Poto 9 - Revised Samoan Catholic Bible

O le Tatalo a Solomona i le Atua ‘ia Foa‘i mai le Poto

1“Le Atua e o o‘u tamā, le Ali‘i o le agaalofa,

na e faia mea uma i lau fetalaiga,

2na e fa‘atūina fo‘i le tagata i lou poto,

‘ina ‘ia pule o ia i mea uma na e faia;

3‘ina ‘ia pulea e ia le lalolagi i le amio lelei ma le amiotonu,

‘ina ‘ia faia fo‘i ana fa‘amasinoga ma le loto fa‘amaoni.

4‘Inā e foa‘i mai ia le poto ‘ua nofo fa‘atasi ma oe i lou nofoāli‘i,

‘aua fo‘i ne‘i e fa‘afiti ‘ona e talia a‘u ma lau fānau.

5Auā o a‘u o lau ‘au‘auna, o le tama fo‘i a‘u a lau ‘au‘auna,

o a‘u o le tagata vaivai, e pu‘upu‘u lava lo‘u ola,

e fa‘alēlava fo‘i lo‘u mafaufau ‘ia ‘ou lagona ifo ai o lau fa‘amasinoga ma au tulafono.

6Auā e ui ‘ina ‘atoa le lelei o se tasi o le fānau a tagata,

‘ae lē taulia lava ia pe ‘āfai ‘ua lē o ‘iā te ia le poto mai ‘iā te oe.

7O oe lava na e tofia o a‘u e fai ma tupu o lou nu‘u,

‘ou te fa‘amasinoina ou atali‘i ma ou afafine.

8‘Ua e poloa‘i mai ‘ou te ati a‘e se malumalu i lou mauga pa‘ia,

ma se fatafaitaulaga i le ‘a‘ai ‘ua fai mou afio‘aga,

‘ia foliga i lou fale ‘ie pa‘ia na e saunia talu mai i le amataga.

9‘Ua fa‘atasi ma oe o lea poto, na te iloa uma au galuega,

sa i ai lava ia ‘ina ‘ua e gaosia le lalolagi;

‘ua na iloa o mea ‘ua lelei i ou luma ma mea ‘ua tonu e tusa māu poloa‘iga.

10‘Ia e ‘auina mai o ia nai lou afio‘aga pa‘ia o le lagi,

nai le nofoāli‘i o lou mamalu, ‘ina ‘ia fa‘atasi lava ia ma a‘u,

‘ia galue fa‘atasi ma a‘u, ‘ia ‘ou iloa ai o mea ‘ua malie ai lou finagalo;

11auā e iloa e ia mea uma lava, e malamalama ‘iā te ia mea uma;

na te ta‘ita‘i ‘iā te a‘u ma le fa‘autauta i a‘u galuega ma puipui ‘iā te a‘u i lona mamalu.

12‘Ona tali leleia lea o a‘u galuega;

‘ou te fa‘amasino i lou nu‘u ma le amiotonu,

‘ona aogā fo‘i lea o a‘u e nofo i le nofoāli‘i o lo‘u tamā.

13Auā o ai se tagata na te mafaia ‘ona fua le atamai o le Atua,

po o ai fo‘i na te mafaia ‘ona iloa mea e finagalo i ai le Atua!

14Auā e pu‘upu‘u mafaufauga o tagata, e fa‘alētonu o matou tāofi.

15Auā o le tino palagia e mafatia ai le agaga ma le loto ‘ua mafaufau i mea e tele,

e taomia lava ia e lona fale fa‘alelalolagi.

16E ‘i‘itegatā ‘iā i matou o mea ‘ua i le lalolagi,

e faigatā ‘ona matou iloa o mea ‘ua i o matou luma;

a o mea ‘ua i le lagi, e malamalama ‘ea ‘iā te ai?

17Po o ai na te iloa lou finagalo pe a e lē foa‘i mai le poto,

pe a e lē ‘auina ifo lou Agaga pa‘ia mai le lagi?

18E fa‘apea lava ‘ona fa‘asa‘oina o ala o i latou ‘ua i le lalolagi,

e a‘oa‘oina ai o tagata i mea ‘e te finagalo i ai.

Auā o le poto lava,

le Ali‘i e, na fa‘aolaina ai o i latou uma

na e finagalo malie i ai talu mai le amataga.”