Salāmo 78 - Revised Samoan Catholic Bible

O le Tala o le To‘asā o le Atua i ē lē Fa‘alogoO le salāmo a Asafo e a‘oa‘o ai

1Lo‘u nu‘u e,

‘ia ‘outou fa‘alogologo mai i la‘u tulafono;

‘ia ua‘i mai o ‘outou taliga i ‘upu a lo‘u gutu.

2‘Ou te tautala atu lava i le fa‘ata‘oto;

‘ou te ta‘u atu mea lilo talu anamuā,

3o mea na tatou fa‘alogologo i ai, ma tatou iloa;

na talaina mai fo‘i ‘iā te i tatou e o tatou tamā.

4Tatou te lē natia ia mea ‘iā latou fānau,

‘ae ta‘uta‘u atu i tupulaga amulī o vi‘iga o le ALI‘I,

ma lona malosi ma ona vāvega na na faia.

5‘Ua ia fa‘atūina le tulafono ‘iā Iakopo,

‘ua ia tu‘uina fo‘i le poloa‘iga ‘iā Isaraelu,

o mea na ia poloa‘i atu ai i o tatou tamā,

‘ina ‘ia latou fa‘ailoa ai ‘iā latou fānau;

6‘ina ‘ia iloa ai e le tupulaga amulī,

o fānau lava e fānau mai;

e tutupu mai i latou, ma ta‘u atu ai ‘iā latou fānau.

7‘Ina ‘ia fai le Atua mo latou fa‘atuatuaga;

ma ‘ia lē galo galuega a le Atua;

a ‘ia latou tausi i ana poloa‘iga;

8‘ina ‘ia lē pei o latou tamā i latou,

o le tupulaga vaogatā ma le fouvale:

o le tupulaga na lē sauni o latou loto;

e le‘i fa‘amaoni fo‘i o latou loto i le Atua.

9O le fānauga a Efaraima ‘ua i ai ‘au‘upega,

o ē na fanafana i u;

na liutua i latou i le aso na tau ai le tau‘a.

10Na latou le tausia le feagaiga a le Atua,

na lē mafafai fo‘i ‘ona latou sāvavali i lana tulafono.

11Na latou fa‘agalogaloina fo‘i ana galuega,

ma ona vāvega na ia fa‘aali ‘iā te i latou.

12Na ia faia vāvega i luma o latou tamā

i le nu‘u o Aikupito o le lau‘ele‘ele o Soana.

13Na ia vavaeina le sami ma fa‘aui ane ai i latou;

na ia fa‘atūina fo‘i le suāsami e pei o se mea maupu‘epu‘e.

14Na ia ta‘ita‘i ‘iā te i latou ‘ina o ao i le ao

a o le malamalama o le afi na ia ta‘ita‘i ai ‘iā te i latou i le po ‘atoa.

15Na ia vaevaea papa i le vao;

na ia fa‘ainu ‘iā i latou e peiseaī sa i ai vai loloto.

16Na ia fa‘aoso fo‘i o vaitafe nai le papa,

na ia fa‘atafe ifo le vai e pei o vaitafe.

17A ‘ua fa‘aopoopo ‘ona toe agasala atu i latou ‘iā te ia,

i lo latou fa‘a‘ono‘ono i lē Silisili‘ese i le nu‘u naumati.

18Na latou tofotofo i le Atua i o latou loto

i lo latou ole atu i mea e ‘ai i lo latou tu‘inanau.

19Na ‘upuia le Atua e i latou; ‘ua fa‘apea a latou,

“‘Ua mafaia ‘ea e le Atua ‘ona laulau mai mea e ‘ai i le vao?

20Fa‘auta, na ia taia le papa, ‘ua tafe mai ai le vai;

‘ona oso ai lea i tua o vaitafe;

e mafaia fo‘i ‘ea ‘ona foa‘i mai ni mea e a‘i?

e mafaia ‘ea ‘ona ‘aumai o ‘a‘ano o manu mā lona nu‘u?”

21O le mea lea na fa‘afofoga mai ai le ALI‘I,

‘ona to‘asā mai ai lea o ia;

na tutu ai le afi ‘iā Iakopo,

na o‘o a‘e fo‘i le to‘atama‘i ‘iā Isaraelu;

22auā ‘ua latou lē fa‘atuatua i le Atua,

‘ua latou lē fa‘alagolago i le olataga mai ‘iā te ia.

23Na ia poloa‘i i ao mai luga;

na ia tō mai fo‘i o puipui o le lagi,

24na ia fa‘atotō fa‘aua i luga ‘iā te i latou le manai e ‘a‘ai ai;

na ia avatua fo‘i ‘iā te i latou o mea e ‘ai mai le lagi.

25Na ‘a‘ai tagata i le mea e ‘ai ‘ae malolosi;

na ia tu‘uina atu ‘iā te i latou le mea e ‘ai latou te mā‘o‘ona ai.

26Na ia fa‘aoso mai i le lagi le matagi mai sasa‘e;

o lona malosi fo‘i na ia fa‘aagi mai ai le matagi mai saute.

27Na ia fa‘atotō fa‘aua fo‘i i luga ‘iā te i latou o manu e pei o le efuefu;

o manu felelei fo‘i e pei o le oneone i le sami;

28na ia fa‘atotōina ai i totonu i lo latou toagalauapi;

e fa‘ata‘ali‘oli‘o ai i mea sa latou nonofo ai.

29Na latou ‘a‘ai, ‘ona matuā mā‘o‘ona ai lea o i latou;

auā na ia avatu ‘iā te i latou o mea na latou tu‘inanau i ai.

30Na lē te‘a i latou i le mea na latou tu‘inanau i ai;

a o i o latou gutu a latou mea e ‘ai,

31‘ua o‘o ai ‘iā te i latou le to‘asā o le Atua,

‘ua fasiotia fo‘i o latou tagata puputa,

ma na lafo i lalo taulele‘a o Isaraelu.

32E ui lava i ia mea uma, a ‘ua latou agasala pea;

e ui lava i ona vāvega, ‘ae latou te le‘i fa‘atuatua lava.

33‘Ona fa‘aumatia fa‘alēaogā ai lea e ia o latou olaga,

na fa‘aumatia fo‘i o latou tausaga i le atuatuvale.

34Na latou sā‘ili‘ili atu ‘iā te ia ‘ina o fasiotia i latou e ia;

‘ona latou fo‘i ai lea i le sā‘ili‘ili i latou i le Atua.

35‘Ona latou manatu ifo ai lea o le Atua o lo latou papa ia;

o le Atua silisili o ia na te fa‘aolaina i latou.

36A ‘ua latou pepelo ‘iā te ia i o latou gutu,

ma ‘ua latou fa‘a‘ole‘ole ‘iā te ia i o latou laulaufaiva.

37E le‘i tūtūmau fo‘i o latou loto ‘iā te ia,

e le‘i fa‘amaoni fo‘i latou i lana feagaiga.

38A o ia, ‘ua alofa mutimutivale,

‘ua ia fa‘amāgaloina a latou amio leaga;

na ia lē fa‘aumatia ai i latou;

‘ua liliu ‘ese fa‘alasi e ia lona to‘asā,

na ia lē fa‘atupuina fo‘i lona to‘atama‘i ‘ato‘atoa;

39auā na ia manatua, ‘ua na o tagata lava i latou;

o le matagi o lo‘o mavae atu, e lē toe fo‘i mai lava.

40Na fa‘alasi na‘uā ‘ona latou fa‘a‘ono‘ono ‘iā te ia i le vao;

na latou fa‘alili lava ‘iā te ia i le vao.

41Na latou toe tofotofo lava i le Atua;

ma latou fa‘a‘ono‘ono i le Pa‘ia o Isaraelu.

42Latou te le‘i manatua lona ‘a‘ao,

o le aso na ia fa‘aolaina ai i latou a‘i le puapuagā;

43o ona fa‘ailoga na na faia i Aikupito,

‘atoa ma ona vāvega i le lau‘ele‘ele o Soana.

44Na ia liua fo‘i o latou vaitafe ma toto,

‘atoa ma o latou vaitai, ‘ina ‘ia latou lē inu ai.

45Na ia ‘a‘auina atu ‘iā te i latou o garova, na ‘aina ai i latou;

o rane fo‘i na fa‘aumatia ai i latou.

46Na ia avatua fo‘i o fua o lo latou fanua i le sē kasili,

na avatua fo‘i a latou galuega i le sē akerise.

47Na ia fa‘amateina o a latou vine i le uato‘a,

na ia fa‘amateina fo‘i a latou sukamoru i le uato‘a tetele.

48Na ia tu‘uina atu fo‘i o a latou manu i le uato‘a

ma na tu‘uina a latou lafu mamoe i le uila.

49Na ia fa‘ao‘o ‘iā te i latou o lona to‘asā mamafa,

o le ma‘ema‘eā, le to‘atama‘i, ma le puapuagā,

i lona ‘a‘auina atu o ‘au‘auna e i ai mala.

50‘Ua na saunia le ala o lona to‘asā;

e le‘i fa‘asaoina e ia o i latou i le oti,

a ‘ua tu‘uina atu o latou ola i le fa‘ama‘i.

51Na ia fasia fo‘i ulumatua uma i Aikupito;

o le amataga o lo latou malosi na i fale ‘ie o Hamo.

52Na ia ‘aumaia fo‘i lona nu‘u e pei o mamoe,

ma na ta‘ita‘iina i latou i le vao e pei o se lafu.

53Na ia ta‘ita‘iina i latou ‘ua saogalemū,

o lea na lē fefefe ai i latou;

a o ē ‘ua ita i ai, ‘ua lofia i latou i le sami.

54Na ia fa‘ao‘o ‘iā te i latou i lona lau‘ele‘ele pa‘ia,

o lenei lava mauga na ia maua i lona ‘a‘ao taumatau.

55Na ia tulia fo‘i nu‘u ‘ese i o latou luma,

‘ona vaevaeina atu lea e ia ‘iā te i latou le tofi ‘ua fuatia,

ma na fa‘anonofo o itū‘āiga o Isaraelu i o latou fale ‘ie.

56A ‘ua latou tofotofo ma fa‘a‘ono‘ono i le Atua silisili ‘ese;

e le‘i tausi fo‘i e i latou ana tulafono.

57‘Ua toe liliu i latou ma fa‘a‘ole‘ole e pei o latou tamā;

‘ua liua i latou e pei o le ‘aufana ‘ua pepelo.

58Na latou fa‘alili fo‘i ‘iā te ia ‘iā latou mea maualuluga;

na latou fa‘atupuina fo‘i lona fuā ‘iā latou tupua ‘ua ta.

59‘Ua fa‘afofoga le Atua, ‘ona to‘asā tele ai lea o ia,

‘ona matuā ‘ino‘ino ai lea o ia ‘iā Isaraelu.

60Na ia lafoa‘i ai le malumalu i Sailo,

o le fale fetāfa‘i sa mau ai o ia ma tagata.

61Na ia tu‘uina atu fo‘i lona malosi ‘ia tāfea,

na ia tu‘uina atu fo‘i lona matagofie i le lima o lē ‘ua ita mai.

62Na ia tu‘uina fo‘i o lona nu‘u i le pelu,

ma ‘ua to‘asā tele ia i lona lava tofi.

63O latou taulele‘a ‘ua fa‘aumatia i le afi;

o latou taupou fo‘i ‘ua lē vi‘ia i latou.

64O latou ositaulaga, ‘ua oti i latou i le pelu;

e le‘i taufaiauē fo‘i a latou avā.

65‘Ona maleifua ai lea o le ALI‘I e peiseaī na tofā,

e pei o se tagata malosi ‘ua ‘alaga ‘ona o le uaina.

66‘Ua na taia ē ‘ua ita ‘iā te ia i o latou tua;

‘ua na faia lea mo latou luma e fa‘avavau.

67Na ia tete‘e atu fo‘i i le fale ‘ie o Iosefa,

na ia lē filifilia fo‘i le itū‘āiga o Efaraima.

68A ‘ua ia filifilia le itū‘āiga o Iuta,

o le mauga o Siona na ia finagalo i ai.

69‘Ua na faia fo‘i o lona malumalu e pei o mea maualuluga,

e pei o le lalolagi na ia fa‘avaeina e fa‘avavau lava.

70‘Ua na filifilia fo‘i Tavita lana ‘au‘auna,

ma na ‘aumaia o ia nai lotoā mamoe;

71na ia ‘aumaia o ia sa mulimuli i mamoe fānanau,

‘ina ‘ia fafaga lava o ia ‘iā Iakopo lona nu‘u,

o Isaraelu fo‘i lona tofi.

72Na fafaga fo‘i e ia ‘iā te i latou e tusa ma le fa‘amaoni o lona loto;

na ia ta‘ita‘i ‘iā te i latou i le poto o ona lima.