nei tagata, po o fea matou te ta‘ita‘iina atu ai i latou?

51‘Ua solipalaina lou malumalu ma ‘ua fa‘aleagaina, o ou ositaulaga fo‘i ‘ua mafatia i le fa‘anoanoa ma le māsiasi.

52A o lenei ‘ua fa‘apotopoto nu‘u ‘ese e tau ma i matou i le fia fa‘ata‘ape‘ape i matou; ‘ua e silafia o latou manatu ‘iā i matou.

53A mafai fa‘apefea ‘ona matou tutū i o latou luma, ‘āfai e lē fesoasoani mai lava oe, le Atua e?”

54Ma ‘ua latou ili pū ma le leo tele lava.

55‘Ua mavae atu mea ia, ‘ona tofia lea e Iuta o ta‘ita‘i o le nu‘u, e fai ma ali‘i o ta‘ito‘aafe ma ali‘i o ta‘ito‘aselau ma ali‘i o ta‘ito‘alimagafulu ma ali‘i o ta‘ito‘atinoagafulu.

56Ma ‘ua fai atu ‘iā i latou sa ati a‘e o latou fale, ma i latou sa fa‘amau e faiavā, ma i latou sa totō a latou tōvine ma i latou sa fefefe, ‘ina ‘ia latou fo‘i atu i o latou fale ta‘ito‘atasi, e tusa ma le tulafono. Teu 20.5-9; Fa‘ama 7.3

57‘Ona ‘ave lea o latou fale ‘ie, ‘ua tolauapi i le itū i saute o Emau.

58Ma ‘ua fai atu o Iuta, “‘Ia fusi ‘outou sulugātiti, ma ‘ia loto malosi ‘outou; ma ‘outou nofo sauni, a taeao, ‘ona tau le tau‘a ma nu‘u ‘ese nei ‘ua fa‘apotopotoina e tau ma tatou, i le fia fa‘aumatia i tatou ma lo tatou malumalu;

59auā e lelei ‘ona tatou oti i le tau‘a, ‘ae leaga lo tatou iloa atu le fa‘aleagaina o lo tatou nu‘u ma lo tatou malumalu.

60‘Ae ‘ia faia lava e tusa ma le finagalo o lē afio i le lagi.”