Salāmo 11 - Revised Samoan Catholic Bible

O le Fa‘atuatua o Tavita i le ALI‘IMa le usu pese. O le salāmo a Tavita

1‘Ou te fa‘alagolago i le ALI‘I;

se a le mea tou te fai mai ai ‘iā te a‘u.

“‘Inā sola ia e pei o le manulele i lo ‘outou mauga?

2Auā, fa‘auta, o ē fai amio leaga ‘ua latou lolo‘u le ‘aufana,

‘ua latou tu‘u le ū i le fu‘a,

e fana fa‘alilolilo ai i ē ‘ua tonu o latou loto.

3Auā ‘ua fulisia fa‘avae;

se a se mea e mafai ai le tagata amiotonu ‘ona fai?”

4O le ALI‘I o i lona malumalu pa‘ia o ia;

o le ALI‘I o lo‘o i le lagi lona nofoāli‘i;

e silasila mai ona fofoga,

e tofotofo le fānau a tagata e ona laufofoga.

5E tofotofo e le ALI‘I i lē ‘ua amiotonu;

a ‘ua ‘inosia e lona finagalo lē fai amio leaga,

ma lē fiafia i le fa‘asauā.

6E fa‘atotō fa‘aua mai e ia i luga o ē fai amio leaga

o mailei, o le afi ma le teiō,

o le matagi fo‘i e manunu ai; o le tofi lea o la latou ipu.

7Auā o le ALI‘I le amiotonu e fiafia o ia i le amiotonu;

e silasila ona fofoga i lē ‘ua amio sa‘o.