Nauma 2 - Revised Samoan Catholic Bible

O le Valo‘aga i le Fa‘ato‘ilaloga o Nineva

1‘Ua alu a‘e i ou lava luma lē na te fa‘ata‘ape‘apeina.

‘Inā leoleo ia le ‘olo,

va‘ava‘ai i le ala,

‘ia fusi a‘e sulugātiti,

‘ia matuā fa‘ateleina lou malosi.

2Auā e ui lava ‘ina tafia i latou e i latou o ē tafi, ma latou fa‘atauma‘oi fo‘i a latou la la‘au, ‘ae toe fa‘afoisia e le ALI‘I le mamalu o Iakopo, e fa‘apea fo‘i le mamalu o Isaraelu.

3O talitā o ona tagata totoa ‘ua fa‘alanu ulaula ia,

o tagata fitafita fo‘i ‘ua ‘o‘ofu i latou i ‘ofu mūmū.

E fepulafi fa‘aafi o u‘amea

o kariota i le aso e sauniuni ai o ia;

e fuafua fo‘i o latou tao.

4E matuā feosofa‘i kariota i ala tele,

e so‘ona fetaufetulia‘i i malae.

E tino mai pei o sulu,

e tele vavave pei o le uila.

5‘Ua manatua e ia ona ali‘i sili,

‘ua latou tautevateva i lo latou savali,

‘ua latou fa‘atelelise i lona pā,

‘ua saunia fo‘i le talipupuni.

6‘Ua tatalaina puipui o vaitafe,

‘ua sōloia fo‘i le maota.

7Na fa‘atumauina o ia, a ‘ua fa‘alelavalavaina,

‘ua ta‘ita‘iina a‘e o ia,

‘ua ga‘ega‘e fo‘i ana ‘au‘auna fafine e pei o leo o lupe,

latou te taufaitu‘i i o latou fatafata.

8O Nineva fo‘i ‘ua fa‘apei o le vailepa ia talu mai anamua,

a ‘ua latou sōsōla lava.

“Tutū mai ia, ‘inā Tutū mai;”

‘ae leai sē tepa i tua.

9“‘Ia ‘outou vete ario,

‘inā vete ia o auro.

E le uma le ‘oloa lelei,

‘ua faula‘i mea uma e mana‘omia.”

10‘Ua gaogao, ‘ua fa‘agaogaoina, ‘ua fa‘atafunaina;

‘ua fa‘avaivai le loto, ‘ua gatete tulivae,

‘ua tigā tele tua uma,

o latou mata uma fo‘i ‘ua matamatavale.

11O ifea ‘ea le ana o leona,

ma le mea na ‘a‘ai ai leona ta‘anoa,

o le mea na fealua‘i ai le leona,

le leona avilu, ‘atoa ma le tama‘i leona,

e leai fo‘i se tasi na fa‘amata‘u atu ai?

12Na saei e le leona ‘ia mā‘o‘ona ai ana fānau,

‘ua na titina manu fo‘i mo ana leona fafine,

‘ua na fa‘atumuina ona lua i mea na maua,

o ona ana fo‘i ‘ua fa‘atumuina ia i mea ‘ua saeia.

13O lo‘o fa‘apea mai o le ALI‘I o ‘au: Fa‘auta, ‘ou te tete‘e ‘iā te oe, ‘ou te susunu fo‘i ‘ia liu asu ona kariota, e fa‘aumatia au leona ta‘anoa i le pelu; ‘ou te ‘ave‘eseina fo‘i i le nu‘u au mea na saeia; e lē toe lagona fo‘i leo o au sāvali.