Sirako 26 - Revised Samoan Catholic Bible

O le Avā Amio Lelei

1‘Amu‘ia le tane a le fafine amiotonu;

e fa‘aluaina ai le tele o ona tausaga.

2O le avā loto malosi o le fiafia lava ia o lana tane,

na te fa‘atumau i le filemū o tausaga o lona ola.

3O le tofi lelei le avā amio lelei, o le tofi lea o ē matata‘u i le Atua,

e foa‘iina mai i le tagata e taui a‘i ana galuega lelei.

4E fiafia pea le loto o lana tane, e tusa pe mau‘oloa pe mativa o ia,

e aliali mai pea le ‘oli‘oli i ona lava mata.

5O mea e tolu ‘ua mata‘u i ai lo‘u loto,

a o lona fā e segavale ai o‘u mata.

6O le ‘ino‘ino mai o le ‘a‘ai ‘atoa, o le fouvale o le motu o tagata,

7ma le tu‘ua‘i pepelo, o mea ia e feoloolo ai lava le oti.

O le Avā Fuā

8A o le avā fuā, o le fa‘anoanoa lava lea ma le fa‘atigā loto.

9O le avā fuā ‘ua i ai le sasa o le laulaufaiva, e o‘otia ai tagata uma.

10E pei o le tafiti o povi e lua ‘ua amo tasi, e fa‘apea le avā loto leaga;

o lē fa‘atasi ma ia ‘ua pei o se tagata ‘ua na umia se akarava.

11O le avā ‘ua masani i le ‘onā e tuputele ai le ita ma le māsiasi o lana tane,

e lē mafai ‘ona natia lona matagā.

12O ona mata fa‘aosooso ma le gāoioi o ona laumata e iloa ai le fafine mulilua.

13‘Ia e leoleo ma le filigā i lou afafine pe ‘āfai ‘ua lē fia ‘alo ‘ese o ia i fa‘aosoosoga,

‘ina ne‘i oso i le leaga pe a maua ai sona ala.

14‘Ia e fulitua i mata ‘ua fa‘aosooso,

‘aua fo‘i ‘e te ofo pe ‘āfai ‘ua fa‘asesēina ai oe.

15E pei o le tagata faimalaga ‘ua fia inu, e fa‘amaga lona gutu i le vaipuna,

na te inu lava i vai uma e tau atu i ai, e nofonofo lava ia i poutū uma

ma tatala lana utu i ū fanafana uma se‘ia o‘o ‘ina lailoa ai o ia.

O Fa‘amanuiaga o le Avā Lelei

16O le agamālie o le avā mā‘elegā o le fiafia lea o lana tane, e lololo a‘i ona ivi;

17o lona amiotonu, o le mea alofa lea a le Atua.

18O le avā mafaufau ‘ua fa‘alologo o ia;

e leai se mea e mafa‘atusaina i ai le avā ‘ua a‘oa‘oina lelei.

19O le avā amiotonu ma le loto mamā, o le mea alofa ‘ua sili i mea alofa uma.

20O le avā loto mamā e lē ma fa‘atusaina i ai ni tu‘ugā‘oloa.

21E pei o le oso a‘e o le lā mo le lalolagi i mea aupito i lugā a le Atua,

e fa‘apea ‘ona pupula le lālelei o le avā amiotonu i teuga o lona fale.

22E pei o le molī e mū i le tu‘ugāmolī pa‘ia,

e fa‘apea o mata lālelei i luga o se tino lelei.

23E pei o poutū auro i tulaga ario,

e fa‘apea vae o le fafine loto malosi ona mautū i luga o ona alofivae.

24E pei o fa‘avae e fa‘avavau i luga o le papa e lē mafa‘agae‘etia,

e fa‘apea o poloa‘iga a le Atua i le loto o le fafine amiotonu.

O Mea e Fa‘anoanoa ai le Loto

25O mea e lua e fa‘anoanoa ai lo‘u loto, a o lona tolu e oso a‘i lo‘u ita.

26O le tagata tau ‘ua tigāina i le mativa;

o le tagata mafaufau ‘ua tauemuina;

27ma le tagata ‘ua tu‘u le amiotonu ‘ae fai le agasala;

‘ua saunia lea tagata e le Atua mo le pelu.

28O matagaluega e lua ‘ua mata e faigatā ma tutupu ai fa‘alavelave.

E faigatā i le fa‘atau ‘oloa ona ‘alo ‘ese i soligātulafono;

o le pule fo‘i i le fale ‘ava e lē aunoa o ia ma ni agasala i ‘upu.