Esoto 38 - Revised Samoan Catholic Bible

O le Fatafaitaulaga(Eso 27.1-8)

1‘Ua ia faia fo‘i le fatafaitaulaga e fai ai taulaga mū, i le la‘au o le setima, e lima kupita lona umi, e lima fo‘i kupita lona lau, ‘ua fa‘atafafā, ‘ua tolu fo‘i kupita lona maualuga.

2‘Ua ia faia fo‘i ona nifo i ona tuli fata e fa, ‘ua fai i lea lava mea ona nifo; ‘ua ia ufiufi ai i le ‘apamemea.

3‘Ua ia faia fo‘i mea uma mo le fatafaitaulaga, o ona tanoa e tali ai ona lefulefu, ma ona suō, ma ona ipu, ma ona tui, ma ona salefu; o ana mea uma ‘ua na faia i le ‘apamemea.

4‘Ua ia faia fo‘i mo le fatafaitaulaga o le ta‘igaafi, ‘ua fa‘amata‘upega ‘ona fai i le ‘apamemea, i lalo ifo o lona tafatafa i totonu, ‘ua o‘o lava i le totonugalemū.

5‘Ua ia faia fo‘i mama e fa mo tuli ta‘igaafi ‘apamemea e fa, e sulu ai amo.

6‘Ua ia faia fo‘i amo i le la‘au o le setima, ma na ufiufi ai i le ‘apamemea.

7‘Ua ia sulu atu fo‘i amo i mama i itū o le fatafaitaulaga e amo a‘i; ‘ua ia faia fo‘i i laupapa, ‘ua ōō.

O Tanoa ‘Apamemea(Eso 30.18)

8‘Ua ia faia fo‘i le tanoa ‘apamemea e mulumulu ai ma lona tulaga ‘apamemea i fa‘aata o le galu fafine ē na fa‘apotopoto ane i le faitoto‘a o le fale ‘ie o le fa‘apotopotoga.

O ‘ie Puipui o le Malumalu(Eso 27.9-19)

9‘Ua ia faia fo‘i le lotoā i le itū i sasa‘e, e fa‘asaga lea i le itū i sasa‘e, o ‘ie puipui mo le lotoā, o le ‘ie vavae ‘ua milo ona manoa, e tasi le selau kupita o lona umi;

10e luafulu o latou pou, ma o latou lago ‘apamemea e luafulu; a ‘ua faia i le ario e fa‘amau o ona pou ma latou amo pou.

11O le itū fo‘i i matū e tasi le selau o ona kupita o ‘ie e luafulu o latou pou, e luafulu fo‘i o latou lago ‘apamemea; ‘ua faia fo‘i i le ario o latou fa‘amau ma lo latou amo pou.

12Mo le itū fo‘i i sisifo o ‘ie puipui e limagafulu kupita o lona umi, e tasi le sefulu o latou pou, mo latou lago e sefulu, a o fa‘amau o pou, ma latou amo pou ‘ua faia i le ario.

13Mo le itū fo‘i i sasa‘e, e fa‘asaga i sasa‘e, e limagafulu kupita o le ‘ie puipui.

14O ‘ie puipui o le tasi itū o le faitoto‘a e sefulu ma le lima o kupita, o latou pou e tolu, ma o latou lago e tolu.

15O le tasi fo‘i itū o le faitoto‘a, o i lea itū ma lea itū o le lotoā o ‘ie puipui e sefulu ma le lima kupita, o latou pou e tolu, ma o latou lago e tolu.

16O ‘ie puipui uma lava ‘ua si‘osi‘oina ai lotoā, ‘ua faia i le ‘ie vavae ‘ua milo ona manoa.

17O lago o pou o le ‘apamemea ia; o fa‘amau o pou ma lo latou amo pou o le ario ia; o ufi fo‘i o latou pito i luga o le ario ia; ‘ua i ai fo‘i i pou uma lava o le lotoā o amo pou ario.

18O le ‘ie puipui o le faitoto‘a o le lotoā, ‘ua faia i le galuega a le tufuga fai ‘ie lanu ‘ese‘ese i le ‘ie uli, ma le pāuli, ma le mūmū, ma le ‘ie vavae ‘ua milo ona manoa; o lona umi e luafulu o kupita, o lona maualuga fo‘i o lona lau lea o kupita e lima, e tusa ma ‘ie puipui o le lotoā.

19E fa o latou pou, e fa fo‘i o latou lago ‘apamemea, a o latou fa‘amau o le ario ia; o ufi fo‘i o latou pito i luga ma lo latou amo pou o ario lava ia.

20O fa‘amau uma o le malumalu, ‘atoa ma le lotoā i ona itū uma, o ‘apamemea ia.

O U‘amea sa Fausia ai le Malumalu

21O ona ‘ato‘atoa ia o mea o le malumalu, o le malumalu lea ‘ua i ai le tulafono, ‘ua faitauina e tusa ma le ‘upu a Mose, e fai ai galuega a sa Levi, i le lima o Itamaro le atali‘i o le ositaulaga o Arona.

22O mea uma lava ‘ua poloa‘i mai ai le ALI‘I ‘iā Mose, na faia ia e Pesaleli le atali‘i o Auri, o le atali‘i o Huro lea, o le itū‘āiga o Iuta.

23Sa fa‘atasi fo‘i ma ia o Aliavu le atali‘i o Aisamako, o le itū‘āiga o Tanu, o le tufuga togitogi mea, o le tufuga poto, ma lalaga ‘ie lanu ‘ese‘ese i le ‘ie uli, ma le pāuli, ma le mūmū, ma le ‘ie vavae.

24O le auro ‘atoa uma na fai ai le galuega, o le galuega uma lea a le malumalu, o le auro o le taulaga, ‘ua luafulu ma le iva o taleni, ma sekeli e fitu galau ma le tolu sefulu, e fa‘atatau i le sekeli o le malumalu.

25O le ario fo‘i o ē na faitaulia i le fa‘apotopotoga, e tasi le selau o taleni, ma sekeli e tasi le afe e fitu galau ma le fitu sefulu ma le lima, e fa‘atatau i le sekeli o le malumalu.Eso 30.11-16

26E ta‘itasi ma lana peka, o le vaeluagalemū o le sekeli lea, e fa‘atatau i le sekeli o le malumalu; e ta‘ito‘atasi uma o ē na faitaulia, ‘ua luafulu o latou tausaga, ‘atoa ma ē ‘ua matutua ai; o ona ‘atoa o ia tagata, e ono selau o afe ma afe e tolu, e to‘alima galau ma le to‘alimagafulu.Mata 17.24

27O le selau o taleni ario na tunu e fai a‘i lago o le malumalu, ma lago fo‘i o le ‘ie puipui; e tasi le selau o lago na faia i taleni e selau, o le taleni e tasi i le lago e tasi.

28O sekeli fo‘i ia e tasi le afe e fitu galau ma le fitu sefulu ma le lima, na ia fai a‘i o fa‘amau mo pou; ‘ina ‘ia ufiufi a‘i fo‘i i o latou pito i luga, ma fa‘amau a‘i i latou.

29O le ‘apamemea o le taulaga e fitugafulu taleni, ma ona sekeli e lua afe ma le fa galau;

30na ia fai a‘i fo‘i o lago o le faitoto‘a o le fale fetāfa‘i o le fa‘apotopotoga; ma le fatafaitaulaga ‘apamemea, ma lona ta‘igaafi ‘apamemea, ma mea uma lava o le fatafaitaulaga;

31ma lago o le lotoā ‘ua si‘osi‘oina ai; o lago fo‘i o le faitoto‘a o le lotoā, ma fa‘amau uma lava o le malumalu, ma fa‘amau uma lava o le lotoā ‘ua si‘osi‘oina ai.