Sirako 36 - Revised Samoan Catholic Bible

O le Tatalo mo le Nu‘u o Isaraelu

1‘Ia e alofa mai ‘iā te i matou, le Atua e, le pule aoao,

‘ia e ua‘i mai ou fofoga ‘iā i matou ma fa‘aali mai ‘iā i matou le malamalama o lou agaalofa.

2‘Ia e fa‘ao‘o atu lou mata‘utia i nu‘u ‘ua latou le sā‘ili‘ili atu ‘iā te oe,

‘ina ‘ia latou iloa ai e leai se tasi Atua, ‘ua na o oe ma ‘ia latou tala mai lou mamalu.

3‘Ia e si‘i a‘e lou ‘a‘ao i luga o nu‘u ‘ese ‘ina ‘ia latou iloa atu lou mana.

4Auā e pei ‘ona ta‘uamiotonuina oe ‘iā i matou i o latou luma,

‘ia fa‘apea fo‘i ‘ona ta‘uamiotonuina oe ‘iā i latou i o matou luma.

5‘Ina ‘ia latou iloa atu oe, e pei ‘ona iloaina oe e i matou,

‘ona ‘ua leai lava se tasi Atua, ‘ua na o oe lava le Ali‘i e.

6‘Ia e toe faia au vāvega, toe fa‘aali au galuega ofoofogia.

7‘Ia e fa‘amamalu i lou ‘a‘ao, o lou ‘a‘ao taumatau.

8‘Ia e fa‘aoso lou to‘atama‘i, ‘ia e liligi ifo lou to‘asā.

9‘Ia e fa‘aumatia lē ita mai, ‘ia e fa‘asalaina le fili.

10‘Ia e fa‘avave le aso, ‘ia e manatua le fa‘ai‘uga, ‘ina ‘ia latou tala mai au vāvega.

11‘Ia fa‘aumatia i le ita o le afi mū lē ‘ua sola ‘ese;

‘ia maua le fanoga e i latou ‘ua fa‘asauā i lou nu‘u.

12‘Ia e foa‘iina ulu o ta‘ita‘i o le fili,

‘ua latou fa‘apea ifo, “E leai se tasi, na o i matou lava.”

13‘Ia e fa‘apotopoto itū‘āiga uma o Iakopo,

‘ina ‘ia latou iloa ai ‘ua leai se tasi Atua,

‘ua na o oe lava, ma ‘ia latou tala mai āu vāvega,

‘ia ‘avea i latou mou tofi, e pei o aso muamua.

14‘Ia e alofa mai i lou nu‘u ‘ua ta‘ua i latou i lou suafa ma Isaraelu ‘ua e fa‘atusaina i lou atali‘i ulumatua.

15‘Ia e alofa mai i le ‘a‘ai ‘ua i ai o lou malumalu, le ‘a‘ai o lou mālōlōga.

16‘Ia e fa‘atumuina Siona i au fetalaiga e lē mafa‘amatalaina le pa‘ia,

o lou nu‘u fo‘i ‘ia e fa‘atumuina i lou mamalu.

17‘Ia e molimau lava oe ‘iā i latou ‘ua ‘avea mou tagata talu mai le amataga,

ma ‘ia e fa‘ataunu‘u o valo‘aga ‘ua faia i lou suafa e perofeta muamua.

18‘Ia e taui mai ‘iā i latou ‘ua fa‘atalitali ‘iā te oe,

‘ina ‘ia iloa ai le fa‘amaoni o au perofeta,

‘ia e fa‘afofoga fo‘i i ōlega a au ‘au‘auna,

19e tusa ma le fa‘amanuiaga a Arona i luga o lou nu‘u;

‘ia e ta‘ita‘i fo‘i i matou i ala o le amiotonu,

‘ina ‘ia iloa ai e i latou uma o nonofo i le lalolagi o oe lava o le Atua lē silasila ifo i augatupulaga.

20E talia e le manava mea e ‘ai ‘ese‘ese uma,

‘ae sili le lelei o le tasi mea e ‘ai i lo le tasi mea e ‘ai.

21E masino i le gutu le ‘a‘ano o manu ‘aivao,

‘ua masino fo‘i i le loto mafaufau o ‘upu o le talapepelo.

22E fa‘atupu fa‘anoanoa e le tagata loto leaga,

‘ae tete‘e atu i ai le tagata poto.

O le Tāua o le Avā Amio Lelei

23E tali e le fafine so se tasi ‘ua fai mana tane,

‘ae sili ‘ona lelei le tasi teine i le tasi teine.

24O le ‘aulelei o le fafine e fiafia i ai mata o lana tane,

i lo ‘ua silia ai lava ona mana‘oga uma fa‘aletagata.

25‘Āfai ‘ua poto ma lona laulaufaiva i le fofō,

‘āfai ‘ua agamalū o ia ma le agaalofa,

‘ona lē toe tulaga fa‘atasi ai lea lana tane ma le fānau a tagata.

26O lē ‘ua ‘iā te ia le avā amiotonu, ‘ua i ai le ‘autū o le ‘oa,

o le fesoasoani lava ‘ua tusa ma ia, ma le poutū e lagolago ai.

27‘Ai se fanua e leai sona pā, e vetea mea ‘ua i ai;

‘ai se tane e leai sana avā, e mapuitigā i le mativa;

28po o ai sē a fa‘atuatua i lē ‘ua lē o i ai sona ōfaga,

‘ua ia api i le mea e pogia ai o ia,

e pei o se faomea titio e fealua‘i solo i lea ‘a‘ai ma lea ‘a‘ai?